Eksodose 17 - BIBELE Taba yea Botse

Meetse a go tšwa leswikeng

¹ Setšhaba ka moka sa Baisraele se tlogile lešokeng la Tsine, sa ralala le naga ka moo Morena a ba laelago ka gona. Ba hloma mešaša Refidime, fela fao setšhaba sa hloka meetse a go nwa.

² Ba omanya Moshe ba re: “Re fe meetse re nwe.” Moshe a ba fetola a re: “Le reng le nkomanya? Le lekelang Morena?”

³ Fela setšhaba se be se tloga se swerwe ke lenyora; sa phegelela sa ngongoregela Moshe sa re: “O be o reng o re ntšha Egepeta? O re ntšheditše go re bolaya ka lenyora, rena le bana ba rena le mehlape ya rena?”

⁴ Moshe a rapela a llela Morena a re: “Bjale ke direng ka setšhaba se? Ba šetše ba nyaka go mpolaya ka maswika.”

⁵ Morena a re go Moshe: “Eta setšhaba pele, o tloge le ba bangwe ba bagolo ba Baisraele. O tšee lepara lela la gago wa go itia noka ya Naele ka lona.

⁶ Nna ke tla ema pele ga gago mola godimo ga leswika thabeng ya Sinai. O tie leswika, gomme meetse a tla tšwa leswikeng, mme setšhaba sa nwa.” Moshe a dira bjalo pele ga bagolo ba Baisraele.

⁷ Ba rea felo fao leina la Masa le Meriba, ka gobane Baisraele ba omane ba leka Morena mola ba botšiša ba re: “A Morena o na le rena goba ga a na le rena?”

Baisraele ba lwa le Baamaleke

⁸ Baamaleke ba tla ba hlasela Baisraele gona moo Refidime.

⁹ Moshe a re go Joshua: “Kgetha banna ba o tlago ya le bona go lwa le Baamaleke ka la ka moswane. Nna ke tla ema godimo ga thabana ke emišitše lepara lela Modimo a go ntaela go le swara.”

¹⁰ Joshua a dira ka moo Moshe a mo laetšego ka gona, a tšwa dira go lwa le Baamaleke, mola Moshe le Arone le Hure ba nametše godimo ga thabana.

¹¹ Ge Moshe a emišitše matsogo, Baisraele ba be ba fenya, eupša ge a a khutšiša, Baamaleke ba be ba thoma go fenya.

¹² Ya re ge Moshe a thoma go lapa matsogo, Arone le Hure ba mo tlišetša leswika gore a dule godimo ga lona, mola bona ba mo eme ka mathoko ba emišitše matsogo a gagwe. Ka fao matsogo a Moshe a hlwa a emišitšwe go fihlela letšatši le dikela,

¹³ gomme Joshua a fenyetša Baamaleke sa ruri.

¹⁴ Ke gona Morena a rilego go Moshe: “Ngwala ditaba tše pukung gore di tle di gopolwe, gomme o di tsebiše Joshua, o be o mmotše tsebegokwa gore ke tla feleletša Baamaleke sa ruriruri.”

¹⁵ Moshe a aga aletare, a e rea leina la “Morena ke sefoka sa ka”.

¹⁶ A ba a re: “Phagamišetšang sefoka sa Morena godimo! Morena o tla lwa le Baamaleke go ya go ile!”