Nehemia 1 - BIBELE Taba yea Botse

¹ Tše ke ditaba tša Nehemia, morwa wa Hakalia. Ka kgwedi ya Kislebe, ngwageng wa masome a mabedi wa ge Artazerksese e le kgoši ya Persia, nna, Nehemia, ke be ke le Susa, motsengmošate.

Nehemia o rapelela Baisraele

² Hanani, yo mongwe wa bomorwarre, a tla le banna ba bangwe ba etšwa Juda, gomme ka ba botšiša ka Jerusalema le ka Bajuda ba gaborena ba ba bego ba boile bothopša Babilonia.

³ Ba mpotša gore mašaledi ao a boetšego nageng ya bona a phela ka bothata kudu, le gore batho ba šele ba ba agišanego le bona ba a ba nyatša. Ba ile ba mpotša le gore merako ya Jerusalema a kgeregile, le gore masoro a tšhumilwe.

⁴ Ge ke ekwa tšeo ka dula fase ka lla. Ka tšea matšatši ke nyamile, ke sa je selo. Ka rapela Modimo ka re:

⁵ “Joo, Morena Modimo wa legodimo, o yo mogolo, o a boifega! O botegela kgwerano ya gago le bao ba go ratago gape ba phethago ditaelo tša gago.

⁶ Ntebelele, Morena, gomme o theeletše thapelo ya ka ge ke rapelela bahlanka ba gago, Baisraele, bošego le mosegare. Ke ipolela gore rena setšhaba sa Israele re dirile dibe. Le nna le bešo re dirile dibe.

⁷ Re go phošeditše kudu, gomme ga se ra phetha melao le ditaelo tše o re filego tšona ka Moshe, mohlanka wa gago.

⁸ Bjale gopola se o kilego wa se botša Moshe wa re: ‘Ge lena setšhaba sa Israele le sa mpotegele ke tla le gašanya le ditšhaba.

⁹ Eupša ge le ka sokologela go nna gomme la dira tše ke le laetšego tšona, ke tla le kgoboketša ka le bušetša moo ke go kgethilego gore ke khunamelwe gona, le ge le gašane go fihla mafelelong a lefase.’

¹⁰ “Morena, ba ke bahlanka ba gago, ke setšhaba sa gago se o se hlakodišitšego ka maatla a gago a magolo le bonatla.

¹¹ Hle, nke o theeletše thapelo ya ka le dithapelo tša bahlanka ba gago bohle bao ba ratago go go boifa. Nke o nkatle lehono gomme o dire gore kgoši e be yo botho go nna.” Mehleng yeo ke be ke le wa go fa kgoši beine.