San Marcos 4 - Wounaan Meu

Wounau nemjĩir dau phothurtarr ag nem ĩgkhaa

¹ Deeu ũmaai Jesuu Galilea thʉrrdo igaau Ẽwandam iek õrag jaaubaadejim aajem. Mag irua jaau sim ũurwai, sĩi õor pooma ich bigaau pos phʉʉrbaadeewai, aig bote sĩerr ee waaidʉwia, do jãrraapai oo joisijim aajem, jũrr mammua jawaag. Magbaawai õor pom mag thʉnarrau durrpaimuata i iek ũr naajim aajem.

² Mag mos igaau õor pos thʉnʉmʉg ejemplodampa jaaumamua, —Mua pãrag nem ĩgkhaadam jaaukhim; wajapha mʉ iek ũrbat ajim anʉm.

³ Maimua magjim aajem: —Biek ãb, woun ãb trigo dau phoon majimgui ajim anʉm.

⁴ Mag mawi chi nemjĩir dau irua photarr, ãaurag bʉ diichjem ee burrjim aajem. Magbaa nemchaain beewia sĩi thumaa khokhʉʉipʉijim aajem.

⁵ Maimua ãaur khʉʉn sĩi mokpor jojoodog eeta burrjim aajem, ajappai jẽb chukhu sĩerr ee. Makhʉʉnan chi tharrpheen ʉu jopcha tharrphejim aajem.

⁶ Mamʉ mag durrkhu ʉ̃rʉʉ sim iekhau pod ierr khaar jẽrkhaba ʉ̃rʉʉta khaarkha khekhed arr aawai, ed pechag wʉʉbaadeeu, sĩi e nanauk aademua phuabaadejim aajem.

⁷ Maigmua ĩchab tagam photarr, miudo arr ee burrwia, chi miiuta nemjĩir khãaijã bãau khaphí bãauwi, sĩi chi nemjĩirdam ichdeuta por pʉreu ich magpai dau aphʉʉ nʉisijim aajem, sirphʉg ee ag gaai jopjã jopba.

⁸ Mamʉ tagam ʉu jẽb wajaug ee burrtarran wajaug oberwia ʉu nem ajaug sĩi phur jopjim aajem, nem bich dapag maimuajã bich thʉʉ, maimua pogkha bich daii; mamʉ mag sĩsidʉm chan bʉ̃ʉrjã chi vano chukhu.

⁹ Mag ĩgkha obaadeewai aig ich iek ũr narr khʉʉnag, —Keena, jʉ̃g ʉ̃rʉʉnaa chamʉg nem ĩgkhaadam mua jaaubarm wajapha ũrbat ajim anʉm amag.

Khanthee ejemploouta Jesuu mag nem jaaujeejĩ

¹⁰ Mag Jesús aig õor pos thʉnaawia ya õor jigdʉdʉ khabaadem ee, õordam agtha i dakhapai i khapeen dʉi ãba ohoodo narr khʉʉnau khap aag irig jeeujierram aajem: —Ma chaig pua nem ĩgkhaadam jaau sĩerrau ¿khani jaau simma? Marag jaaubá ajierram anʉm, wajapcha khaphʉ aag ithee.

¹¹ Magbaa Jesuu amag magjim aajem: —Pãrau khaugam khõsi ũr naawai mʉchdeun warre pãrag khaphʉ api chirʉm, jãgata Ẽwandam õor thãar ee sĩeicheejẽ. Pari ar i iek bʉ̃ʉrpaijã ʉkhabam khʉʉnag sĩi nem ĩgkha nʉmuapaita jaaujemgui ajim anʉm,

¹² maagwai mag sĩi khajapham nem ĩgkhaadamjopai ũurwai par amau amach jʉ̃gʉucha ũrnaa amach dakhĩir nem wau nʉm oo nʉmjã oobamjo amkhĩir; mag nʉm gaaimua Ẽwandamagjã amach khaibag chugpaapi jeeuba aawai Ẽwandamau am khaibagjã chugpaaba amkhĩir.

¹³ Maimua amag, —¿Mʉg nem ĩgkhaadam merag chukhu khitʉmjã pãrau khaugbata nʉ? ajim anʉm. Mʉg phithur khaba simjã khaugba nʉm chan magan deeum nem jaaukhiinjã ¿pãrau jãga khaugjuma? ajim anʉm.

¹⁴ Cha mua nem ĩgkhaadam pãrag jaaubarmʉn mʉga simgui ajim anʉm: Chi nemjĩir dau pho nʉrrarr woun, woun ãb Ẽwandam iek õor ee jaau nʉrrʉmjota sim.

¹⁵ Maagwai mag chi nemjĩir dau õor bʉ diichjem ee burrtarr, sĩi ar Ẽwandam iek jaau nʉm ũurjem khʉʉnta jaau simgui ajim anʉm. Mag ũrnaa bʉchkhun khaugtarrdam meperau beewia por eem warre khĩir akhoopibapäaiwai ũrba arrjoo thʉba nʉmgui ajim anʉm.

¹⁶ Maagwai ãaur khʉʉn, chi nemjĩir dau ar mokpor jojoodog ee burrtarrjota naabahab ajim anʉm. Ẽwandam iek õrau jaau nʉm amach jʉ̃gʉucha ũurwai warrpemʉn amau khõchag ʉkha nʉm.

¹⁷ Pari mag chi nemjĩir wajap khaar khaba arrjo agtha Ẽwandam iek gaai ubʉ khaba naawai, mag Ẽwandam iek amachdeu ʉkha nʉm gaaimua amach phithurg aunaa, bigaaum khʉʉnaujã amach dʉi khaigbajujo aadeewai, sĩi warag agʉg oobamjo oberwi weetjemgui ajim aajem.

¹⁸ Maagwai ãaur khʉʉn sĩi nemjĩir dau miudo arr ee burrtarrjota nʉmgui ajim anʉm. Amau ĩchab Ẽwandam iek ũrm khõsi ũr nʉm,

¹⁹ pari ãsie deeu ewag khĩirjuajerram. Am khĩirjugan ãba riknaan khajuuta khĩirju sĩsidʉm, nem thum paraa aag. Mag khĩirju sĩsidʉm gaaimuata ĩchab, mag nemjĩir sirphʉg ee aadeewai sĩi dau aphʉʉ cheba nʉisierrjo, Ẽwandam iekjã thãraucha ʉkhawi i ithee nem wajapha wawaagjã serbiiba thʉnaabahab ajim anʉm.

²⁰ Pari ãaur khʉʉn thʉnʉmgui ajim anʉm, ar Ẽwandam iek thãraucha ʉkhawi, i dau na agchanaa, nem wajapha waaujem khʉʉn. Magʉm khʉʉnau ar Ẽwandamau nem wajapha waupi jaauwaijã nem par daúa ooba aajem. Mag waum khõsi wau naawai amachdeu nem wauju ayagpierr waaujem: ãaur khʉʉnau nemjĩir chi chemiejo dʉrrcha, ãaur khʉʉnau agpierrpai, maimua ãaur khʉʉnau bʉchkhunpai. Mamʉ thumaam khʉʉnau ichiita ichdeu khõsimjo aajem a jaaumajim aajem.

Lámpara nem ĩgkhaa

²¹ Mag jaautarr khur amag magjim aajem: —Pãrau oowai, ¿khaíu õtdau paanaa sĩi bathẽe eegar wa nem bʉ ee khãijã ausĩiujẽ? Õrau mag ausĩuba aajemgui ajim anʉm. Õtdaun paanaa dau garta ausĩiujemgui ajim anʉm, dau araraa oog.

²² Ich jãgta sĩebahab ajim anʉm agjo Ẽwandam iekjã. Ĩswe chan õrau agtha wajappai khaugba nʉm, jãga Ẽwandamau õor peerdʉ auju. Mamʉ jãg õt bʉʉg nem oowai dawaa oojemjo, mʉg atagta amau wajapcha khaphʉ nʉisijugui ajim anʉm. Chi mag khaugba nʉm khʉʉnan agtha khĩchag ee nem oo nʉmjota nʉmgui ajim anʉm, bʉ̃ʉrjã khaugba.

²³ Magwi ich Jesuupai, —Jʉ̃g ʉ̃rʉʉnaa cha mua jaau chirʉmjo abat ajim anʉm amag.

²⁴ Maimua magjim aajem: Pãrau mua nem jaau chirʉmta pãach thãraucha ʉkham khõsinaa, por ee aunaa warag khaugam khõsi amʉn, ich Ẽwandamau agjo pãar por opher apiju, ich iek ajapcha khaphʉ amkhĩir.

²⁵ Ar chi thãar onee ũrm khõsi ũr nʉm khʉʉnag Ẽwandamau warag khĩirjug deejugui ajim anʉm, ich iek khapcha amkhĩir. Mamʉ ar ũrmaphapai ũr nʉm khʉʉn khĩirjug eemʉn, cha mua jaau chirʉmjo deeu ich iek sĩepiba, khecheu aumajugui a jaaumajim aajem.

Nemjĩir dau bãaumam ag nem ĩgkhaa

²⁶ Mag jajawagmamua ĩchab ich Jesuupai, —Pãrag deeum ejemplodam jaaukhimgui ajim anʉm, jãga aajẽ õrau mag mʉ iek ʉkham khõsi ʉkhawi amach thãar ee aauwai. Mag mʉ iek amach thãar ee au nʉmʉn, woun ãbmua nemjĩir daudam jĩir sĩubarmjota simgui ajim anʉm.

²⁷ Mag jĩir sĩubaawai tharrphewia edaram magwe bãau eheekham. Mamʉ mag bãau eheekham chan chi jĩirtarraujã bʉ̃ʉrjã khaugba sim, jãga mag ich appai bãaumamua ʉ̃gthaa papagmá.

²⁸ Maan mag simʉn, ya jẽb ee sĩewai chi jẽbeuta ich appaimua mag bãaupi sim khabahab. Nacha tharrphewi bãau sim, maimua dʉrrcha aadeewai bi phũphũid aadewi ũhũi joisim.

²⁹ Maimua mag thʉnʉʉ awi ya phur aadem. Mag phur aadeewai thumaam khʉʉnau ya khaphʉ nʉmgui ajim anʉm, thʉʉju aai aadem. Magbaawai thʉʉwi deg paa thʉnʉʉujem. Ich agjota simgui ajim anʉm ĩchab mʉ iekjã: Õrau khaugmampierr bãbãwagmamjota sim, warag ich Ẽwandamau khõsimjo wenʉrraa khaphʉ paaukhamaawai.

Nemjĩir mostaza dau ag nem ĩgkhaa

³⁰ Jesuu mag jaaumamua, —¿Pãrau khaphʉ nʉ, jãga sim abarí Ẽwandam iek mua jaau chitʉm, maimua khanjota sim a mua pãrag jaaubarkhiin? ajim anʉm.

³¹ Mʉg mua jaau chitʉm iekhan, mostaza daudam woun ãbmua ich dikhu gaau jĩir sĩubarmjota simgui ajim anʉm. Ichta nemjĩir daudam thumaam khʉʉn khãaijã bʉ̃rʉʉcha khitʉm.

³² Pari mag bʉ̃rʉʉ khitʉmta jẽb ee jĩir kherbarmʉn sĩi pabʉ pom ãdee bãaujem. Magbaawai nemchaain beewi chi piu gaai amach di eeujem. Ich agjota simgui ajim anʉm ĩchab mʉg Ẽwandam iek mua pãrag jaau chitʉmjã: Mʉʉgwaiwe chan khapan khábata ʉkha durrum; pari mag durrumuata warag nem pom aaidʉbapäaiwai õor khapankham khʉʉnauta ʉkhaju a jaaumajim aajem.

Jãgwi ejemplo jaaumamuata Jesuu nem jaaujeejim aajẽ

³³ Mag ejemplodampa jaaumamuata Ẽwandamau maach peerdʉ aaujem iek Jesuu jaaujeejim aajem, magʉm gaaimua wajapcha khap amkhĩir.

³⁴ Mamʉ ejemplo chuk chan mag õor pom wejomʉg bʉ̃ʉrjã nem jaauba aajeejim anaabá. Mag ejemplodamaupa nem jaaumatarrta ich khapeen dʉi amach appai aadeewain deeu wajapha amag jaaujeejim aajem, wajapcha khap amkhĩir.

Jesuu phũ dʉi phũas thumbapitarr

³⁵ Ich ag edpai ya kheeuraa aadem ee, Jesuu ich khapeenag, —Wettarrau ajim aajem, do khĩijãr thʉrrdo igaau.

³⁶ Maimua chadcha õor aig narr khʉʉn phepʉawi, ya ich Jesús bote ee waaidʉwia oo wejorr aawai, chi khapeenau i joo arrjim aajem. Mag am wetum dʉi deeum bote aig narrjã agjo am dʉi wetjim aajem.

³⁷ Mag am dojãrr paaukha phobaaderr agtha pom khaba nʉm ee, phũ theeg webaademua sĩi phũasdau baupa joisijim anʉm. Mag phũas baupa aademua bote ee phũasdau sog bebeekhamua ya chi boteeu ãwatbajujo ierrpamaa ajim anaabá.

³⁸ Mamʉ mag nʉm ee ich Jesús bote khua porkhau gaai sĩiuba khãi jorrajim aajem. Magbaawai i khapeenau jãphierr nʉm iekhau i phiriupʉiwia irig, —¡Maestro, phiidʉbá! Pua chan mʉg maach khoomamjã khaugbahab ajim anʉm irig.

³⁹ Magbaa Jesús phiidʉwia mag phũ theeg thʉnʉmʉg meeurrau sĩunaa ĩchab phũas meeukha thʉnʉmʉgjã “Thumbabaad” abaawai, warre dojã meuu sĩsijim anaabá.

⁴⁰ Magwi ich khapeenagta, —¿Khan jãgwi pãar jãg atcha jãphierr nʉma? ¿Pãrau mʉ mʉg pãach dʉi mʉ chitʉmjã khaugbata nʉ ajim anʉm, jãgcha jãphierraag?

⁴¹ Jesuu amach dakhĩir mag phũas dʉi phũpa meeukha thʉnarr thumba atham oowia dauderraa nʉm iekhau, “Keena, ¿mʉʉn khanim wounta jãg phũujã phũas dʉimua i ipierraa nʉma?” a jejeeu aajeejim anaabá amach wir aigpai.