Genese 50 - BIBELE Taba yea Botse

¹ Josefa a itahlela go tatagwe, a lla, a mo atla sefahlego.

² Ka morago a laela bahlanka ba gagwe ba dingaka gore ba omeletše setopo sa tatagwe.

³ Komeletšo yeo e ile ya tšea matšatši a masome a mane, gobane go omeletša setopo go tšea matšatši a makaalo. Ka morago Baegepeta ba mo ilela matšatši a masome a a šupago.

⁴ Ge nako ya go mo ilela e fetile, Josefa a re go bakgomana ba kgoši: “Hle, mpoleleng le kgoši le re:

⁵ ‘Ge tate a batametše go hwa, o ile a nkeniša gore ke mmoloke lebitleng leo a ipetletšego lona kua Kanana. Ka gona hle, ntumelele ke sepele ke yo boloka tate, gomme ka morago ga moo ke tla boa.’ ”

⁶ Kgoši ya fetola ya re: “Sepela o yo boloka tatago, bjalo ka ge o enne.”

⁷ Ka gona Josefa a ya go boloka tatagwe. Bahlankedi ba kgoši ka moka, le bakgomana ba bagolo ba kgoro ya gagwe, le baetapele ka moka ba Egepeta ba ya le Josefa.

⁸ Lapa la gagwe ka moka, le bomorwarragwe, le lapa la tatagwe ba ya naye. Seleteng sa Goshene go ile gwa šala fela bana ba bona ba bannyane le dihuswane le dikgomo.

⁹ Banna ba makoloi le ba ba nametšego dipere ba ya le yena; ya ba sehlopha se segolo kudu.

¹⁰ Ge ba fihla seboeng kua Atade, ka bohlabela bja noka ya Jordane, ba tsoša sello se segolo, gomme Josefa a dira ditlhobogo matšatši a a šupago.

¹¹ Ge badudi ba Kanana ba bona batho bao ba lla kua Atade, ba ile ba re: “Sello sa Baegepeta ke se segolo bjang!” Ke ka lebaka leo felo fao go ilego gwa rewa leina la Abele-Mitsraime. Lefelo leo le ka bohlabela bja Jordane.

¹² Ka gona barwa ba Jakobo ba ile ba dira ka moo a bego a ba laetše ka gona;

¹³ ba mo iša Kanana, gomme ba mmoloka ka leweng tšhemong ye e lego Makapela, ka bohlabela bja Mamre, yeo Abrahama a bego a e rekile go Efrone, Mohete, gore e be serapa sa go bolokela bahu.

¹⁴ Ge Josefa a bolokile tatagwe, a boela Egepeta le bomorwarragwe le bohle bao ba bego ba ile polokong le yena.

Josefa o bea bomorwarragwe pelo gape

¹⁵ Ge bomorwarragoJosefa ba bona gore tatagobona o hlokafetše ba ile ba re: “Re tla dira eng ge eba Josefa o sa re swere ka pelo, gomme o ikemišeditše go itefeletša bobe ka moka bjo re mo dirilego bjona?”

¹⁶ Ka gona ba romela molaetša go Josefa ba re: “Pele ga ge tatagorena a hlokafala

¹⁷ o boletše gore re go botše re re: ‘Hle, o lebalele bomorwarrago molato wa bona ka ge ba ile ba go dira gampe.’ Bjale hle, re lebalele phošo ye re e dirilego, rena bahlanka ba Modimo wa tatago.” Josefa a lla ge a botšwa molaetša wo.

¹⁸ Ke moka bomorwarragwe le bona ba tla ba itahlela fase pele ga gagwe ba re: “Ke rena ba, re makgoba a gago.”

¹⁹ Eupša Josefa a re go bona: “Le se ke la boifa; nka se ipee maemong a Modimo.

²⁰ Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši.

²¹ Le se ke la boifa selo. Ke tla le hlokomela, lena le bana ba lena.” Ka gona a ba kgothatša a ba bea pelo.

Lehu la Josefa

²² Josefa o ile a fela a phela Egepeta le ba lapa la tatagwe; o be a na le mengwaga ye lekgolo le ye lesome ge a ehwa.

²³ O ile a phela, a ba a bona bana ba Efraime le bana ba bona. A amogela bana ba Makire, morwa wa Manase, ya ba ba gagwe.

²⁴ A re go bomorwarragwe: “Ke kgauswi le go hwa, eupša Modimo o tla le hlokomela, a le ntšha mo nageng ye a le iša go ye a enetšego Abrahama le Isaka le Jakobo a re o tla ba fa yona.”

²⁵ Ke moo Josefa a enišitšego barwa ba Jakobo a re: “Nkeneleng gore ge Modimo a le iša nageng yeo, le tla sepela le mašapo a ka.”

²⁶ Ka gona Josefa a hlokafala a na le mengwaga ye lekgolo le ye lesome. Ba omeletša setopo sa gagwe Egepeta, gomme ba se bea ka lepokising.