Mateu 3 - BIBELE Taba yea Botse

Go ruta ga Johanese Mokolobetši

¹ Mehleng yeo Johanese Mokolobetši o ile a yo ruta lešokeng la Judea

² a re: “Sokologang, gobane mmušo wa Modimo o batametše!”

³ Ke yena yo moprofeta Jesaya a boletšego ka yena a re: “Segoeledi lešokeng se re: ‘Phulelang Morena tsela; mo otlolleleng mebila!’ ”

⁴ Johanese yo o be a apara seaparo sa boya bja kamela; a itlema letheka ka lepanta la mokgopha, gomme dijo tša gagwe e le ditšie le todi ya dinose.

⁵ Batho ba be ba etla go yena ba etšwa Jerusalema, le seleteng ka moka sa Judea, le nageng yohle ya kgauswi le noka ya Jordane.

⁶ Ba be ba ipolela dibe mme yena a ba kolobetša ka nokeng ya Jordane.

⁷ Ge a bona Bafarisei le Basadusei ba bantši ba etla go yena gore ba kolobetšwe, a re go bona: “Dinoga tenang, ke mang yo a le boditšego a re le ka phepha kotlo ye Modimo a lego kgauswi le go otla bakgopo ka yona?

⁸ Go kaone le dire tše di tlago laetša gore le sokologile.

⁹ Le se ke la gopola gore le tla phepha kotlo ka ge Abrahama e le rakgolokhukhu wa lena. Gobane ke le botša gore Modimo a ka fetoša maswika a ditlogolo tša Abrahama!

¹⁰ Selepe se šetše se loketše go rema mehlare medung; mohlare wo mongwe le wo mongwe wo o sa enywego dienywa tše dibotse o tla rengwa wa lahlelwa mollong.

¹¹ Nna ke le kolobetša ka meetse ka ge le sokologile, eupša yo a tlago ntlhatlama o tla le kolobetša ka Moya wo Mokgethwa le ka mollo. O mpheta ka maatla, gomme ga se ka swanela le go mo swarela dieta.

¹² O swere leselo ka seatla, gomme o tla fefera mabele gabotse. O tla a tšhela ka letlolong, mooko wona a o tšhuma ka mollo wo o sa timego.”

Go kolobetšwa ga Jesu

¹³ Mehleng yeo Jesu a ya go Johanese nokeng ya Jordane a etšwa Galilea gore a kolobetšwe ke yena.

¹⁴ Eupša yena a gana a re: “Ke nna ke swanetšego go kolobetšwa ke wena, bjale o reng o etla go nna?”

¹⁵ Jesu a mo fetola a re: “Ga bjale a go no ba ka mokgwa wo, gobane ke tshwanelo gore re phethe thato ya Modimo.” Ka gona Johanese a dumela go mo kolobetša.

¹⁶ Jesu ge a seno kolobetšwa, a tšwa ka meetseng. Legodimo la mmulegela, gomme a bona Moya wa Modimo o le ka sebopego sa leeba o theoga o dula godimo ga gagwe.

¹⁷ Gwa napa gwa kwagala lentšu le etšwa legodimong le re: “Yo ke yena Morwa wa ka yo ke mo ratago; o nkgahla kudu.”