Jobo 4 - BIBELE Taba yea Botse

Poledišano ya mathomo (Jobo 4:1 – 14:22)

¹ Ke mo Elifase wa go tšwa Temane a fetotšego Jobo a re:

² “Kgane o ka selekega ge nka boledišana le wena? Fela ga ke sa kgona go homola.

³ O be o ruta batho ba bantši, o tiiša ba ba nolegilego moko.

⁴ Ba ba lego mathateng o be o ba kgothatša; ba ba lapilego o ba lapološa.

⁵ Bjale ge mathata a wela wena, o felelwa ke tshepo, o a gakanega.

⁶ Ga ke re go boifa Modimo wa gago ke sona se o se botilego, le go hloka bosodi ga gago ke sona se o se tshepilego?

⁷ Nke o gopodišiše mo: Na o gona mohlokabosodi goba moloki yo a kilego a fedišwa?

⁸ Nna se ke se tsebago ke gore bomolemabobe ba go bjala le mathata ba buna tšona tšeo.

⁹ Bona bao Modimo o ba bolaya a befetšwe, a ba fediša a ba galefetše.

¹⁰ Bakgopo bao ba a bopa, ba rora boka ditau; eupša Modimo o homotša tawana tšeo, o di kgola meno.

¹¹ Ba hwa bjalo ka tau tše di hlokago sa go ja, bana ba bona ba gašagana.

¹² “Nkile ka sebelwa taba ka tsebeng.

¹³ Ya ntlhoba boroko bjalo ka segateledi, mola batho ba robetše bja matlogadibešong.

¹⁴ Ka thothomela ka letšhogo, mmele wohle wa ka wa roromela.

¹⁵ Phefšana ye tshesane ya mphorola sefahlego; ka kgaoga letswalo, moriri wa ba wa tširoga.

¹⁶ Ka bona selotsoko se eme pele ga ka, fela ke sa se hlathe. Ge go rile tuu, ka kwa lentšu le re:

¹⁷ ‘Kgane motho wa nama e ka ba moloki pele ga Modimo, goba a hloka bosodi pele ga Mmopi wa gagwe?

¹⁸ Gape le batseta ba gagwe ba legodimong yena ga a ba tshepe; ee, le mo go barongwa o hwetša ba bosodi.

¹⁹ Bjale a ka napa a tshepa ba ba dulago ka dintlong tša mobu, dibopiwa tša letsopa, bona ba ba pitleletšegago bjalo ka tšhwele?

²⁰ Motho le mo hlabela a phela, la dikela a hwile. O timelela sa ruri go se yo a lemogago.

²¹ O loba tšohle tše a nago le tšona, a hwe a se na bohlale.’ ”