Nahume 1 - BIBELE Taba yea Botse

¹ Wo ke molaetša wa Modimo mabapi le Ninibe; ke lengwalo la pono ya Nahume wa go tšwa Elkoshe.

Morena o galefela Ninibe

² Modimo ga a kgotlelele baphegišananaye; Morena ke Molefetši, o lefetša a galefile; o itefetša ka dira tša gagwe; o swara manaba a gagwe ka pelo.

³ Morena o diega go galefa, eupša maatla a gagwe ke a magolo, gomme ga a lese go otla wa molato. Mo go sepelago Morena go tsoga disesedi le madimo, maru ke lerole la nao tša gagwe.

⁴ O kgalema lewatle a le pšheša. Dinoka di gopišwa ke yena. Mašemo a Bashane le thaba ya Karmele di a oma, gwa pona le maloba a Lebanone.

⁵ Dithaba di šikinyega pele ga Morena, le meboto e a gologa. Morena a tšwelela, lefase le a thothomela, la roromela le badudi bohle ba lona.

⁶ Ge a befetšwe, ke mang a ka lwago naye? Ke mang yo a ka kgotlelelago kgalefo ya gagwe ye šoro? O laumiša bogale bja gagwe boka kgabo; maswika a pšhatlagana pele ga gagwe.

⁷ Morena ke yo botho; ke setšhabelo mohla wa mathata; o hlokomela ba ba tšhabelago go yena.

⁸ O bolaya manaba a gagwe bjalo ka lefula le le gogolago tšohle; ba ba mo lwantšhago o a ba feleletša.

⁹ Tše le lakanago Morena ka tšona o tla di phuhlamiša. Motho a ka se boeletše go phegiša Morena.

¹⁰ Le tla tšhungwa bjalo ka meetlwa ye e kgakganego, goba hlaga!

¹¹ Go wena, Ninibe, go tšwile ramaanomabe yo a rerago go lwa le Morena.

¹² Morena o re go setšhaba sa gagwe: “Le ge Baasiria ba tiile kudu mme ba atile, ba tla fedišwa ba timelela. Lena, setšhaba sa ka, ke le hlokofaditše, fela nka se sa boeletša.

¹³ Bjale ke yo fediša go bušwa ke Baasiria ga lena, ka kgaola ditlemo tše di le tlemilego.”

¹⁴ Mabapi le lena, Baasiria, Morena o begile a re: “Le ka se be le ditlogolo tša go tšwetša leina la lena pele. Ke tla fediša diswantšhobetlwa le diswantšhobopša tše di lego ka tempeleng ya medimo ya lena. Ke tla le epela lebitla, gobane ga le na mohola!”