Eksodose 21 - BIBELE Taba yea Botse

Ka mo makgoba a swanetšego go swarwa ka gona

¹ “Šedi ditaelo tše o swanetšego go di fa Baisraele:

² Ge o reka lekgoba le e lego Moheberu, le go hlankele nywaga ye e selelago. Ka ngwaga wa bošupa a lokollwe a sa lefe selo.

³ Ge a be a se a nyala ge a thoma go go hlankela, a se sepele le mosadi ge a tloga; eupša ge a be a nyetše ge a eba lekgoba la gago, gona a tloge le mosadi wa gagwe.

⁴ Ge mong wa gagwe a mo nyadišitše mosadi, gomme mosadi yoo a mmelegela barwa goba barwedi, gona mosadi le bana ba gagwe ke ba mong, gomme monna a tloge a nnoši.

⁵ Fela ge monna wa lekgoba a ka ikana gore o rata mong wa gagwe le mosadi wa gagwe le bana ba gagwe, ka gona ga a nyake go lokollwa,

⁶ gona mong wa gagwe a tsene naye felo ga tirelo. Fao a mmapetše le lemati goba serepodi, gomme a mo phule tsebe ka tšhwana. Gona mohlanka e tla ba lekgoba la mong wa gagwe bophelo ka moka.

⁷ “Ge monna a ka rekiša morwedi wa gagwe gore e be lekgoba, morwedi a se ke a rekollwa bjalo ka makgoba a banna.

⁸ Ge morwedi a ka rekišetšwa monna yo a mmeeleditšego, fela monna yoo a ikhwetša a sa rate mosadi yo, gona morwedi a rekollelwe go tatagwe; mong wa gagwe ga a na tokelo ya go mo rekiša setšhabeng se šele, ka ge monna yoo a forile mosadi yoo.

⁹ Ge monna a ka rekela morwagwe lekgoba la mosetsana, a monna yoo a sware mosetsana mo nkego ke morwediagwe.

¹⁰ Ge monna a ka nyala mosadi wa bobedi, a fele a efa mosadi wa pele dijo le diaparo le ditokelo tša nyalano bjalo ka mehleng.

¹¹ Ge monna a sa phethe ditshwanelo tše tharo tše, gona mosadi yoo a tloge a lokologile, monna a sa lefiwe selo.”

Melao mabapi le ditiro tša boganka

¹² “Motho yo a ka itiago yo mongwe a hwa, le yena a bolawe.

¹³ Fela ge a bolaile yo mongwe e se ka boomo, e le tiro tša ka, nna, Modimo, gona a ka no tšhabela mo nna, Morena, ke tlago mo laolela gona.

¹⁴ Fela ge motho a ka rera yo mongwe a mmolaya ka boomo, le yena a bolawe, le ge a ka tšhabela aletareng ya ka gore a lotege.

¹⁵ “Motho yo a itiago tatagwe goba mmagwe, a bolawe.

¹⁶ “Motho yo a utswago yo mongwe go mo rekiša, goba go mo dira lekgoba, a bolawe.

¹⁷ “Motho yo a rogago tatagwe goba mmagwe, a bolawe.

¹⁸ “Ge batho ba elwa gomme motho a itia yo mongwe ka leswika goba ka letswele, fela a se hwe, yo bjalo motho a se otlwe. Ge monna yo a iteilwego a ka ikoka a robetše,

¹⁹ fela ka morago a tielela, a totobela ka ntle le ge e le ka go ikokotlela ka lehlotlo, moitei wa gagwe a se ke a bonwa molato, fela a lefele nako ya ge moiteiwa a be a robetše, mme a be a bone gore o folela sa ruri.

²⁰ “Ge motho a ka itia lekgoba la gagwe la monna goba la mosadi ka molamo, gomme lekgoba la hwa semeetseng, mmolai yoo a otlwe.

²¹ Fela ge lekgoba le ka se hwe, gwa ba gwa feta letšatši goba a mabedi, mong wa lekgoba a se ke a otlwa, ka gobane lekgoba leo ke thoto ya gagwe.

²² “Ge banna ba ka re ba elwa, ba thula mosadi wa moimana gomme mpa ya senyega, eupša yena mosadi a se gobale ka mokgwana wo mongwe, monna yo a gobaditšego moimana yoo a lefišwe ka mo monna wa mosadi yoo a nyakago ka gona le baahlodi ba dumelago.

²³ Fela ge eba moimana a gobetše, gona kotlo e ebe ya go lefeletša bophelo ka bophelo,

²⁴ leihlo ka leihlo, leino ka leino, seatla ka seatla, leoto ka leoto,

²⁵ mollo ka mollo, ntho ka ntho, mogogoma ka mogogoma.

²⁶ “Ge motho a ka fahla lekgoba la gagwe la monna goba la mosadi mme a le gonya leihlo, a motho yoo a lokolle lekgoba leo e le tefelo ya leihlo.

²⁷ Ge motho a ka re a itia lekgoba a le kgola leino, a lokolle lekgoba leo e le tefelo ya leino.”

Boikarabelo bja beng ba dipoo

²⁸ “Ge poo e ka hlaba motho ya mmolaya, poo yeo e bolawe ka maswika, mme nama ya yona e se ke ya lewa; mong wa yona yena a tšwe molatong.

²⁹ Eupša ge poo yeo e tsebja e ehlwa e hlaba batho, gomme mong wa yona a lemošitšwe taba ye fela a sa e diše, gomme ya bolaya motho, e bolawe ka maswika, mong wa yona le yena a bolawe.

³⁰ Fela ge mong wa yona a ka dumelelwa go ntšha setseka gore a phele, a a lefe tefelo ka moka ya molato yeo a e lefišwago.

³¹ Ge poo e ka bolaya mošemanyana goba mosetsana, a go dirišwe wona molao wo.

³² Ge poo e ka bolaya lekgoba la monna goba la mosadi, mong wa yona a lefe mong wa lekgoba dipapetlana tša silibera tše masome a mararo, gomme yona e bolawe ka maswika.

³³ “Ge motho a ka khurumolla molete goba a epa molete a se o khurumele, gomme poo goba pokolo ya yo mongwe ya wela ka gare,

³⁴ motho yoo a lefele seruiwa seo. A lefe mong wa sona ka tšhelete, gomme yena a šale le setoto.

³⁵ Ge poo ya motho e ka bolaya ya yo mongwe, banna ba babedi bao ba rekiše poo ye e phelago, mme ba arogane tšhelete ya thekišo; ba arogane le nama ya kgomo ye e bolailwego.

³⁶ Eupša ge go tsebja gore poo yeo e tlwaetše go hlaba, gomme mong wa yona a se e diše, mong yoo a lefe yo a lobilego ka poo ye e phelago, yena a šale le setoto.”

Melao ya tefišo

³⁷ “Ge motho a ka utswa kgomo goba nku gomme a e bolaya goba a e rekiša, a lefe kgomo yeo ka kgomo tše tlhano, mme nku yeo ka dihuswane tše nne.”