प्रेरितो काम 20 - नोयरी नोवलू नियम

मकिदुनिया, यूनान अने त्रोआस मेहे पौलुस

¹ जाहा गोलबोलु ठावकु ओतगोयु ते पौलुस तियाआ चेलाहा हादीत होमजाड्यू अने तियाहा मीलीत तीहीरोत वेरात मकिदुनिया वोगे चालुहू लाग्यु.

² तिया आखे प्रदेशामेहे आवीत शिष्यांआ जाअखो उत्साहोम कोईत तो युनानी माय आवयू.

³ जाहा तीन मोयना रोत तो तीहीरोत नावूमे बोहित सीरिया जागे जाण्यावर ओतु तेहलाम यहुदी तियाआ घात कोईलामे लागाडीत ओते याकोअता तिये खरोज कोअयु ओतु का मकिदुनिया फासी जाईला बेत कोअयु.

⁴ बिरुयाकर पुरीचा पुत्र सोपत्र अने थेसलनिका मायरोत अरिस्तर्खुस अने संकुद गायसाआ दर्बेकर अने तीमुथियुस अने आसियाआ तुखिक अने त्रुफिमुस आसिया तियाआ आरी आविलो गोये.

⁵ ते आगाडी जात त्रोआसात आमाआं वात पालीत राहो.

⁶ अने आमाहा बेखमीर रोटाहा दिहापोरत फिलिप्पी तारवात सोडवीत पाच दिहोमे त्रोआस त्याजागे पुग्या अने सात दिहेजा होमजीत्लो रोल्या.

युतुखुसोहो जिवाड्यु

⁷ हाप्ताआ पाल्या तेदीही जांहा आमाहा भाकर तोडिला कोअता एकठे उवे तेहलाम पौलाने जे दिहरा तेदीही निहित जाण्यावर ओते तिये किबी गोठी कोयु अने आर्दी राती पर्यंत गोठी कोईत रोल्या.

⁸ ज्या खोलीम मोडली आमाहा एकठे ओते तीयाम जाअखो दिवे बोलीईला लागाडीत.

⁹ अने युतुख नावाआ एक जुवान खिडकीत बोहीतरोल्यु जाखो निंदोम निसे वाकिलो ओतु जांहा पौलुस जाखो वेल पर्यंत गोठी कोईत रोल्या ताहा तो निदेहे गुंगीत तिसऱ्या उपोरोते पोडीत गोल्यो अने मोल्यू विशिलो गोल्यो.

¹⁰ परंतु पौलुस उतरित तियाहा मिठ्ठी माइहि अने गोलीतपोड्यू गोले लागाडी कोइतलु बित नाहा, काहाके का तिया जीव तियाहा होय.

¹¹ अने उसे जात भाकर तोडीअते अने खात तिये ओतो वेल पर्यत गोठी कोईत रोल्या का वेगीवेल उवी फासाडी तो निहित गोल्यो.

¹² अने ते तिया जुवानाहा जिवंत घेऊन आव्ये अने जाखो शांती मिलवी.

त्रोआस सी मिलेतुसोओ यात्रा

¹³ आमू पालील्यो का जहाजमे सोडवीत अस्सुस कोअता जायलो आव विचाराआ आगाडी गोये का तीहीरोत आमाहा पौलाहा चोढावीन लेऊ काहाके का तियाहा ओ याकोअता ठेरवीही ओते का आमुज पागेपागे चालणारो ओते.

¹⁴ ओमे अस्सुस कडे आमाहा मिल्यू ताहा आमाहा तियाहा चोढावीन मितुलनास आव्ये.

¹⁵ तिहीरोत नाव उगाडीत आमाहा दिहरा तेदीही खियास आगाडी पोतीअलो अने आगाडी तेदीही सामुस मध्ये जाऊ लागाडीत फासाडी दिहरा तेदीही मिलेतास आव्ये.

¹⁶ काहाके का पौलाने इफिसापो ओतगोयु जाईला खरोज कोअयु ओतु का केधी एहलो न ओवो का तियाहा आशियामेहे वेल लागेहेकोयते तो घाईम ओतु का केधी ओवुहू गोयो ताहा तो पन्नासाआ तेदीही सनात यरूशलेमरोत रोहू.

इफिसुसोओ प्राचीनोहो उपदेश

¹⁷ तिये मिलेतूस इफिसाहामेहे खोबोर मोकल्यु अने मंडळ्याआ डायाहा हादिलो.

¹⁸ जांहा ते तिया जागे आवीत तिये कोइतलु, तुमु ओलखीत का पेल्लाज दिवसापोरोत जांहा आय आशिया माय पुग्यु आय हर एक वेळेला तुमाआ आरी केहला प्रकारे रोला

¹⁹ अर्थात जाअखो नम्रतेने अने आहवे वोहाडीत अने तियाअ परीक्षा आमे जे यहुद्याचे कंटाळामुळे मापो आविलो पोडी, आय प्रभूऊ सेवा कोअतुज रोही,

²⁰ अने ज्या गोठी तुमाआ लाभाची ओती तियाहा कोहू अने माअहाआ आगाडी अने को हिकाडनारे केधी ण डगमग्यु,

²¹ नहाते यहुदी अने यूनानी याहा आगाडी साक्ष आपित रोल्यूके परमेश्वराही पश्चताप कोअला अने आमा प्रभू येशु ख्रिस्तापो विश्वास कोअला जोवे.

²² ओमे पाला आय आत्मा मेहे बादितमेल्यु यरुशलेम ला जात होय अने नाहा उलखित्लू का तिही मापो नाहाकोत-नाहाकोत परिस्थिती आवे,

²³ फक्त ओ का पवित्र आत्माआ हर एक नगरामेहे साक्ष आपित माहु कोत्लू का बंधन अने त्रस ता कोअता तीयार होय.

²⁴ पोन आय आपाआ जीवोहो किबी नाहा होमजाडीत का तियाहा प्रिय माणू नाहा ताहा ओ का आय आपाआ गुगदिला अने तियाअ सेवेला पुरो कोहू जी आय परमेश्वरोओ कृपेणे सुवार्तेपो साक्ष आपलो कोअता प्रभू येशु त्यापोरोत मिलवी.

²⁵ ओमे पाला आय ओलखीत्लू का तुमु आखे ज्याम परमेश्वरोओ राज्याआ घोषणा कोईत फिर्यु, माआ सोब फासी नाहा पालनारू.

²⁶ याकोअता आय आजे तेदीही तुमापोरोत साक्ष आपित कोत्लू का आय आखाआ रक्तानी निर्दोष होय.

²⁷ काहाके का परमेश्वरोओ आखे मनोरथाला तुमामे पुरो रीतीवाही कोहू डगमग्यु नाहा.

²⁸ याकोअता आपाआ अने पुरो झुडाची चौकशी कराज्याच्यात पवित्र आत्माआ तुमामे मुख्य ठेरवीही होय का तू परमेश्वरोओ मंडळ्याही होंबाला कराज्याला तिये आपाआ रक्तानी वेसातो लेधलो होय.

²⁹ आय ओलखीत्लू का माआ गोयेनतर फाडीईलो लांडगे, तुमामे आवे जे झुंडाआ सोडविणारू नाहा.

³⁰ काहाके तुमाआ माय पण एहलो मांहु उटे जे शिष्यांआ आपाआ फासाडी ताकिला कोअता वाकडयाआ तीवोग गोठी कोआ.

³¹ याकोअता जागतू रो अने स्मरण कोईत रो का तीन वर्षापर्यंत रातदीही आहवे वोहाडीत प्रत्येकाहा चेतावणी आपुहू सोडये नाहा

³² अने ओमे आय तुमामे परमेश्वरोओ अने तियाआ कृपेच्या वचनाआ होफहोपिन आपोहो जो तुमाआ उन्नति कोहू शकतो अने ओमे आखे पवित्र कोल्यु गोये अने माहुंमे मेळ कोईत वतन आपुहू शकतो.

³³ आय कोडाआ चांदी किंवा होनो किंवा कापडाआ लोभ कोअयु नाहा.

³⁴ तुमु स्वतःहा ओलखीत का याआ आताई अने माआ हेंगात्याहां आवश्यक ते पुरो कोल्यु.

³⁵ आय तुमामे आखे किबी कोईत देखाये का आव रीतीवाही परिश्रम कोअत्लू तेहलाम निर्बाळाना होमलीलो अने प्रभू येशुउ नाव स्मरण मेकीला आवश्यक होय जो तिये खुद कोयु होय का, लेअलापेक्षा आपलो जाखा धन्य होय.

³⁶ ओ कोत तिये टोसणे टेक्यू अने तियाअ होगाआरी प्रार्थना कोअयी.

³⁷ तेहलाम ते आखे जाखो रोडीलो अने पौलाचआ गोलीतपोड्यू गोलु मिलून तियाहा चुंबन आपुहू लागाडीत.

³⁸ ते विरोस कोईत आव गोठीही संकेत ओते का जी तिये कोल्यी ओती का तुमु माआ सोब या आगाडी कदाचित पालनारू नाहा फासाडी तिये जहाज पर्यंत तियाहा सोदुहू आव्ये.