Numeri 12 - BIBELE Taba yea Botse

Miriamo o a otlwa

¹ Moshe o be a nyetše mosadi wa Mokushe, gomme Miriamo le Arone ba mo solela taba yeo.

² Ba re: “Na Morena o boletše ka Moshe fela? Na ga se a bolela le ka rena?” Morena a kwa se ba se bolelago.

³ Moshe e be e le motho wa go ikokobetša, a ikokobetša go feta batho bohle lefaseng.

⁴ Ka bjako Morena a re go Moshe le Arone le Miriamo: “Ka bararo ga lena tlang Tenteng ya bodulo bja ka.” Ba ya,

⁵ gomme Morena a theoga ka thololo ya leru, a ema mojakong wa Tente, a bitša Arone le Miriamo. Ka babedi ga bona ba batamela,

⁶ gomme Morena a re: “Bjale theetšang se ke se bolelago! Ge go na le moprofeta gare ga lena, ke ikutollela yena ka dipono, ka bolela le yena ka ditoro.

⁷ Ga go swane le ge ke bolela le mohlanka wa ka, Moshe; yena ke mmeile mohlokomedi wa setšhaba sa ka ka moka sa Israele.

⁸ Ka gona yena ke bolela naye re lebantše difahlego; ke bolela le yena ka moo go kwagalago, e sego ka dika; gape o šetše a bone sebopego sa ka! Bjale ke ka lebaka lang le bile le sebete sa go sola mohlanka wa ka, Moshe?”

⁹ Morena o be a ba galefetše; ka gona ya re ge a tloga

¹⁰ mme le leru le tloga Tenteng, Miriamo a aparelwa ke bolwetši bjo bošoro ba letlalo, mme ya ba yo mošweu bjalo ka lehlwa. Ge Arone a mo lebelela, a bona a aparetšwe ke bolwetši bjoo,

¹¹ mme a re go Moshe: “Hle, mong wa ka, se re otle ka kotlo ye ya sebe sa rena sa botlatla.

¹² Se mo lese a eba bjalo ka lesea la go tswalwa le hwile, le le llwego ka thoko.”

¹³ Ka gona Moshe a llela Morena a re: “Hle, Modimo, mo fodiše!”

¹⁴ Morena a mo fetola a re: “Ge tatagwe a ka be a mo tshwetše ka mare sefahlego, a o be a ka se fetše matšatši a a šupago a gobogile? Ka gona a a tswalelelwe ka ntle ga mešaša matšatši a a šupago, gomme ka morago ga moo a ka bušetšwa mešašeng.”

¹⁵ Miriamo a tswalelelwa ka ntle ga mešaša matšatši a a šupago, gomme setšhaba sa se ke sa huduga, sa letela go fihlela ge a tsenywa gape mešašeng.

¹⁶ Ya ba gona ba tlogago Hatserote, gomme ba ya ba hloma mešaša lešokeng la Parane.