Jobo 3 - BIBELE Taba yea Botse

Jobo o llela go Modimo

¹ Ka morago ga moo Jobo a thoma go bolela, a rogaka letšatši le a tswetšwego ka lona

² a re:

³ “A letšatši le ke tswetšwego ka lona le timelele, le bjona bošego bjo ke imilwego ka bjona!

⁴ Letšatši leo a e be leswiswi, Modimo wa magodimong a se sa le šetša, le seedi se se ke sa le hlabela.

⁵ A le tšewe ke leswiswi le lesoleso; le khupetšwe ke maru a maso, le aparelwe le ke phifalo ya letšatši.

⁶ Bošego bjoo a bo tlošwe ke leswiswi, gomme bo se sa balwa le matšatši a ngwaga; bo se ke bja hwetšwa dikgweding tša ngwaga.

⁷ Ee, ka bjona a go se tswalwe ngwana, go se ke gwa kwagala mekgolokwane.

⁸ Tšatši leo a le rogakwe ke barogakamatšatši ba ba kgonago go hlohleletša Lebiathane.

⁹ Bošego bjoo a bo fifalelwe ke naledi tša masa, bo letele letšatši ge le hlaba eupša le se hlabe; a bo se ke bja hlabelwa ke mahwibi,

¹⁰ ka ge bo ntesitše ke tswalwa, mme bo ntsentše mathateng.

¹¹ “Ke reng ke se ka ikhwela ge ke tswalwa, ka hema la mafelelo ge ke belegwa?

¹² Mma o be a mpharelang difarong? O be a nnyantšhetšang letswele?

¹³ Ge nkabe ke ikhwetše ka nako yeo, nkabe ke robetše ke iketlile, ke ithobaletše ka khutšo

¹⁴ le magoši le bakgomana ba ba ilego ba tsošološa marope.

¹⁵ Nkabe ke ithobaletše le babuši ba ba bego ba na le gauta, ba tladitše dintlo tša bona silibera.

¹⁶ Ke be ke reng ke sa be bjalo ka sefolotšana se se bolokwago ka lephakuphaku, ka ba bjalo ka lesea le le sa kago la bona seedi?

¹⁷ Gape ka lebitleng bakgopo ga ba sa dira tše mpe, le ba ba feletšwego ke maatla ba khutša gona.

¹⁸ Ešita le dibofša moo di a iketla, ga go na le yo a di gapeletšago go šoma.

¹⁹ Ke mo go dulago batho ka moka, ba bagolo le ba banyenyane; le makgoba ke moo a lokologago gona.

²⁰ “Batho ba phedišetšwang mahlomoleng? Seetša se reng se fiwa ba ba nyamilego?

²¹ Ba duma lehu, fela ga le ba tlele; ba le nyaka go feta lehumo le le fihlilwego.

²² Ba ka thaba ba hlalala ge ba ka be ba ka bolokwa.

²³ Ke go reng seetša se fiwa motho yo a se sa dumago go phela, motho yo Modimo a mo thibetšego tsela tšohle?

²⁴ Bakeng sa go ja ke a lla, metsetlo ya ka ga e fele, e bjalo ka meetse a a elago.

²⁵ Tše ke di boifago ke tšona tše di ntlhagelago; tše ke di tšhabago di a ntlela.

²⁶ Ga ke na boiketlo, ga ke na khutšo, le poifo ga e ntlogele.”