Baheberu 1 - BIBELE Taba yea Botse

Modimo o bolela le rena ka Morwagwe

¹ Mehleng ya kgale Modimo o boletše le borakgololokhukhu ba rena gantši le ka mekgwa ye mentši ka baprofeta,

² ya re mehleng yeno ya mafelelo re phelago go yona a tla a bolela le rena ka Morwagwe. Ke yena yo a hlodilego legohle ka yena, yo a mmeilego mojalefa wa tšohle.

³ Go yena go bonala letago la Modimo, ke yena seswantšho sa nnete sa sebele sa Modimo, gomme o lota tšohle ka lentšu la gagwe le maatla. Ge a phethile modiro wa go hlatswa batho dibe, o ile a yo dula legodimong madulong a bogoši kgauswi le Modimo Kgoši.

⁴ Morwa wa Modimo o godišitšwe go feta barongwa, go swana le lona leina le a le filwego ge le feta a bona.

⁵ Etse Modimo ga se a ka a botša yo mongwe wa barongwa a re: “O Morwa wa ka, lehono ke go tswetše.” Le bona barongwa Modimo ga se a ka a bolela ka yo mongwe wa bona a re: “Ke tla ba Tatagwe, gomme yena e tla ba Morwa wa ka.”

⁶ Mohla a tliša Motswalwanoši wa gagwe lefaseng o tla boeletša a re: “Barongwa bohle ba Modimo ba mo khunamele.”

⁷ Ge e le mabapi le barongwa Modimo o rile: “Modimo o dira barongwa ba gagwe diphefo; bahlanka ba gagwe o ba dira dikgabo tša mollo.”

⁸ Fela mabapi le Morwagwe o rile: “Modimo, bogoši bja gago ke bja go ya go ile; o buša setšhaba sa gago ka toka.

⁹ O be o rata toka, o hloile bobe. Ke ka lebaka leo Modimo, yena Modimo wa gago, a tloditšego wena, e sego bagwera ba gago, a go bea kgoši ka lethabo le legolo.”

¹⁰ A ba a re: “Wena, Morena, mathomong o hlodile lefase, wa bopa magodimo ka diatla tša gago.

¹¹ Dilo tšeo di tla timelela, fela wena o tla šala; tšohle di tla hlagala bjalo ka seaparo.

¹² O tla di phutha bjalo ka kobo, gomme di tla šatoga bjalo ka seaparo. Eupša wena ga o fetoge, le bophelo bja gago ga bo fele.”

¹³ Modimo ga se a ka a botša yo mongwe wa barongwa a re: “Dula mo letsogong la ka la go ja ke be ke tle ke go fenyetše manaba a gago.”

¹⁴ Na barongwa ka moka ga se meoya ye e hlankelago Modimo, mme yena a e romago go yo thuša ba ba tlago phološwa?