लूका 19 - नोयरी नोवलू नियम

जक्कई कोओ येशु

¹ तो यरीहो माय जातू ओतु.

² तीइही जक्कय नावाआ एक माहुहू ओतु तो कर वसूल कोआनाराआ मुख्य ओतु.

³ तियाहा येशुहू पालीलो ओते के कोडु होय, पण तियाहा गर्दीवही देखाहे ने ओतू काहाके तो बेटक्यू ओतु.

⁴ तेहलाम तियाहा पालीलाकोता तो होमला उंमबरो साडोपो सोढयू काहाके येशु तियाआ सोडकोपो जानारू ओतु.

⁵ जांहा येशु तिया जाग्तली पुगीतगोयू तेहलाम उसे पालीत तिये कोयु, ओ जक्कय, वेगु उतरित आव; काहाके आज माहु ताआ कोअमे रोलो होय.

⁶ तो आनंदावाही उतरित आपाआ कोअमे घेऊन गोल्यो.

⁷ ओ पालीत आखे मांहे कुरकुर कोहू लागाडीत, तो ताहा होमला पापी माहुहु कोअमे गोल्यो होय.

⁸ जक्कयाहि उभे रोत प्रभूहु कोयु, ओ प्रभू आय आपाआ आर्दी धनदौलत गोरब्योहो आपोहो अने जर कोडाआ किबी पण अन्यायावाही लेधलो होय ताहा तियाहा चारपट फासी कोअनारू.

⁹ तेहलाम येशु तियाहा कोयु, आज आव कोओहो तारण जोडयो उवे होय त्यापोत ओ पण अब्राहमोओ पोऱ्या होय.

¹⁰ काहाके माअहा पोऱ्या टाकाईत गोल्याहा होदिलाकोता अने त्याआं तारण कोइला कोअता आवयू होय.

दस मुहरे

¹¹ जाहा ते याआ गोठी होमलित ओते ताहा तिये एक दृष्टान्त कोयु, यावाही का तो यरुशलेम जागे ओतु अने ते होमजाडीत ओते का परमेश्वरोओ राज्य ओमे प्रकट उवे होय.

¹² कोईत तिये कोयु, एक श्रीमंत माहुहू सेटे तियाहा जातलू म्हणजे तो राज जागा मिलवीत फिरीत आविलो.

¹³ तिये आपाआ सेवकामेहे दहा जोह हादीत तियाहा दहा शिक्के आप्लु अने तियाहा कोयु, आय फासी आविलो तोपोरोत लेनदेन कोईओलो.

¹⁴ पोन तियाआ नगरामे रोणारे त्याआरी द्वेष कोईओलो अने तियाआ फासाडी वकीलाआ त्यापोरत कोत मोक्ल्यीत का आमाहा नाहा जोवे का ओ आमापो राज्य कोअनारू.

¹⁵ जाहा तो राज जागा मिलवीत फिरीत आवयू तेहलाम एहलो उवे का आपाआ सेवकोहो ज्याहा तिये रोखडी आप्लु ओते आपारी हादीत लाविले म्हणजे मालुम कोअनारू का तिये लेनदेन लेतजा नाहाकोत-नाहाकोत कामावोह्यो.

¹⁶ तेहलाम पेल्लो आविलो कोयु, ऐ स्वामी ताआ शिक्काकोईत आय दहा शिक्के कामावोह्यो होय.

¹⁷ तिये तियाहा कोयु, धन्य, ऐ उत्तम सेवक जास्तीज अने कोम माय विश्वासयोग्य निघाल्यू ओमे दहा नगराउपो अधिकार मेका.

¹⁸ दिहरा आविलो कोयु, ऐ स्वामी, ताआ शिक्काकोईत आय आजू पाच शिक्के कामावोह्यो होय.

¹⁹ तिये तियाहा पण कोयु तू पण पाच नगरोत अधिकारी ओतगोयु जा.

²⁰ तिसरुजे आविलो कोयो, ओ स्वामी, पाला ताआ ओ शिक्का होय ज्याहा आय कापड़ामे बांधीत मेक्ल्ये होय.

²¹ काहाके आय ताहु बित ओतू यावाही का तू कडक माहुहू होय जे तू कोल्यु नाहा तियाहा विसित लेहो अने जे तू पेहे नाहा तियाहा तू वाड्तुलू.

²² तिये तियाहा कोयु, ऐ दुष्ट सेवक, आय ताआज सोबिकोईत ताहु दोषी ठरावीत होय तू माहु जाणम ओतु का आय कडक माहुहू होय जे आय मेक्ल्ये नाहोत आय विसित लेहो अने जे आय पेहे नाहा ते आय वाड्तुलू;

²³ ताहा तू माआ सावकारापो काहा मेक्ल्ये नाहा का आय आविलो व्याजाआरी घेऊन लेधलो ओते?

²⁴ जे मांहे जागे उभे ओते तिये तियाहा कोयु तो शिक्का त्यापोरोत घेऊन ल्या अने तियाहा दया ज्याआपो दहा शिक्के होय.

²⁵ तिये तियाहा कोयु, ऐ स्वामी, तिया जागे ताहा दहा शिक्के ताहा होय?

²⁶ आय तुमामे कोत्लू का ज्याआपो होय तियाहा आप्लु जाइअलो; अने ज्यापो नाहा त्यापोरोत ते पण घेऊन लेधलो जाइअलो जे तिया जागे होय.

²⁷ पोन माआ तियाअ वैऱ्यी ज्याहा वाटत निमिले का आय तियापो राज्य कोहू तियाहा इही माआगाडी लेतआवीत तियाआ घात को.

यरूशलेम मेहे प्रवेश

²⁸ ए गोठी कोत तो यरुशलेमाही तियाआ आगाडी-आगाडी गोल्यो

²⁹ जाहा तो जैतून नावोओ डोगोपो बेथफगे अने बेथानी जागे पुगीतगोयू, तेहलाम तिये आपाआ शिष्यामेरोत बेन जोह ओ कोत मोक्ल्यीत,

³⁰ आगाडी गावून जा; अने तीयाम पुगताज एक गोदडीई गोदडा पिलो जियीपो खोरोज कोडु प्रवेश कोअयु नाहा बांधीत मेकही तुमामे जोडीत तियाहा सोडीत घेऊन आव.

³¹ जर कोडु तुमामे फुसनारू का काहा सोडीदेतले, ताहा ओ कोओलो का प्रभूहु याहा गोरोज होय

³² ज्याहा मोक्ल्यीत ओते तिये जात तियाहा कोयु ओते, तेहलूज देखाये

³³ जाहा ते गोदडा पिलाहा सोडीत ओते, तेहलाम तियाआ मालक्योहो तियाहा फ़ुस्ल्याआ, आव गोदडा पिलाहा काहा सोडीत होय?

³⁴ तिये कोयु, प्रभूहु याहा गोरोज होय

³⁵ ते तियाहा येशुआरी घेऊन गोये अने आपाआ कापडे तिया शिंगरापो टाकीत येशुहू तियापो बोहाडीत आप्लु.

³⁶ जाहा तो जात ओतु तेहलाम ते आपाआ कापडे वाटेपो मेकीत जात ओते

³⁷ जागे आवीत ओयताहा जांहा तो जैतून डोगोओ उतरनिवर पुगीतगोयू तेहलाम शिष्याची आखी मंडली तियाअ आखे सामर्थ्याआ कामामुळे जे तिये पालील्यो ओते आनंदाम ओतगोयु वोडो शब्दावाही परमेश्वरोओ स्तुती कोहू लागाडीत,

³⁸ “धन्य होय तो राजा, जो प्रभूउ नावामेहे आवत्लू होर्गाम शांती अने जुगामेहे महिमा होय.

³⁹ तेहलाम गर्दीमेऱ्ये किबी परुसी कोहू लागाडीत ऐ स्वामी आपाआ शिष्यांआ धमकाड.”

⁴⁰ तिये उत्तर आप्लु आय तुमामे कोत्लू जर ओ ठावकू रोही ताहा डोणो आअडीही.

यरूशलेमो कोअता विलाप

⁴¹ जांहा तो जागे आवयू तेहलाम नगराहा पालहु तो रोड्यू.

⁴² अने कोयु केतो हाजो उवे ओते का तांहुज आव दिह्याहा अने शांती गोठीही होमज्ये ओते पण ओमे ते ताआ डोआवाही निकाईत गोये होय.

⁴³ काहाके तेदीही तापो आविलो का ताआ दुश्मन कट बांधीत ताहु गांडे पेअही अने चारही साइटूमे ताहु दाबनारू,

⁴⁴ अने ताहु अने ताआ पोऱ्याहा जो तांआम होय, कादकाम मेलविनारो अने तामेहे दोणोपो डोणो पण सोडविणारू नाहा; काहाके तू टाईमोम जांहा तापो कृपा नजर कोअयी गोयी ओलखीही नाहा.

मंदिरोम रोत बेपारिही काड्यु

⁴⁵ तेहलाम तो मंदिरोम जात वेसनाराहा बारथे काडीलो लाग्यू,

⁴⁶ अने तियाहा कोयु, “लेखिलो होय, माआ कोअ प्रार्थना कोअ होय, पण तुमु तियाहा चोराहा गुफा बोणाडीत आप्यी होय”

⁴⁷ तो दाडीअ मंदिरोम हिकवन आपित ओतु; अने मुख्य याजक अने शास्त्री अने मांहोओ प्रमुख तिया नाश कोइला कोअता योग्य वेल होदित ओते

⁴⁸ पोन किबी उपाय काढहु सेकेले नाहा का ओ कोडला प्रकारे कोईओलो काहाके आखे मांहे वोडो आशेवाही तियाआ होमलिते ओते.