Esera 1 - BIBELE Taba yea Botse

Korese o laela Bajuda gore ba boele gae

¹ Ka ngwaga wa pele wa ge Korese wa Persia e le kgoši, Morena o ile a phetha se a bego a se boletše ka moprofeta Jeremia. A tutuetša Korese gore a begele batho ba mmušo wa gagwe ka moka le ka mangwalo a re:

² “Kgoši Korese wa Persia o a bega o re: ‘Morena, Modimo wa legodimo, o mpeile mmuši wa lefase ka moka gomme o ntaetše gore ke mo agele tempele kua Jerusalema, nageng ya Juda.

³ A Modimo a be le lena bohle ba le lego setšhaba sa gagwe. Le swanetše go ya Jerusalema gomme le tsošološe Tempele ya Morena Modimo wa Israele, Modimo yo a khunamelwago Jerusalema.

⁴ Mašaledi ka moka a setšhaba sa gagwe, mo gongwe le mo gongwe mo a falaletšego gona, a thušwe ke batho ba ba dulago le ona ka silibera le gauta, mefago le diruiwa, gotee le dikabelo tša boithaopo tša Tempele ya Modimo kua Jerusalema.’ ”

⁵ Ke moo mantona a dikgorwana tša kgoro ya Juda le ya Benjamene, baprista le Balefi, le yo mongwe le yo mongwe yoo Modimo a bego a mo tutueditše, a ilego a itokišetša go yo aga Tempele ya Morena Jerusalema.

⁶ Batho ka moka ba ba bego ba dula kgauswi le bona ba ba tiiša maatla ka go ba fa dibjana tša silibera, gauta, mefago, diruiwa, dilo tše dingwe tše bohlokwa, le dikabelo tša Tempele.

⁷ Korese a ba neela dibjana tšela Kgoši Nebukadnesare a bego a di tšere ka Tempeleng kua Jerusalema a di beile ka tempeleng ya medimo ya gagwe.

⁸ A di nea Mitredate, ramatlotlo wa mošate, yo a ilego a ngwala lenaneo la tšona, gomme a le neela Sheshbatsare, mmušiši wa naga ya Juda.

^9-10 Dilo tšeo šedi: meruswi ya dihlabelo ya gauta 30 meruswi ya dihlabelo ya silibera 1 000 meruswi ye mengwe 29 meruswana ya gauta 30 meruswana ya silibera 410 dibjana tše dingwe 1 000

¹¹ Dibjana ka moka tša gauta le tša silibera tšeo Sheshbatsare a ilego a di tšea ge a tloga Babilone le mathopša a mangwe ba eya Jerusalema e be e le 5 400.