1 तीमुथियुस 3 - नोयरी नोवलू नियम

अधक्षओ योग्यता

¹ ऐ गोठ सत्य होय का जो अध्यक्ष उवीला इच्छा कोय तो हाजा कामाआ कोअता इच्छा कोअतु होय.

² ओ आवश्यक होय का अध्यक्ष निर्दोष रोंहु जोवे एकाच बोहई माटी रोंहु जोवे स्वतःहा आवरीनारू, सुशील होबे पावनाय कोअनारू अने शिकाडेलो निपुण रोहूजवे.

³ पियक्कड, अने झगड़ालू कोअनारू नाहा पोन सौम्य अने लोळाई कोअनारू नाहा अने द्रव्य लोभी कायनेते.

⁴ आपाआ कोअमे हाजी व्यवस्था कोईत होय अने आपाआ पोर्या सोर्याहा आखे जाखोज तेणे आधीन मेकीत होय.

⁵ जायोआ कोडाआ आपाआ कोरीज व्यवस्था कोअला मालुम ने ओय, ताहा परमेश्वरोओ मंडळीची राखावली केहली कोअही?

⁶ फासी ओ का नवो शिष्य कायनेते, एहलो उवूंहू नाहा का घमंड कोईत शैतान होस दंड तियाहा जोडीत.

⁷ बारथेए माय बी तियाआ निंदा उवूंहू नाहा, तिये शैतानाआ फांदोम फसुहु नि जुवे.

सेवकोओ योग्यता

⁸ तेहलूज सेवक काजे बी जाखोज रोंहु जोवे बेन सोबे, पियक्कड, अने अनीतीई पोशो कमावि कोअता लोभी कायनेते,

⁹ पोन विश्वासाआ रहस्याहा शुद्ध विवेकाने हाजूहोय मेकुहू जोवे.

¹⁰ अने ओ पेल्लू परीक्षण कोअला जोवे अने जर निर्दोष निघाल्यू ताहा सेवकाआ काम कोईलो.

¹¹ याकोईत बोई बी जाखोज उवूंहू जोवे, दोष लागाडणारी कायनाहा, पोन सावध अने आखे गोठीमे विश्वासयोग्य ओये

¹² सेवक एकुच बोहई माटी रोहू जुवे अने पोर्या सोर्याहा अने आपाआ कोओ हाजी व्यवस्था कोअनारू रोहू जुवे.

¹³ काहाके जो सेवकाआ काम हाजा प्रकारे कोहू शकतो तो आपाहा हाजो जागा अने तिया विश्वासा जो ख्रिस्त येशुपोओ होय वोडो हिमंत मेलविलो.

महान रहस्य

¹⁴ आय ताअही वेगु आविलाआ आशा मेकोहो पोन याआ गोठी याकोअता लेखत्लु,

¹⁵ का जर माहु आविला वाअ ओवयू ताहा होमजीत जाअलो का परमेश्वरोओ परिवारोमे जी जिवंत परमेश्वरोओ मंडली होय अने जो खराआ स्तंब अने गुडू होय तीयाम केहलो वागणुक कोअला जोवे.

¹⁶ यामे शंका नाहा का भक्तिई गूढ जाखोज होय म्हणजे तो जो डील प्रकट ओवयू आत्माम धोर्मी ठरवील्यु, स्वर्गदूताहा देखायू, दिहरे जातीमेहे तिया प्रचार ओवयू, जगात तियापो विश्वास कोअयु गोल्यो अने गौरवात उसे विशिलो गोल्यो.