Hechos 8 - Wounaan Meu

¹ Maagwai ich Saulooujã ĩchab ich paarmua Esteban thõopim khõsi ʉdʉraa thõopʉipijim aajem. Mag Esteban thõotarr aigmua atagta õrau Jerusalén phobor ee chi ʉkha durrarr khʉʉn wajappha dau aug waujierram aajem, am ẽudee ẽkhanaa pʉrkha aumamua. Mag amach khapeen pʉrkha aumam oobaadeewai thum aaidʉ phobaadejim aajem, Judea durr maimua Samaria eem magwe. Ãba ich Jesuucha doce jʉr autarr khʉʉnpaita chaaug wetba, ich ag phobor eepai obʉg nʉisijim aajem.

Sauloou chi ʉkha durrum khʉʉn ẽudee ẽkhaajerr

² Mag Esteban thõo pʉawi jũrr warm khʉʉn ẽudee mamagkhamich, jooin Ẽwandam dau na wajapha wenʉrraajerr khʉʉnau Esteban ʉ̃r bĩe nʉʉ awi aukherthurjierram aajem.

³ Am iek, magʉmich Sauloon sĩi nem khoojem ẽudeemjota ẽkha nʉrraajeejim anaabá, maach Por Jesús iek ʉkha durrum khʉʉn ẽudee ẽkhaawai. Mag nʉrrʉmua dipierr dubnaa, emkhooin dʉi ʉʉinpa ichdeu oomam khʉʉnan pʉrnaa, ajués eudʉdʉg arrwi, cárcel deg dubpʉimaajeejim aajem.

Samaria durr maach peerdʉajem iek jaautarr

⁴ Mamʉ ĩchab amach eugar mamagkham ee, Jerusalén phobormua deeum durrag dʉr wettarr khʉʉnau warag amach wenʉrrʉmpierr õrag maach peerdʉajem iek jaau wenʉrrajim aajem.

⁵ Jũrr mag jaau wenʉrrʉmua woun ãb Felipe anʉm Samariaag mawi mag durr phobor dʉrrchacharam ee maach peerdʉajem iek jaaumamua, “Jesuuta Ẽwandamau Cristo pʉiju aajerr pãrau nʉ nʉmʉugui” aajeejim anʉm amag.

⁶ Felipeeu mag jajawagmam õrau ãbam aig biirdʉnaa i iek ũrm khõsi ũurjeejim aajem. Mag i iek ũr nʉm dʉi ĩchab Ẽwandam jua theegau nem khĩir pogkhe wau nʉrrʉmjã amach daúa oo naajim aajem.

⁷ Õor pom mor ee ben khaigbam wai sĩsid arr khʉʉnjã monaaumaawai chi mepeenjã idaau ähäig jʉrpʉimaajeejim aajem. Mag nʉm dʉi ĩchab bʉ wedʉ wedʉ khitheem khʉʉnjã monaaunaa kha chʉkhʉ pod amach appai phiidʉba sĩsid arr khʉʉnpa monaaumaajeejim anʉm.

⁸ Irua nem wau sim amach daúa oonaa amach jʉ̃gʉucha i iekjã ũr nʉm gaaimua, mag phobor ee õor thum onee naajeejim aajem.

⁹ Mamʉ mag phobor ee ĩchab woun ãb Simón a thʉ̃r sim sĩejim aajem. Warr mag woun benkhʉʉn ajim aajem. Mag wounau Samariapienag jaauwai iita tagam khʉʉn khãyaujã ʉ̃rʉʉcha chirʉm a jaau nʉrrʉmua õor thum khũgur wai sĩejim anaabá.

¹⁰ Mag, thumaam khʉʉnau i iekhaawaijã ũrm khõsi ũurjeejim aajem, chaainaupa. Maimua i igwia jũrram khʉʉnau, “Mʉg wounaun chadcha Ẽwandam jua theegta ich gaai wai sim” aajeejim anʉm.

¹¹ Mamʉ amau mag irig ee aajerran, maan ag nawe mag ichdeu am dakhĩir ich ben khaugau nem parhooba wau simua sĩi õor thum ichig paa wai sĩerr aawai ajima.

¹² Mamʉ mag nʉm ee, jũrr Felipeeu maach peerdʉajem iek jaaunaa, “Ẽwandamagta ʉdʉraa dich Porkhapiju aai nʉm” a jaau sim dʉi ĩchab, “Jesucristota ich Ẽwandamaucha jʉr auwia maach peerdʉ aumkhĩir pʉijim” a jaaumam ũrphobaadeewai, ʉkhawi, emkhooin dʉimua ʉʉinaupa amach por choopimaajeejim anaabá.

¹³ Magbaawai ĩchab ich Simonaujã dʉi ʉkhawi, ich por choopiwia, warag Felipe kha ogdʉba sĩsijim aajem. Mag i kha ogdʉba nʉrrʉmua Felipeeu õrau ag na mag nem ooba aajerr nempa waumam oowia jũrr ich Simonta dauderraa sĩejeejim aajem.

¹⁴ Maimua mag nʉm ee, Ẽwandam i jaaumkhĩir ich Jesuucha jʉr autarr khʉʉnau Jerusalenmua ũurwai Samariapienaujã Ẽwandam iek ʉkhabarm a ũr athaawai Pedro Juan dʉi am aar pʉijierram aajem.

¹⁵ Maimua bardʉtkhaimawi mag Samariapien eeu ʉkha durrum khʉʉn kõit Ẽwandamag jeeujierram aajem, amagjã agjo Ẽwandamau ich Akhaar deebaawai ĩchab wai nʉisimkhĩir.

¹⁶ Maagwai chan agtha iwiir ãbmuajã Ẽwandam Akhaar chukhu naajim aajem, sĩi maach Por Jesucristo thʉ̃r gaaipai por choo narr aawai.

¹⁷ Mag chadcha Pedroou Juan dʉimua chi eeu ʉkha durrum khʉʉn ʉ̃r jua ausĩunaa Ẽwandamag jeeubaawain chadau Ẽwandamau makhʉʉnagjã ich Akhaar phẽs deejim aajem.

¹⁸ Mag Ẽwandam i jaaumkhĩir jʉr autarr khʉʉnau warm khʉʉn ʉ̃r jua ausĩubarmuapai makhʉʉnaujã Ẽwandam Akhaar au nʉm oowia amag phatkhon oopinaa magjim anʉm chi Simonau:

¹⁹ —Magan jãg jua theeg mʉrʉgjã ĩchab dee chirbat, mʉjã pãachjo amkhĩir. Magnaa, Mua pãrag phagjugui ajim anʉm, maagwai muajã pãar denjo õor ʉ̃r jua ausĩubaawai ĩchab makhʉʉnagjã Ẽwandamau ich Akhaar deemkhĩir.

²⁰ Magbaawai Pedroou irig, —Simón, ¿pua khĩirjuawai Ẽwandamau ich Akhaar deewai phatkhonauta per aaujeeba? ajim anʉm. Pua ajap dau ẽebaju atheen pʉʉn Ẽwandamau pʉch phatkhonpa isegbarjugui ajim anʉm.

²¹ Ẽwandam dau na pʉ o ajap khaba sĩewai pua chan pod maar denjo jãg nʉrraju khaba simgui ajim anʉm.

²² Jãg pʉch khĩirjug khaibag isegpʉiwia Ẽwandamag chugpaapi jeeubá; tale irua pʉ khĩirjug jãg sim ajapha paapʉiwi tag pʉ dʉi magʉm iek igbajugui ajim anʉm.

²³ Simón, pʉʉn chikhamnau wau nʉm oowi am denjo am khõchgau, sĩi kha onegjã chukhuta sĩerrʉmgui ajim anʉm, pʉch khaibagjã pʉaba. Mag khaibag isegba aawai ich aguapaita pʉ por obeerpiba pʉr wai simjo sĩebahab ajim anʉm irig.

²⁴ Magbaawai Simonau, —Keena, mʉ kõit jeeubathʉ̃ ajim anʉm, maach Por Ẽwandamag, eeu magba akhiin Ẽwandamau mʉ dʉi cha pãrau jaau nʉmjo adukhamgui ajim anʉm.

²⁵ Mag, Pedro Juan dʉi ewaa ʉkha durrum khʉʉn oon wetwi, amach daúa Cristo meewi iiu phiidʉtarr ootarrpa jaauwia, deeu Jerusalenag wetjierram aajem. Mag wetumua ĩchab Samaria durr phobordam nʉnʉidʉm ee õrag jãgata Ẽwandamau maach peerdʉ aaujẽ a jaau wenʉrraajeejim aajem.

Felipe woun ãb Etiopiapierr dʉi

²⁶ Magtarr khur Ẽwandam chog ãb ʉ̃gtharmua beewi Felipe iek irig i thʉ̃rcha thʉ̃rnaa, —Ar Jerusalenmua khʉdau õor chukhu ich mag ma sĩejem ee jerag pet ajim anʉm, khʉd jooi Gazaag ma sim ee.

²⁷ Magbaawai chadcha Felipe ag ipierr ichig khʉd jaautarr ee petajim aajem. Mag maa awia woun ãb Etiopía durrmua Jerusalén phobor ee Ẽwandamag jeeuthurwia deeu ich diig mam dʉi thẽujim aajem. Mag woun, ʉʉita Etiopía durr reikha sim ag garm ajim anaabá, chi thethem. Ichdeuta mag ʉʉi reikha sim den phatkhon thum chi ãkhaajem ajim aajem.

²⁸ Mag ich diig mamua japdijoo khitʉmta bʉ pʉʉrbaajem paar sim cabayou eudʉ arrum ee jup jorranaa, warrgur Ẽwandam i jaaumie Isaías khararrag ich Ẽwandamau ich iek phãpitarr ẽsapta thʉ̃r jorrajim aajem.

²⁹ Mag i ẽsap thʉ̃r jorrom ee, Ẽwandam Akharau Felipeeg, —Felipe, bʉ chʉphʉ manaa i ẽkha athá ajim anʉm.

³⁰ Magbaa chadcha Felipeeu bʉ chʉp mawia, ẽkha aunaa ũrimaawai, Isaías khararrag Ẽwandamau ich iek phãpitarr ẽsapta thʉ̃r jorrom ũrimajim aajem. Mag ũrimawia ich garmua chi Etiopiapierrag, —¿Pua pʉchdeu thʉ̃rmam khaphʉ chirʉ́? a jeeujim anʉm.

³¹ Magbaa chi japdeg jorromua, —Õrau maachig jaauju chukhum, ¿jãg maadeu khap abarju? ajim anʉm. Magwia warag Felipeeg ich japdeg waaidʉpiwia ich dʉi ãba juppijim aajem.

³² Mag chadcha jupimawi irua Ẽwandam iek thʉ̃r jorrarr gaai oowai mag sĩejim aajem: “Ovejadam chi thõojem di aar arrjemjo thõopäain arrjierram. Mamʉ jãg ovejadam khĩeb ich khaar thar arrumjã khĩuu kheraajemjo, ich jãg bʉ̃ʉrjã i ãaba khitajim iek chigaa iekhaag.

³³ I dʉi amachdeu ampierr ajierram, mamʉ ãbmuajã, ‘Jãan woun ajaphamʉu; ideu i khajapha sĩujujã’ abajim. Mag chaai chukhu khitʉm thõopʉitarr aawai, ¿jãga ewag pawijã mag ‘Jãkhʉʉn i chaainau’ abarju?” a phã sĩejim aajem. (Is. 53:7-8) Maata mag wounau thʉ̃r jorrajim aajem.

³⁴ Mag ich bigaau jupbaimaawai chi Etiopiapierrau irig jeeumamua, —Kake, mʉ ap chitʉm mʉrʉg jaaubá ajim anʉm. Ẽwandam i jaaumieu mʉg phãawai, ¿khai igwiata mag phãjĩ? ¿Ichpai igwia, wa deeum khʉʉnta jaau sim ajĩwa? a jeeujim anʉm.

³⁵ Magbaawai Felipeeu irig ichdeu thʉ̃r sĩerr gaaimua jajawagmamua khĩeb Jesuu maach peerdʉ aum khõchgau ʉdʉraa ich thõopitarrpa jaaudubjim aajem irig.

³⁶ Mag iyʉʉ wetumua dodam phʉʉr kherʉm aig paaukhabaimaa ich chi thethemua Felipeeg, —Kake, mʉg dodam paraa kherʉm aig nʉwe, ¿pua oowai mʉ por chooju jãg chirʉ́? ajim anʉm. [

³⁷ Magbaa Felipeeu irig, —Pua chadcha pʉch thãraucha ʉkha chirʉm khai, por chooju aaima ajim anʉm. Magbaa chi thethem garmua, —Muan chadcha thãraucha ʉkha chirʉmgui ajim anʉm. Mua khaphʉ chirʉmgui ajim anʉm, Jesuun chadcha Ẽwandam Iewaau.]

³⁸ Magwi warag chi carro dʉnʉʉu aunaa, amach numwe ʉʉrbagkhawia, jer do phʉʉr kherʉm ee wetwi, Felipeeu i por choopʉijim aajem.

³⁹ Mag por choo aaipawi deeu do eemua oberdʉtkhabaadem ee, dau perbarmjo arrau degolp Felipe chukkhu aadejim aajem, ich Ẽwandam Akharau athaadee. Mag i marr khaugbajieb mamʉ, chi Etiopiapierr warag onee ich maa arrag petajim aajem.

⁴⁰ Mag degolp chuk aadewi aigmua warp phobor Azoto anʉmta Ẽwandam Akharau Felipe athaadejim aajem. Ich maigmua warag phoborpierr jaaubaadejim anʉm, jãgata Ẽwandamau ich Chaai pʉijĩ thum ich iek ʉkha nʉm khʉʉn peerdʉ aum khõchgau. Mag Azotomua jaaubaaderr ich mag jajawagmamua deeum phobor Cesarea anʉm jaau barjim aajem.