2 तीमुथियुस 2 - नोयरी नोवलू नियम

उत्तम योद्धा

¹ याआ कोअता ऐ माआ पोर्या तू त्या अनुग्रह मसीह येशुमेहे होय ताकतवालू ओत जा,

² अने ज्या गोठी तू खूप साक्षीदारा आगाडी होमल्यु होय तियाहा विश्वासी मांह्हू होपित आप जे दिहराहाबी शिकाडेलो योग्य रोंहु जोवे.

³ ख्रिस्त येशुउ हाजू शिपायासारखा माआरी दुख सहन को.

⁴ जाहा कोडु शिपाई सुलाइलोओ जात्लू ताहा याकोअता का आपाआ भक्ती कोनाराहा खुश कोईओलो कोईत स्वतःहा जुगाआ कामोम ठोग्त्लू नाहा.

⁵ फाशे जर मल्ल युद्धामे सुलानारू नियमानुसार लोढीत नाहा ताहा मुगुट मेलवीलो नाहा.

⁶ जो खेती कोअनारू मेहनत कोअत्लू फलोओ भाग पहीले तियाहा मिलूहु जोवे.

⁷ जे आय कोत्लू तियापो लक्ष्य आप अने प्रभू ताहु आखे गोठी होमजाडीत आपही.

⁸ येशु ख्रिस्ताहा ओर मेका जो दाविदाआ कुलोमरोत ओवयू अने मोल्यामरोत जिवंतु उठ्यू अने ते माआ सुवर्तेहोस होय.

⁹ याकोअता आय पाप कोनारा होस दुख सहन कोअत्लू इहिंजा का कैद बी होय पोन परमेश्वरोओ वाचीलो कोअता कैद नाहा.

¹⁰ त्याकोता आय निवाडल्या मांहो कोअता आखे किबी सहन कोअत्लू का ते पोन तिया उद्धारोहो ख्रिस्त येशु माय सार्वकालिक गौरवात मिलीजावू.

¹¹ ए गोठी खोरी होय का जेबी आमू त्याआरी मोईत गोये होय तेबी त्याआरी जिवंते बी ऊवणारोज,

¹² जर आमू धीरमारीत सहन कोईत रोही ताहा त्याआरी राज्य बी कोनारू जर आमू तिया नकार कोअनारू ताहा तो बी आपाआ नकार कोअनारू,

¹³ जर आमू अविश्वासी बी होय तेबी पोन तो विश्वासयोग्य बोणीत रोतलू काहाके तो स्वतःआ नकार कोहू शकत नाहा.

उत्तम कारीगर

¹⁴ आव गोठीई ओर तियाहा आप का देव आगाडी निक्षून त्याआरी का शब्दापो लोळाई कोईत रोहू कायना याकोअता किबी फायदा उवनारा नाहा पोन होमलिनारे बिगडीत्लो जातेहे.

¹⁵ स्वतःहा परमेश्वरोओ आडीनारो अने एहलो काम कोअनारू बनविलो प्रयत्न को जो लाजआली ओवुहू कायना जो खोरो वचनाआ योग्य रीतीवाही कामोम लाविलो होय.

¹⁶ पोन अशुद्ध बडबडी पोरोत सेटे रो काहाके एहलो मांहे फासी अभक्ती मेहे वोदतो जानारू,

¹⁷ अने तियाआ वचन सोडित देदल्यो जखमोहोसे फैलीत जाइअलो हुमीनयुस अने फिलेतूस तिआमेरीते होय,

¹⁸ जे ओ कोत पुनरुत्थान ओत गोये होय सत्य सी भटकून गोये होय अने केताजोहो विश्वासाआ उलटो सुलट कोईत आपत्ले

¹⁹ तेबी पोन परमेश्वरोओ मजबुते पायु टीकित रोतलू अने तियापो ए छाप आप्योहो होय, “प्रभू आपाआ जे होय तियाहा ओलखीत्लू” अने “जो कोडु प्रभूऊ नाव लेहो, तो अधर्मा पासून वासित रोअलो”

²⁰ वोडो कोअमे फक्त हुना चांदी नाहा पोन लाकड़ाआ अने काद्वो बासणा रोतेहे कोड कोडले सन्माना कोअता रोतेहे अने कोड कोडले अपमाना कोअता रोतेहे.

²¹ जर कोडु स्वतःहा त्याहीजरोते शुद्ध कोअनारू ताहा तो स्नमानोवाही बासणा अने पवित्र ठरेल अने मालकाहा कामोम आवे अने हर एक हाजा कामा कोअता तीयार उवे.

²² जुवान्याआ वासनाम रोत सेटे पळ अने जे शुद्ध मोनाकोईत प्रभूऊ नाव लत्ले त्याआरी धर्म अने विश्वास अने प्रेम अने मेलमिलापो फासाडी लाग.

²³ पोन मूर्खता अने अज्ञानाच्या विवादा पासून जुदो रो काहाके ताहु मालुम होय त्यापरत झगडू निर्माण ओये.

²⁴ प्रभूउ दास लोळाई कोअनारू नाहा पोन आखा आरी सौम्यतेने अने शिकाडेलो निपुण अने सहन कोअनारू रोंहु जोवे.

²⁵ तो विरोध कोआनाराहा नम्रतेने सोमजाडनारू रोंहु जोवे कोडाआ मालुम का परमेश्वर तियाहा मोन फिरविला कोअता मोन आपही का ते पण सत्याहा ओलखीत लेही,

²⁶ अने याहा त्यापोरत तियाआ इच्छा पुरो कोइला कोअता सावधनि वाही शैतानाआ फांदासी सुटी जावा.