1 तीमुथियुस 2 - नोयरी नोवलू नियम

आखा कोअता प्रार्थना

¹ ओमे आय आखाआ पेल ओ आग्रह कोअहो का विनंती अने प्रार्थना अने निवेदन अने धन्यवाद आखा माहाआ कोअता जाय.

² राजा कोअता अने उच्च पदोवाला कोअता का आमाहा विसाक अने शांती लेतजा आखी भक्ती अने गंभीरतेने जीवोन जीविल जोवे.

³ ओ आमाआ तारणारा परमेश्वरोओ हाजो लागेहे अने योग्य पोन होय,

⁴ जोओ इच्छा कोअत्लू का आखे मांहाआ तारण उवूंहू जोवे अने ते सत्याहा वारुहू ओलखीत लेई जोवे.

⁵ काहाके परमेश्वर एकुच होय अने परमेश्वर अने मांहोप रोत पोन एकुच मायतोमे होय म्हणजे ख्रिस्त येशु जो मांहु होय.

⁶ जीआ स्वतःहा आखाआ छुटकारा किमोत आपित आप्यी तियाआ साक्ष योग्य टायमोमें आप्यी गोयी.

⁷ आय खोरो कोत्लू खोटो गोगीत नाहा का आय याज उद्देशावाही प्रचारक प्रेषित अने अन्यजातिई मांहो कोअता विश्वास अने खराआ मास्तर निवाडलु कोअयु गोल्यो.

कलीसिया मेहे बुई अने माटीही निर्देश

⁸ त्यापोत लागेहे का हर एक जागे मांहो आअडित कोईत नाहा अने वाद सोडीत पवित्र आथे विसित प्रार्थना कोईत रोअलो.

⁹ तेहलूज बोई पोन स्वतःहा फेडीत अने शंका न कोअता होबा आपी एहलो कापड़ावाही स्वतःहा समजाडीलो ताहा सिंज्ये गुफिलो किंवा हुनो किंवा मोत्याआ कापडावाही सजाडीलो कायना,

¹⁰ पोन हाजा कानोवाही होबाडू काहाके परमेश्वरोओ भक्ती कोअनाऱ्या बोअयीही ओच योग्य होय.

¹¹ बोंई ठावकाज अने पुरो आधीन तेणे शिकिलो होय.

¹² आय कोत्लू का बाआओ हिकवीही कायना अने माट्यापो आज्ञा सालाडहू कायना पोन ठावकू रोअलो.

¹³ काहाके आदम पेल्लु बनविल्यो तियाआ फासाडी हव्वा बोनाडी,

¹⁴ अने आदम फोसित गोयू नाहा ताहा हव्वा भूलात पोडीत अपराधी उवी.

¹⁵ तेबी पोन बुई पोऱ्याहा जोल्मो आप्लु ताहा तारण जोडे जर ती स्वतःहा फेडीत विश्वास प्रेम अने पवित्रओ स्थिर रोली ताहा.