इब्रानि 5 - नोयरी नोवलू नियम

महायाजको कोअता योग्यता

¹ काहाके हर एक महायाजक मांहो मेहेरोत निवडात्लु अने माहोओ कोअताज ती गोठीई विशयोमेहे जो परमेश्वरोओ आरी सम्बंध मिकत्ली होय ठोरावलु जातल्यु होय का भेट अने पाप बलि सोडावतु रोय.

² तोओ अज्ञानी अने फिरणारा आरी मायेवाही व्यवहार कोहू शकतो त्यापोत का तो स्वतः पोन अशक्त पणा माय केडाळल्यू होय.

³ त्यापोत तियाहा जोवे का मांहो कोअता तेहलूज आपा कोअता पापाआ अर्पण सोडावतु रोय.

⁴ ओ मानपानाचे जागा कोडु स्वतःआ लेत नाहा जोपोरोत हारून सारखे परमेश्वारापो रोत ठेरव्यो जात नाहा.

हमेशा कोअता महायाजक

⁵ तेहलूज ख्रिस्ताने पण महायाजक बनाविलो गौरव स्वतः लेधलो नाहा, पण तियाहा तीयेज आप्लु जोओ तियाहा कोयु ओते, “तू माआ पुत्र होय, आज आयुज ताहु उत्पन्न कोल्यु होय”

⁶ तियाआ प्रमाणोओ तो दिहरा जागापो पोन कोयु होय, “तू मलिकिसिदकच्या रीतीपो कायमो कोअता प्रमुख याजक होय”

⁷ येशुई आपाआ डीलोम रोणाआरा दिहोम उचो गठीमेह आअड़ी-आअडित अने आहवे गोलीत तियाहा जो तियाहा मरण सी वासाडित शकत ओतु प्रार्थना अने विनंत्या कोअल्यो का अने तियाआ भक्तीवाही तियाआ होमल्यु.

⁸ पोऱ्या ओमेत पण तिये दुख सहन कोईत आज्ञा मानिलो शिकायो,

⁹ अने सिद्ध बोणीत आपाआ आखे आज्ञा कोअनाऱ्या काजे सार्वकालिक उद्धारो कारण ओतगोयु.

¹⁰ अने तियाहा परमेश्वारापो रोत मलिकिसिदकाच्या रीतीपो महायाजकाचे जागा जोडयेहे.

आत्मिक अपरिपक्वता

¹¹ याआ विषयाम आमाहा जास्तीज गोठी कोअला होय ज्याहा समजीलोओ पण कोठीने होय यामुळे का तुमु उचो होमलिला लागाडीत होय.

¹² टाइमो विचाराआ ताहा तुमामे स्वामी ओत जाहू जोवे ओते तेबी पण ओ जरुडी उवे होय का कोडु तुमामे परमेश्वरोओ वचनामे पेल्ली शिक्षाम फासी शिकायलो तुमु एहलो उवे होय का तुमामे रोटाआ बोदलाम अमेजा दूधज जोवे.

¹³ काहाके दुध पिनारु पोऱ्याहा ताहा धर्माच्या वचनामे ओळखत कायना ओतो काहाके तोओ सोओ होय.

¹⁴ पोन रोटू ताहा डाया माहाकाजे होय जीआ अवयव अभ्यास कोईत-कोईत हाजो वाईट फरक समजुहू हुशार ओत होय.