Kutollo 10 - BIBELE Taba yea Botse

Morongwa yo a swerego lengwalwana

¹ Ka morago ka bona yo mongwe morongwa wa senatla a theoga legodimong a apere leru, a na le molalatladi hlogong; sefahlego sa gagwe nke ke letšatši, mme maoto ona nke dikokwane tša mollo.

² Ka seatleng o be a swere lengwalwana le le phutholotšwego. O be a gatile lewatle ka leoto la go ja, ka la mmangele a gatile lefase,

³ gomme a goelela ka lentšu le legolo le nkego ke la tau e rora. Ge a goelela bjalo, dituduma tše di šupago tša mo araba ka go kidimetša.

⁴ E rile ge dituduma tšeo di seno bolela, ka re ke sa re ke ngwala tše di bolelwago, ka kwa lentšu le etšwa legodimong le re: “Tše di boletšwego ke dituduma tše di šupago tšeo e be sephiri, o se di ngwale!”

⁵ Morongwa yola ka go mmona a gatile lewatle le lefase a emišetša seatla sa gagwe sa la go ja legodimong,

⁶ a ikana ka yena Mophelelasaruri yo a hlodilego legodimo le lefase le lewatle le tšohle tše di lego mo go tšona, a re: “Tiego ga e sa tlo ba gona!

⁷ Se se tlago ba gona ke gore mohla morongwa wa bošupa a letša phala Modimo o tla phethagatša sephiri sa gagwe, bjalo ka ge a begetše bahlanka ba gagwe, baprofeta.”

⁸ Lentšu lela ka go le kwa le etšwa legodimong la bolela le nna gape la re: “Eya o tšee lengwalwana lela la go bulwa le lego ka seatleng sa morongwa yola a gatilego lewatle le lefase.”

⁹ Ka ya go morongwa yoo ka re a mphe lengwalwana leo. Yena a re go nna: “Le tšee o le je; le tla ba bose bjalo ka todi ka ganong, fela ka mpeng le tla galaka.”

¹⁰ Ka tšea lengwalwana leo ka seatleng sa gagwe ka le ja, gomme la ba bose bjalo ka todi ka ganong. Fela ka re go le metša la ntomiša mala.

¹¹ Ke ge ke botšwa gwa thwe: “Eya o boeletše o porofete ka ga ditšhaba le merafe le maleme le dikgoši.”