Eksodose 25 - BIBELE Taba yea Botse

Dikabelo tša sekgethwa

¹ Morena a re go Moshe:

² “Botša Baisraele ba ntlišetše dikabelo. Le amogele dikabelo tšeo go motho yo mongwe le yo mongwe yo a ratago go ntlišetša tšona.

³ Šedi dikabelo tše le swanetšego go di tliša: gauta le silibera le mphiri;

⁴ mašela a boletiana; wulu ya botala bja legodimo le ya bohubedu bja moretele le ya bohubedu bja madi; lešela le le dirilwego ka boya bja dipudi;

⁵ matlalo a dikgapa a a tloditšwego ka letsoku; mekgopana e boletiana; dikota tša mogohlo;

⁶ makhura a go tukiša mabone; dinoko tša makhura a tlotšo le tša seorelo sa go nkga bose;

⁷ dikarneliene le magakabje a mangwe a go rokelelwa seaparong se sekgethwa sa Moprista yo Mogolo le phaphathianeng ya sehubeng sa gagwe.

⁸ A setšhaba se ntirele tente ye kgethwa, gore ke tle ke dule gare ga bona.

⁹ O dire tente le ditlabakelo tšohle tša yona go ya ka leano le ke tlago go laetša lona.”

Polokelo ya Kgwerano

¹⁰ “Botša batho ba betle polokelo ka dikota tša mogohlo, e be ya disentimetara tše 115 botelele, le bophara bja disentimetara tše 69, le bogodimo bja disentimetara tše 69.

¹¹ Polokelo o e manege ka ntle le ka gare ka gauta ye e sego ya tswakwa, mme o e direle morumo wa gauta go e dikologa.

¹² O dire mekgoko ye mene ya gauta, mme o e kgokelele maotwaneng a yona ka mane, mekgoko ye mebedi lehlakoreng le lengwe le lengwe.

¹³ O betle mapara a go rwala ka dikota tša mogohlo, mme le ona o a manege ka gauta,

¹⁴ o a tsenye mekgokong ya ka mahlakoreng a polokelo.

¹⁵ Mapara a dule a le mekgokong a se ke a ntšhwa.

¹⁶ Ke moka o lokele matlapa ka polokelong a ke tlago go fa ona, ao go ona go ngwadilwego melao.

¹⁷ “O dire sekhurumelo ka gauta ye e sego ya tswakwa, sa disentimetara tše 115 botelele le disentimetara tše 69 bophara.

¹⁸ O bope bakerubi ba babedi ka gauta ye e rutšwego.

¹⁹ Mokerubi o tee o mmee ka mafelelong a mangwe a sekhurumelo, yo mongwe o mmee ka mafelelong a mangwe a sona. O dire gore ba kgomagane le sekhurumelo.

²⁰ Bakerubi bao ba lebane ka difahlego go putla sekhurumelo, gomme diphego tša bona di phurologele godimo di pipetše sekhurumelo.

²¹ O lokele matlapa ao ka polokelong, gomme o e khurumele ka sekhurumelo.

²² Nna ke tla go gahlanetša moo polokelong ka go fa melao ya ka ka moka ye e amago Baisraele ke le godimo ga sekhurumelo, kgathe ga bakerubi bao ba babedi.”

Tafola ya go bea dinkgwa tše di abelwago Modimo

²³ “O betle tafola ka dikota tša mogohlo, e be ya botelele bja disentimetara tše 92, le bophara bja disentimetara tše 46, le bogodimo bja disentimetara tše 69.

²⁴ O e manege ka gauta ye e sego ya tswakwa, gomme o e direle morumo wa gauta go e dikologa.

²⁵ O dire lepanta la bophaphathi bja dimilimetara tše 75 go e dikologa, gomme o bee morumo wa gauta go dikologa lepanta leo.

²⁶ O e direle mekgoko ye mene ya gauta ya go e rwala, o e kgokelele dikhutlong ka dine maotwaneng.

²⁷ Mekgoko ya go swara mapara a go rwala tafola e kgokelelwe kgauswi le lepanta.

²⁸ O betle mapara a ka dikota tša mogohlo, gomme o a manege ka gauta.

²⁹ O dire meruswi, megopo, diphafana, le digo tša go tšhela dikabelo tša dino. Dibjana tše ka moka di dirwe ka gauta ye e sego ya tswakwa.

³⁰ Tafola e bewe pele ga Polokelo ya Kgwerano, gomme godimo ga tafola ka mehla go be le dinkgwa tše kgethwa tšeo di abetšwego nna.”

Sehlomamabone

³¹ “O dire sehlomamabone ka gauta ye e sego ya tswakwa. O dire bogato bja sona le thito ya sona ka gauta ye e rutšwego; matšoba a go se kgabiša gotee le matšoba a a sego a khukhuša le matlakala a ona e be selo se tee le bogato le thito.

³² Makabe a a selelago a tšwe ka mathoko a thito, a mararo ka thoko e tee.

³³ Lekabe le lengwe le le lengwe la ona ao a selelago le be le matšoba a mararo a go le kgabiša a sebopego sa letšoba la moalmone, le matšoba a a sego a khukhuša, le matlakala a ona.

³⁴ Thito ya sehlomamabone e be le matšoba a mane a go e kgabiša a sebopego sa letšoba la moalmone le matšoba a a sego a khukhuša le matlakala a ona.

³⁵ Go be le letšoba le le sego la khukhuša ka fase ga makabe a mangwe le a mangwe a mabedi.

³⁶ Matšoba a a sego a khukhuša le makabe le sehlomamabone e be selo se tee sa gauta ye e rutšwego ye e sego ya tswakwa.

³⁷ O dire mabone a a šupago a sehlomamabone, gomme o a hlome gore a bonegele pele.

³⁸ Ditlao tša sona le dibjana tša sona tša magala e be tša gauta ye e sego ya tswakwa.

³⁹ O diriše gauta ye e sego ya tswakwa ya boima bja dikilokramo tše masome a mararo go dira sehlomamabone le ditlabakelo tše ka moka.

⁴⁰ O hlokomele gore o di dire go ya ka leano le ke go laeditšego lona kua thabeng.”