Mateu 2 - BIBELE Taba yea Botse

Boradinaledi ba ba tšwago bohlabela

¹ E rile ge Jesu a tswetšwe motseng wa Betlelehema, nageng ya Judea, mehleng ya Kgoši Heroda, boradinaledi ba bangwe ba tla Jerusalema ba etšwa bohlabela,

² ba fihla ba botšiša ba re: “E kae kgoši ya Bajuda ye e sa tšogo tswalwa? Re bone naledi ya gagwe e rotoga ka bohlabela, gomme re tlile go mo khunamela.”

³ Ge Kgoši Heroda a ekwa taba yeo, a ferekana gotee le batho ka moka ba motse wa Jerusalema.

⁴ A kgobokanya baprista ba bagolo ka moka le boramangwalo, gomme a ba botšiša a re: “Mesia o tla belegwa kae?”

⁵ Bona ba mo fetola ba re: “O tla belegwa motseng wa Betlelehema, nageng ya Judea, ka gobane moprofeta o ngwadile a re:

⁶ “ ‘Wena Betlelehema wa naga ya Juda, ruri o yo mongwe wa metse ye bohlokwa ya Juda; gobane go wena go tla tšwa moetapele yo a tlago diša setšhaba sa ka sa Israele.’ ”

⁷ Ka gona Heroda a biletša boradinaledi bale sephiring, a ba botšiša nako ya nnete yeo naledi e bonagetšego ka yona.

⁸ Ka morago a ba roma Betlelehema a ba laela a re: “Sepelang le yo nyakišiša moo ngwana yoo a lego gona, gomme ge le mo hweditše le tle le ntsebiše gore le nna ke yo mo khunamela.”

^9-10 Ge ba seno kwa tša kgoši ba tloga, gomme ba bona naledi yela ba e bonego ka bohlabela. Ba rile ge ba e bona ba thaba kudukudu. Ya ba eta pele ya ba ya yo ema ka godimo ga moo ngwana a bego a le gona.

¹¹ Ba tsena ka ngwakong, gomme ge ba bona ngwana le Maria, mmagwe, ba wa ka matolo ba mo khunamela. Ba phutholla mekotlana ya bona ba mo ntšhetša dimpho tše: gauta le seorelo le mira.

¹² Ka morago ba boela nageng ya gabobona ka tsela ye nngwe, ka ge Modimo a be a ba boditše torong gore ba se ke ba boela go Heroda.

Josefa le Maria ba tšhabela Egepeta

¹³ Ge ba tlogile, morongwa wa Morena a tšwelela go Josefa torong, a re: “Tsoga, o tšee ngwana le mmagwe o tšhabele Egepeta, o dule gona go fihlela ke go botša gore o tloge, ka gobane Heroda o tlilo nyaka ngwana yo gore a mmolaye.”

¹⁴ Josefa a tsoga, a tšea ngwana le mmagwe, a tloga e le bošego a leba Egepeta;

¹⁵ a dula gona go fihlela Heroda a ehwa, gore go tle go phethege se se boletšwego ke Morena ka moprofeta mola a re: “Ke biditše morwa wa ka Egepeta.”

Go bolawa ga bana

¹⁶ Ge Heroda a seno lemoga gore boradinaledi bale ba mo forile, a tuka bogale. A laela gore bašemanyana ka moka ba Betlelehema le tikologong ya gona ba mengwaga ye mebedi goba ka fase ga fao ba bolawe, a lekanya ka nako yela a bego a botšišitše boradinaledi gore naledi e bonagetše neng.

¹⁷ Gwa napa gwa phethega se se boletšwego ke moprofeta Jeremia mola a re:

¹⁸ “Kua Rama go kwagala mebokolelo le go golola le sello sa masetlapelo. Ragele o llela bana ba gagwe; o gana go homotšwa, ka gobane ga ba sa le gona.”

Josefa, Maria le Jesu ba boela nageng ya Israele

¹⁹ Ya re ge Heroda a hwile, morongwa wa Morena a tšwelela go Josefa torong kua Egepeta,

²⁰ a re: “Tsoga, o tšee ngwana le mmagwe, o boele nageng ya Israele, ka gobane bale ba bego ba nyaka go bolaya ngwana ba hwile.”

²¹ Josefa a tsoga, a tšea ngwana le mmagwe, a boela nageng ya Israele.

²² Eupša ge a ekwa gore Argelaose o buša naga ya Judea legatong la Heroda, tatagwe, a boifa go ya gona. Ge a seno laelwa ke Modimo ka toro, a ya nageng ya Galilea,

²³ gomme a aga motseng wo o bitšwago Nasaretha. Gwa napa gwa phethega se se boletšwego ke baprofeta mola ba re: “O tla bitšwa Monasaretha.”