मरकुस 2 - नोयरी नोवलू नियम

येशु द्वारा लाखवा रोगिही हाजु कोअलो

¹ खोब दीहो मेहे तो फाशु कफरनहूम मेहे आयु अने होम्बलील्यो का तो कोअमेहे होय.

² तेहलाम एवडे मांहे एकटा का बाअणाम तीयाहाभी तियाहा जागू नाहाउवतो तेहलाम येशु तियाहा संदेश आपित ओतु.

³ अने मांहे एक लोखवु उवल्याहां चार जोआ मीलीत वीसीत त्याईही लेत आवे.

⁴ तियाहा गर्दीवही त्याजागे जाता नेआवतली, कोईत तो जीही ओतु तीही छप्पर तिये विसित सेटे कोयोएने वात कोईत ज्या खाटलापो लखवा माहुहू हुव्यू ओतु ती खाटेलो निसे येशु जागे सोडीत

⁵ तियाआ विश्वास पालीत येशु लखवा उवलो माहुंहु कोयु, “पोऱ्या, ताआ पापापो क्षमा उवी होय.”

⁶ केते शास्त्री त्याजागापो बोह्ये ओते; तियाआ मोनामे एहेलू विचार आवयू का

⁷ ओ एहेलू काहा गोगत्लू? ओ ताहा परमेश्वरोओ निंदा कोईत होय परमेश्वरावाचून कोडू पापापो क्षमा कोहू शकतो?

⁸ येशु आपाआ आत्माम लागेज जाईत लेधलो का ओ मोनुमे कि विचार कोईत होय, तो तियाहा कोयु, आपाआ मोनामे तुमु एहलो विचार काहा कोअताहा?

⁹ हीदू कि होय, ताआ पापापो क्षमा उवी होय, एहलो लखवा उवलो माहुंहु कोईओलो सोपो किंवा उठ, आपाआ खाटेलो विसित चालीलो लाग एहलो कोईओलो सोपो होय?

¹⁰ पोन माअहा पोऱ्याहा धोरतीपो पापापो क्षमा कोईलाकाजे अधिकार होय ओ तुमामे होमजीवी कोईत तोओ लखवा उवलो माहुंहु कोयु,

¹¹ आय ताहु कोत्लू उठ, आपाआ खाटेलो विसित ले, अने आपाआ कोआ जा

¹² फासाडी तो उठ्यू अने लागेज आपाआ खाटेलो विसित आखाआ देखताआ निघाल्यू, यापोरोत आखे जोओ थक्क उवे अने देवोओ गौरव कोईत कोयु, आमाहा एहलो केधीज पालील्यो नाहा.

येशु द्वारा फालू लेनाराहा हाद्लोओ

¹³ तो तिहीरोत निहित गोइत्लुताहा समुद्रकिनाराआ जागे गोल्यो अने आरन्यो लोकसमुदाय तिया जागे आवयू तेहलाम तिये तियाहा शिक्षण आप्लु.

¹⁴ तिहीरोत जात ओयताहा तियाहा अल्फीई पोऱ्या लेवी जकातीइ नाकापो बोहीतरोल्यु देखायू अने तियाहा तिये कोयु, माफासाडी आव, तेहलाम तो उठित तिया फासाडी गोल्यो.

¹⁵ फासाडी एहलो उवे का तो तियाआ कोआ खायलाकोत बोहयु, तीही वारुज जकातदार अने पापी माहाआ येशु अने त्याआं शिष्य याआ लाइनिम आविलो बोह्ये काहाके ते खूप ओमेत ते तियाआ फासाडी आव्ये ओते.

¹⁶ तेहलाम परुश्यामरोत शास्त्री इये तियाहा जकातदार अने पापी मांहे त्याआरी खाअलावेले पालीत तियाआ चेलाहा कोयु, ओ जकातदार अने पापी मांहे याआ आरी काहा खात्लू?

¹⁷ ओ होमलित येशु तियाहा कोयु, हाजलू वैदयाची गोरोज कायना ओतो, ताहा बिमारीवालाहा ओते आय नितीमानास नाहा ताहा पाप्याहा बोलावयास आवयू होय.

उपवास सी समंधित प्रश्न

¹⁸ योहानाआ शिष्य अने परुसी उपास कोईत ओते, तेहलाम मांहे आविलो तियाहा कोयु, योहानाआ शिष्य अने परुश्याआ शिष्य उपास कोअता पण आपाआ शिष्य उपास कोईत नाहीत याआ काहाके नाहाकोत?

¹⁹ येशु तियाहा कोयु, वेहवाला आरी उपो होय तोपोरोत उपास कोअला शक्य नाहा

²⁰ तेबी एहलो दीही आवे का उपो त्यांपोरोत काढीत लेदो जाइअलो तेहलाम तियाअ दिहोम ते उपास कोआ

²¹ कोडु नव्यो कापडाआ ठिबकू जुनो डोगलाहा लागाडीत नाहा लागाडले ताहा धड कोइला कोअता लागाडल्यी ठिबकू तियाहा म्हणजे जुनाहा फाडीअलो अने सिडू वोडो ओते

²² कोडु नवो द्राक्ष रोह जुनो बुधलाम काले नाहा पेरीला ताहा नव्यो द्राक्षरसावाही बुधले फुटणारु, द्राक्षरस वेरात्लू, अने बुधलेभी निकामी ओये कोईत नवो द्राक्षरस नवो बुधलाम काल्तले.

येशु सब्तओ प्रभु

²³ फासाडी एहलो उवे का तो शब्बाथ तेदीही खेतामे जाआत्लू तियाआ शिष्य सोडकोपो कोंहे वोडू लागाडीत.

²⁴ तेहलाम परुसी तियाहा कोयु, पाला, शब्बाथ तेदीही कोहू कायना ते ओ हाजो कोअता?

²⁵ तेहलाम येशु तियाहा कोयु, दाविदाला गोरोज पोड्यी म्हणजे तियाहा अने तियाआ आरीवालाहा भूक लागीई तेहलाम तिये नाहाकोत कोल्यु?

²⁶ अब्याथार महायाजक ओतलू तो देवाच्या मंदिरोम केहलु गोल्यो अने याजकाशिवाय कोडुबी खाऊ योग्य नयेत तियाअ समर्पित रोटा तिये केहला खाद्योओ अने आपाआ हेंगातीही ए केहला खाअहू आप्या ओ तुमु केधी वाचले नाहा के?

²⁷ फासी तो तियाहा कोयु, शब्बाथ मांहाकोअता उवलो होय, मांहु शब्बाथ कोअता उवलो नाहा

²⁸ कोईत माअहा पोऱ्या शब्बाथआ प्रभू होय.