1 पतरस 5 - नोयरी नोवलू नियम

झुंडोओ गुवाल्यु

¹ तुमा मेहे जो डायु होय, आय तियाआ हार्कू डायु अने मसीहाआ दुःख हा साक्षी अने प्रगट ओवनारी गौरव मेहे सहभागी ओत तियाहा सोम्जाडत्लू होय.

² का देवाआ ती झुंड, जी तुमाआ माय होय हम्बालीलो; अने ओ तेहलो नाहा परंतु देवाआ इच्छा नुसार हाजो, अने द्रव्य लाभजाखो नाहा ताहा मोन लागाडी को.

³ जे मांहे तुमामे होपीलो होय, तियापो अधिकार नाहा कोहू, परंतु तिया झुंड कोअता आदर्श बन्यो.

⁴ जायोओ बाह्हू पालनारो जोडयो उवे, ताहा तुमामे गौरवोअ मुगुट आप्या जानारू जो कोमजनार नाहा.

परमेश्वरोहो समर्पित कोअलोओ अने शैतानो विरोध कोअलोओ

⁵ याकोईत ऐ जुवान्या, तुमु पोन डाय अधीन रो, परंतु तुमु आखा आखे एक दिहरापो सेवा कोअता, नम्रतारूपी कोमोर बाधित मेका, काहाके “देव गर्विष्टाना विरोध कोअत्लू, परंतु लीलापअ कृपा कोअत्लू”

⁶ यकोअता देवाआ ताकदवान आथे निसे लीन तेणे रो, ज्याही तो तुमामे उचित टायमोपो उचो कोअनारू.

⁷ आपाआ आखे चिंता तियापो टाका, काहाके तो तुमाआ कालजी लेहो.

⁸ सावध रो, अने जागतू रो; काहाके तुमाआ विरोध कोनारो शैतान गोरोजनारो सिहा होस आव होदिला मेहे रोतलू का कोडाआ फाडीत खाही.

⁹ विश्वासामेहे दृढ उवनारा, अने ओ होमजीत तियाआ फासाडी को का तुमाआ पाही लेतजा जगत मेहे होय ऐहलोच दुख सहन होआता होय.

¹⁰ ओमे देव जो अनुग्रह दाता होय, जिये तुमामे ख्रिस्तामेहे आपाआ अनंत गौरव कोअता हादाडल्यो, तुमाआ थोडो टायमोपो रोत दुख सहन कोइलाआ ओवतु खुद सिद्ध अने स्थिर अने ताकदवान कोअही.

¹¹ तीयाज पराक्रम कायम रोय आमेन.

आखरी अभिवादन

¹² आय सिलवानुस आथे, ज्याहा आय विश्वासाम पाही होमजीत्लू, संक्षेप माय लेखित ताहु होमजाव्ये होय, अने ए साक्ष आप्यी होय का देवोओ खोरी कृपा एज होय, यामेहे हीदू रो.

¹³ जो बाबेलाह तुमाआ होस निवडाविले मांहे होय, तो, अने माआ पोऱ्या मार्क तुमामे सलाम कोटला.

¹⁴ प्रेमोओ चुंबनाणी एक दिहराहा सलाम को तुमु आखाहा, जे ख्रिस्ता माय होय, शांती मिलीअलो रोजी.