Eksodose 2 - BIBELE Taba yea Botse

Matswalo a Moshe

¹ Monna yo mongwe wa kgoro ya Lefi o ile a nyala mosadi kgorong ya gabo ya Lefi.

² Gomme mosadi yoo a belega morwa; ge a bona leseana le tloga le kgahliša, a le uta dikgwedi tše tharo.

³ Mola a sa hlwe a kgona go ka mo uta, a tšea sešegwana sa mahlaka a se botela ka borokhu le moti gore meetse a se ke a tsena. A robatša leseana ka sešegwaneng, a le bea ka gare ga lehlakanoka lešing la noka ya Naele.

⁴ Kgaetšedi ya leseana ya hlapetša e le kgojana go bona se se ka le hlagelago.

⁵ Morwedi wa kgoši a theogela nokeng go yo hlapa, mola bahlokomedi ba gagwe ba makgarebe ba itshepelela khwiting ya noka. Ge a re gadi a bona sešegwana ka gare ga lehlakanoka, gomme a roma mohlankedi wa gagwe wa mosetsana go yo mo tšeela sona.

⁶ Morwedi wa kgoši a se khurumolla, a hwetša lesea, lesogana le itelela! A le kwela bohloko a re: “Etse ruri yo ke yo mongwe wa bana ba Baheberu!”

⁷ Ke moo kgaetšedi ya lesea a kgopetšego morwedi wa kgoši a re: “A nka se ye ke go biletša mosadi wa motswetši wa Moheberu gore a tle a go antšhetše lesea le?”

⁸ Morwedi wa kgoši a re go yena: “Sepela, hle!” Ke gona mosetsana a tlogilego a yo bitša yola mmagolesea.

⁹ Morwedi wa kgoši a botša mosadi yoo a re: “Tšea lesea le o nkantšhetše lona, mme nna ke tla go lefa.” Ka fao mosadi yoo a tšea lesea a le antšha.

¹⁰ Ge ngwana a tshwele, a mo iša go morwedi wa kgoši, yena a mo dira morwa wa gagwe. Gomme morwedi wa kgoši a mo rea leina la Moshe ka ge a be a re: “Ke ka gobane ke mo ntšhitše meetseng.”

Moshe o tšhabela Midiane

¹¹ Mola Moshe a godile, o ile a tšwa a ya go batho ba gabo mme a bona ka moo ba bego ba gapeletšwa mešomo ye boima ka gona. A bona Moegepeta a itia Moheberu wa gabo o šoro.

¹² A gaša mahlo thoko tšohle, mme ge a bona a sa bonwe ke motho, a bolaya Moegepeta, a mo epela lešabašabeng.

¹³ Ge a eya gape ka letšatši le le latelago, a makala a hwetša banna ba babedi ba Baheberu ba elwa. A re go yoo a nago le phošo: “A o itielang Moheberu wa geno?”

¹⁴ Mme yoo a mo fetola a re: “Ke mang a go beilego mmuši le moahlodi wa rena? A o ikemišeditše go mpolaya bjalo ka ge o bolaile Moegepeta?” Ke moo Moshe a tšhogilego mme a kgotsa a re: “Kganthe taba yela e a tsebja!”

^15-16 Ya re ge kgoši a ekwa taba ye, a nyaka gore Moshe a bolawe, eupša Moshe a tšhaba a yo dula nageng ya Midiane. Moprista wa Midiane o be a na le barwedi ba ba šupago. Ka letšatši le lengwe ge Moshe a dutše sedibeng, barwedi ba moprista ba tla fao go gelela meetse le go tlatša magopo gore ba noše dihuswane tša tatagobona.

¹⁷ Fela badiši ba bangwe ba tla ba ba raka; eupša Moshe a emelela, a ba thuša, a noša dihuswane tša bona.

¹⁸ Ge ba boela go Reuele, tatagobona, yena a ba botšiša a re: “Go tlile bjang gore le goroše e sa le ka pela lehono?”

¹⁹ Bona ba mo fetola ba re: “Moegepeta yo mongwe o re namoletše diatleng tša badiši, a ba a re gelelela meetse a noša dihuswane.”

²⁰ Tatagobona a ba botšiša a re: “A bjale o kae? Le be le reng le mo tlogela? Sepelang le yo mmitša, le tle le mo fe tša go ja.”

²¹ Moshe a dumela go dula ka ga Jetro, gomme yena a mo nyadiša Tsipora, morwedi wa gagwe.

²² Tsipora a belegela Moshe morwa, gomme Moshe a mo rea leina la Gershome, ka gobane a be a re: “Ke nna mofaladi nageng e šele.”

²³ Ka morago ga mengwaga kgoši ya Egepeta ya hwa. Baisraele bona ba fela ba tsetla bokgobeng, ba lla sello se bohloko ba tsoma thušo. Sello sa bona sa rotogela go Modimo.

²⁴ Modimo a kwa metsetlo ya bona, mme a gopola kgwerano ya gagwe le Abrahama le Isaka le Jakobo.

²⁵ A bona bokgoba bja Baisraele mme a ba šokela.