Dillo 5 - BIBELE Taba yea Botse

Thapelo ya go kgopela kgaugelo

¹ Morena, gopola tše di re hlagetšego. Lebelela, o bone kgobogo ya rena.

² Naga ye o re filego yona e gafetšwe bašele; magae a rena a tšerwe ke bafaladi.

³ Re fetogile bana ba ba hwetšwego ke tatabo, gomme bommagorena ba etša bahlologadi.

⁴ Meetse ao re a nwago re a a reka, dikgong re a di lefela.

⁵ Re swerwe gampe ke bahlakiši ba rena; ge re lapile ga re dumelelwe go khutša.

⁶ Re ithapeletša go Egepeta le Asiria gore re hwetše tša go ja.

⁷ Borakgolokhukhu ba rena ba dirile dibe mme ba ile, mme rena re ba ba otlelwago dibe tša bona.

⁸ Makgoba ale ke ona a a re bušago, gomme ga re na wa go re hlakodiša go bona.

⁹ Diyamaleng re di tsoma šokeng, ra ipea kotsing ya go bolawa ke bahlakodi.

¹⁰ Re swerwe ke letadi ka lebaka la tlala, gomme letlalo la rena le fiša boka sebešo.

¹¹ Basadi ba gaborena ba katilwe mo Sione, makgarebe le ona a katwa metseng ya Juda.

¹² Baetapele ba rena ba bolailwe ka go fegwa ke manaba; batšofadi ba gaborena ga ba hlompšhe.

¹³ Masogana a gaborena a gapeletšwa go šila; bašemane ba thekesedišwa ke ngata tša dikgong.

¹⁴ Bakgalabje ga ba sa dula kgorong, le bafsa ga ba sa letša diletšo.

¹⁵ Lethabo le re feletše; go bina ga rena go re fetogetše manyami.

¹⁶ Re lahlegetšwe ke seriti; re ba madimabe gobane re dirile dibe!

¹⁷ Pelo tša rena di bohloko, le mahlo a rena a fifaditšwe ke sello,

¹⁸ ka gobane thaba ya Sione e šetše fela, gomme diphukubje di tšhakatšhaka go yona.

¹⁹ Eupša wena, Morena, o buša go ya go ile, gomme o tla ba kgoši ka mehla yohle.

²⁰ O reng o re lebaletše sa ruri? O reng o re furalela galelele gakaaka?

²¹ Re sokollele go wena, Morena, mme re tla sokologa. Re bušetše sekeng,

²² ge e se ge e le gore o re lahlile lahlilahli, o re galefetše go feta tekanyo.