Mateu 17 - BIBELE Taba yea Botse

Jesu o fetoga sebopego

¹ Ka morago ga matšatši a a selelago Jesu a tloga le Petrose le Jakobose le Johanese, ngwanabo, a ba iša thabeng ye telele, mme fao ba ba noši.

² A fetoga sebopego pele ga bona: sefahlego sa gagwe sa taga bjalo ka letšatši, le diaparo tša gagwe tša šweufala tša re twaa!

³ Ke moka ba bona Moshe le Eliya ba bolela le Jesu.

⁴ Ya ba Petrose o re go Jesu: “Morena, ke mo gobotse bjang ge re le mo! Ge o nyaka, nka aga mešaša ye meraro fa – wo mongwe ya ba wa gago, wo mongwe ya ba wa Moshe, mme wo mongwe ya ba wa Eliya.”

⁵ Ya re a sa bolela, leru le le tagago la ba pipetša, mme lentšu la kwagala le etšwa lerung leo la re: “Yo ke yena Morwa wa ka yo ke mo ratago, o nkgahla kudu; le mo theeletšeng!”

⁶ Ge barutiwa bale ba ekwa lentšu leo ba tšhoga kudu mo ba ilego ba ba ba itahlela fase ka difahlego.

⁷ Jesu a tla go bona, a ba kgwatha a re: “Tsogang, le se ke la boifa!”

⁸ Ge ba lebelela ba se bone motho, ge e se Jesu fela.

⁹ Ya re ge ba theoga moo thabeng Jesu a ba laya a re: “Le se ke la botša motho ka pono ye le e bonego, go fihlela Morwamotho a tsošwa bahung.”

¹⁰ Ke moo barutiwa bale ba botšišitšego Jesu ba re: “Na ke ka lebaka lang boramangwalo ba re pele go swanetše go tla Eliya?”

¹¹ Jesu a ba fetola a re: “Ee, Eliya o tla tla mme a bušetša dilo sekeng sa tšona.

¹² Eupša nna ke le botša gore Eliya o be a tlile, fela batho ba se ke ba mo tseba, eupša ba mo swara ka moo ba ratago ka gona. Morwamotho le yena ba tla mo tlaiša ka yona tsela yeo.”

¹³ Ke mo barutiwa ba lemogilego gore o ra Johanese Mokolobetši.

Jesu o leleka modemone mošemaneng

¹⁴ Ge ba seno boela lešabeng, monna yo mongwe a tla go Jesu, a khunama pele ga gagwe

¹⁵ a re: “Morena, hle, šokela morwa wa ka! O swerwe ke bolwetši bja go wa, mme bo mo tsogela kudu mo e lego gore gantši o wela mollong goba ka meetseng.

¹⁶ Ke ile ka mo iša go barutiwa ba gago, eupša ba palelwa ke go mo fodiša.”

¹⁷ Jesu a mo fetola a re: “Aowii, lena moloko wa go hloka tumelo, wo mokgopo! Ke se le felele pelo go fihlela neng? Ke le kgotlele go iša kae? Tlišang mošemane yoo mo.”

¹⁸ Jesu a kgalema modemone yoo, wa tšwa mošemaneng, mme mošemane a fola ka yona nako yeo.

¹⁹ Ke moka barutiwa ba tla go Jesu ba nnoši, ba mmotšiša ba re: “Ke ka lebaka lang rena re šitilwe ke go leleka modemone yola?”

²⁰ Jesu a ba fetola a re: “Ke ka gobane le hlaela tumelo. Ruri, ke le botša gore ge le ka be le na le tumelo ye e lekanago le thorwana ya mphogo, le be le ka botša thaba ye la re: ‘Tloga mo o ye mola!’ gomme ya ya. Le be le ka se šitwe ke selo.”

Jesu o bolela gape ka lehu la gagwe

²² Ge barutiwa ba le mmogo nageng ya Galilea, Jesu a re go bona: “Morwamotho o kgauswi le go gafelwa diatleng tša batho

²³ bao ba tlago mmolaya; eupša ka letšatši la boraro o tla tsošwa bahung.” Barutiwa ba nyama kudu.

Go tšhela motšhelo wa Tempele

²⁴ Ge Jesu le barutiwa ba gagwe ba fihla Kapernaume, batšhediši ba motšhelo wa Tempele ba tla go Petrose ba mmotšiša ba re: “Afa moruti wa lena o tšhela motšhelo wa Tempele?”

²⁵ Petrose a ba fetola a re: “Ee, o a o tšhela.” Ge a tsena ka ngwakong, Jesu a bolela pele Petrose a ka bolela a re: “Simone, na taba ye wena o e bona bjang? Na magoši a lefase a tšhediša bafe metšhelo le makgetho – badudi ba naga, goba bafaladi?”

²⁶ Petrose a mo fetola a re: “A tšhediša bafaladi.” Jesu a re go yena: “Gona seo se šupa gore badudi ba naga ga ba swanela go tšhela motšhelo.

²⁷ Fela ga re nyake go kgopiša batho ba. Ka gona eya letsheng o fihle o lahlele kgwega ka go lona. Hlapi ya mathomo ye o tlago e tanya o e ntšhe o e ahlamiše, gomme ka molomong wa yona o tla hwetša papetlana ya tšhelete ye e lekanego motšhelo wa ka le wa gago wa Tempele. O tšee tšhelete yeo o ba fe yona.”