Eksodose 9 - BIBELE Taba yea Botse

Diruiwa di a hwa

¹ Morena a re go Moshe: “Yaa go kgoši o e botše gore Morena, Modimo wa Baheberu, o re: ‘Lesa setšhaba sa ka se sepele, gore se yo nkhunamela.

² Ge o gana go ba lesa ba sepela, o fela o ba swareletše,

³ ke tla otla diruiwa tša gago ka moka ka bolwetši bjo bošoro: dipere, dipokolo, dikamela, dikgomo le dihuswane tša gago.

⁴ Nka se sware diruiwa tša Baisraele le tša Baegepeta go swana, mme le se tee seruiwa sa Baisraele se ka se hwe.

⁵ Nna, Morena, ke beile letšatši la ka moswane gore e be la go phethagatša taba ye.’ ”

⁶ Ka la ka moswane Morena a dira ka moo a bego a boletše, mme diruiwa ka moka tša Baegepeta tša hwa, eupša mo go tša Baisraele gwa se hwe le e tee.

⁷ Kgoši ya botšiša ka seo se diregilego, mme ya botšwa gore ga go na le seruiwa se tee sa Baisraele se se hwilego. Eupša a fela a retetše pelo, a gana go lesa setšhaba se sepela.

Dišo

⁸ Morena a re go Moshe le Arone: “Gamarang magoswi a mošidi leubelong, gomme Moshe a o gaše moyeng pele ga kgoši.

⁹ Mošidi o tla tšitlana le naga ya Egepeta bjalo ka lerole, gomme nageng ka moka wa ntšha batho le diphoofolo dišo tše di pherilego.”

¹⁰ Ka gona ba gamara mošidi, ba ya ba ema pele ga kgoši. Moshe a gaša mošidi moyeng, gomme mošidi wa tšitlana wa tšama o ntšha batho le diphoofolo dišo tše di pherago.

¹¹ Boramaselamose ba šitwa go tšea kgang le Moshe ka ge le bona ba be ba tšwile dišo bjalo ka Baegepeta ka moka.

¹² Fela Morena a thatafatša pelo ya kgoši, gomme kgoši a se ke a theeletša Moshe le Arone, bjalo ka ge Morena a boditše Moshe.

Sefako

¹³ Morena a re go Moshe: “Ka la ka moswane goseng o ye o eme pele ga kgoši, o mmotše gore nna, Morena, Modimo wa Baheberu, ke re: ‘Lesa setšhaba sa ka se sepele, gore se yo nkhunamela.

¹⁴ Lehono nka se otle bakgomana ba gago le setšhaba sa gago fela, ke tla itia le wena hlogo, gore o tle o tsebe gore ga go yo a swanago le nna lefaseng ka moka.

¹⁵ Bjale mola ke be ke ile ka emišetša letsogo la ka go otla wena le setšhaba sa gago ka bolwetši, nkabe ke go feleleditše sa ruri.

¹⁶ Fela ke go lesitše wa phela gore ke tle ke go bontšhe maatla a ka, le gore leina la ka le tle le tsebege lefaseng ka moka.

¹⁷ Eupša wena o sa ikgogomoša, o gana go lesa setšhaba sa ka sa sepela.

¹⁸ Ka la ka moswane ka yona nako ye ke tla neša sefako se se šiišago, seo Egepeta e sa lego e eba gona se sego sa ka sa na.

¹⁹ Bjale ntšha taelo ya gore diruiwa tša gago le tšohle tše di lego kua nageng di šireletšwe. Sefako se tla rothotha batho le diphoofolo tše di sego tša šireletšwa nageng, tša hwa ka moka.’ ”

²⁰ Bakgomana ba bangwe ba kgoši ge ba ekwa taba ye ya Morena ba ile ba boifa, ba tliša makgoba a bona le diruiwa tša bona, ba di tšhabišetša ka mantlong mo go šireletšegilego.

²¹ Ba bangwe bona ba se ke ba šetša tshebotšo ya Morena, ba tlogela makgoba a bona le diruiwa tša bona kgakala.

²² Ke moka Morena a re go Moshe: “Emišetša letsogo la gago leratadimeng, ke gona sefako se tlago na nageng ka moka ya Egepeta; se tla rothotha batho, diphoofolo le dibjalo ka moka mašemong.”

²³ Ka gona Moshe a emišetša lepara la gagwe leratadimeng – Morena a romela ledumaedi le sefako, tladi ya ratha fase. Morena a theoša

²⁴ sefako se se šiišago, le dikgadima tša thalaganya. E bile ledimo le le šiišago le Egepeta e sa lego e eba gona e sego ya ka ya le bona.

²⁵ Nageng ka moka ya Egepeta sefako sa rothotha se sengwe le se sengwe se se bego se le kgakala, batho le diphoofolo ka moka. Sa rothotha dibjalo ka moka mašemong, sa roba mehlare ka moka.

²⁶ Selete sa Goshene sona, moo go bego go dula Baisraele, e bile sona se nnoši moo sefako se ilego sa se ne.

²⁷ Kgoši a bitša Moshe le Arone, a re go bona: “Lehono gona ke sentše; Morena ga a na phošo, ba ba nago le phošo ke nna le setšhaba sa ka.

²⁸ Rapelang Morena; ge e le ledumaedi le sefako tšona re di bone go lekane. Ke tla le lesa le sepele; ga le a swanela go hlwa le dutše le rena mo.”

²⁹ Moshe a re go yena: “Ge ke seno tšwa mo motseng wo, ke tla emiša diatla ka rapela Morena. Dikgadima di tla homola, le sefako se tla kgaotša; ke moo o tlago lemoga gore lefase ke la Morena.

³⁰ Fela ke a tseba gore wena le bakgomana ba gago ga se la tšwe le boifa Morena Modimo.”

³¹ Leokodi le garase di ile tša rothothelwa fase, gobane garase e be ya butšwa gomme leokodi le khukhuša.

³² Ge e le korong yona e ile ya se ke ya senyega, ka gobane e butšwetša morago.

³³ Moshe a tloga go kgoši, a tšwa motseng, a napa a emiša diatla a rapela Morena. Dikgadima le sefako tša kgaotša, le pula ya khula.

³⁴ Ge kgoši e bona go khudile ya senya gapegape. A retela pelo, yena le bakgomana ba gagwe.

³⁵ Kgoši a thatafatša pelo, a gana go lesa Baisraele ba sepela, bjalo ka ge Morena a boletše ka Moshe.