प्रकाशितवाक्य 10 - नोयरी नोवलू नियम

स्वर्गदूत अने आयती पुस्तक

¹ ताहरू आय एक जोरावार स्वर्गदूत वादलाहा पेईत होर्गामरोत उतरिता पालील्यो तियाआ मुंडकापो मेघधनुष्य ओते त्या सोब सूर्या सारखो अने तियाआ गुडू अग्नीस्तभां सारखो ओते.

² तियाआ आथोमेहे एक आयती उघडील्या पुस्तक ओते तिये आपाआ हुदू गुडू समुद्रापो अने बंगाड्यो धोरतीपो मेकलू,

³ अने एहलो वोडो शब्दामे आअड्यू, जेहलो सिंह गर्जतो; अने जांहा तो आअड्यू ताहा गोर्जेहे शब्द होम्लालू गोल्यो

⁴ जाहा सात गर्जनच्या आरी शब्द होमलितल्या गोये, ताहा आय स्वर्ग लेखनारो ओतु, “तियाअ सात शब्दामे कोअयु होय निकाडीत मेका, अने नाहा लिखेहू”

⁵ ज्या स्वर्गदूतला आय दर्या अने धोरतीपो उभे पालील्यो ओते तिये आपाआ हुदू आथे स्वर्गामेहे विशिलो,

⁶ अने जो कायम जिवंत होय, अने तिये होर्गाआ अने जे किबी तियाआमे होय, अने धोरती अने जे किबी तियापो होय, अने समुद्राला अने जे किबी तियाआमे होय सृजा, तीयाआज शपथ घेऊन कोयु, “ओमे ताहा फासी वेल नाहा उवे.

⁷ पोन सातवा स्वर्गदूताला तुरही वाजविलो उवनारू शब्दांआ दिहोम देवोओ निकाडीत मनोरथ तियाअ सुवार्ताआ नुसार जो तिये आप आपाआ दास संदेष्टाहा आप्लु, पुरो उवे”

⁸ ज्या गोठिही आय स्वर्गाआ गोगत्लू होमल्यु ओते, ते फासी माआआरी गोठी कोहू लाग्यू, “जा, जो स्वर्गदूत दर्या अने धोरतीपो उबु होय, तियाआ आरी का उघडील्या पुस्तक लेत ले.”

⁹ आय स्वर्गदूत जागे जात कोयु, “ए हानू पुस्तक माहु आप” तियाआ माहु कोयु, ले, यीला खातले; ए ताआ पेट ताहा कोडवो कोअनारू, “पण ताआ सोबिमेहे सारखो गुल्यो लागे.”

¹⁰ आखिर आयती हानू पुस्तक तियाअ स्वर्गदूत त्यापोरोत खात टाक्यी ती माआ सोबीमेहे मधा हारकी गुल्यो ताहा लागीई, बी आय जांहा तीही खात लेधलो, ताहा माआ पेट कोडवो ओत गोये.

¹¹ तेहलाम माआ त्यापोरोत ओ कोयु गोये, “माहु जास्तीज मांहे, अने जाती, अने भाषा अने राज्याआ विषयाम फासी भविष्यवाणी कोहू लागे”.