2 कुरिन्थि 9 - नोयरी नोवलू नियम

मददोओ प्रेरणा

¹ ओमे तिया सेवाआ विषयी जी पवित्र माहु कोअता कोअयी जाहो माहु तुमामे लेखिलो गोरोज नाहा.

² काहाके आय तुमाआ मोनोमेहे तीयार ओवेए ओलखीत्लू याकोअता आय तुमा बारामे मकिदुनियाच्या रोनारा आगाडी गर्व देखाडत्लू का अखयाचे मांहे होमला वोरोन तीयार उवे होय अने तुमाआ उत्साहाने अने जास्तीज जोह उभे कोल्यु होय.

³ पोन आय पायहोहो यकोअता मोकल्यीत होय काआ आमू जो गर्व तुमाआ विषयी देखाड्यो होय, तो आव गोठीमे व्यर्थ ओवुहू कायना पण जेहलो आय कोयु तेहलूज तुमु तीयार रो,

⁴ एहलो उवूंहू नाहा का जर कोडु मकिदुनियाच्या रोनारू माआआरी आविलो अने तुमामे न तीयार ओवल्यु पालीलो ताहा ओवुहू सेकोहो का आव खात्रीचे काहाके आमाहा ओ कोयु नाहा का तुमु लाजआली उवूंहू जोवे.

⁵ त्यापोत आय पायहोहो ए विनंती कोईओलो जरुरी होमज्ये का ते पेलरोत तुमापोओ जाहू जोवे अने तुमाआ उदारता कोयलो फोल ज्यावीरूढ पेलरोत वचन आप्लु गोये ओते, तीयारी कोईत मेकजी का ओ दाबावु नाहा ताहा उदारतेच्य फळापरत तीयार उवे.

हाजा दान दाता

⁶ पोन ए गोठी होय का जो कोम उरत्लु तो थोडो वाडत्लु; अने जो जाखो उरत्लु तो जाखो वाडत्लु.

⁷ हर एक जोओ जेहलो मोनुमे विचार कोअनारू तेहलूज दान आपलो कुरकुर कोईत नाहा अने जबरीवाही पण नाहा, काहाके परमेश्वर खुश आपनारा प्रेम कोअत्लू.

⁸ परमेश्वर आखे एहलाम कृपा तुमामे जाखो कोईत आपोहो जीमेहे आखे गोठीमे अने हर एक टायमोमें आखे किबी तुमामे गोरोज होय तुमापोओ रोंहु जोवे अने हर एक हाजा कामा कोअता तुमापोओ जाखो किबी रोंहु जोवे.

⁹ जेहलो लेखिलो होय, “तिये वेर्यु, अने गोरब्योहो दान आप्लु, तियाआ धर्म कायम टीकित रोही”

¹⁰ कोईत जो उरणाराहा कोमाय अने खाअलाकाजे भाकर आपोहो तो तुमामे बी आपी अने तियाहा फळदृपी कोअनारू अने तुमाआ धर्माच्या फोलोओ वोडावे.

¹¹ तुमु हर एक गोठीमे आखे एहलाम उदारतेसाठी जे आमापोरोत परमेश्वरोओ धन्यवाद आपोहो तीयाम श्रीमंत बोणीत जा.

¹² काहाके ए सेवा पुरो कोलाकोता पवित्र लोकांची च गोरोज पुरो ओते एहलो नाहा माहापो रोत परमेश्वरोओ पण जास्तीज धन्यवाद ओतू.

¹³ काहाके आव सेवेला प्रणाम स्वीकारीत परमेश्वरोओ गौरव प्रकट कोअत्लू का तुमु परमेश्वरोओ मसीहीई सुवार्तेला मानीत तियाआ प्रती समर्पित राहतात त्याची ए आखा आरिजे मदत कोअलाआ औदार्य प्रकट कोअता.

¹⁴ अने ते तुमा कोअता प्रार्थना कोअता अने यकोअता का परमेश्वराने तुमापो वोडी कृपा कोअयी होय तुमा बारामे लालसा बाळगतो

¹⁵ परमेश्वरोओ तियाआ तिया दानोंओ जे अवर्णीय होय स्तुती होय.