Hechos 4 - Wounaan Meu

Pedro Juan dʉi chi thethemnaan na

¹ Pedroou Juan dʉimua agtha õor pom mag wejomʉg ijẽjẽbkham ee, am aig phadnaan beejierram aajem, Aai i jeeujem di thʉajem khʉʉn por dʉi saduceonaanpa. Mag saduceonaanau jaauwai, maach meewai maach akhaar iiuba aajem aajem.

² Mag beewi makhʉʉnau am dʉi meeukhabaichejierram aajem, Pedroou Juan dʉimua jãg Jesús iiu phiidʉtarrjota maachin thum iiu phiidʉtkhaju a jaau nʉm ũrchewia.

³ Mag warag am pʉrkha auwia cárcel deg phe arrjierram aajem. Mamʉ ya kheeuraa pam eeta mag pʉrkha deethurtarr aawai ich mam ãspagkhajierram aajem.

⁴ Mamʉ mag amach pʉrkha arrju nawe jaau durrarrdam õor pom mag thʉnarr khʉʉnau ũrtarr aawai ĩchab chi ʉkha narr khʉʉn khapanag emkhooin appai cinco miljo naajim aajem, ʉʉin dʉi chaainjã beerba.

⁵ Maimua ag noram ãspaau chadcha Jerusalén phobor ee ãba podpajierram aajem: Judionaan porkha nʉm khʉʉn, Ẽwandamag jeeujem degam khʉʉn jooin, maimua Ẽwandam i jawaag chi machnaanpa, thum ãba.

⁶ Mag tag naajim aajem: phadnaan thumaam khʉʉn por Anás anʉm, Caifás, Juan, Alejandro, maimua ĩchab mag phadnaan porkha nʉm khʉʉn khodnaanjã agjo.

⁷ Maimua Pedro Juan dʉi cárcel deg narr phe awaan mamkhĩir awi õor pʉijierram aajem. Mag pʉiwi phe au pierrwai amach jãrrcha dʉnʉʉutkhapinaa, —¿Khaíu jãg pãar jua theeg apijĩ a jeeujierram aajem amag, jãg woun bʉ ãkhãraa sĩerr monaaupäaig?

⁸ Magbaawai Pedroou Ẽwandam Akhaar ich gaai phẽs wai sĩerr aawai amag magjim anʉm: —Keena, pãar ar mʉg phobor ee chi porkha nʉm khʉʉn maimua ĩchab mʉg Israel durr Ẽwandamag jeeujem degam jooin, mʉ iek ũrbat, mua pãrag magkhimgui ajim anʉm.

⁹ Ar woun ãb mʉig bʉ ãkhãraa khitarr monaautarrta pãrau marag jeeu naabma, jãgata marau i monaaupʉijĩ a khap aag.

¹⁰ Mʉg Israel durr ee thumaam khʉʉnau khakhapdo amkhĩir, mua pãrag jaaupʉikhimgui ajim anʉm. Jãan mʉgta ajimgui ajim anʉm. Chadcha Jesús Nazaretpierr jua theegauta mʉg woun cha pãrau monakha oo nʉmʉn monaau sĩsim. Ich ag Jesús khabajieb ajim anʉm, ar pãrau pakuls gaai meerphe thõotarr. Mamʉ Ẽwandamau deeu i phiriu aujimgui ajim anʉm.

¹¹ Magtarr Jesús igwi khabahab, ar Ẽwandam iek phã sim gaai “Di eu narr khʉʉnau isegtarr dibigta jũrr chi di ãd jãrramkha sĩsim” a jaau sim.

¹² Magtarr aawai deeum woun mʉg jẽb gaai maach peerdʉju ayaam chan tag chukhumgui ajim anʉm. Mag Ẽwandamau maach peerdʉ aumkhĩir deeum khʉʉnagjã jaauba arr aawai ãba ich Jesuupai khabam chan pod õor amach pekau eemua peerdʉbamgui ajim aajem Pedroou.

¹³ Amachdeu mag Pedro Juan dʉi bʉ̃ʉrjã nem okag chukhu mag iekha nʉm ũrwia jʉ̃gderraa naajim aajem, mag estudio pomjã khaba sĩsidʉmta mag iekha nʉm ũrwia. Mamʉ amach wir aigpai, “Jãkhʉʉn jãg nʉmʉn, jãan Jesús dʉi wenʉrraajerr aawaita jãg iekha nʉmgui” aajeejim anʉm.

¹⁴ Mag nʉm dʉi amachdeu oowai chi woun monaau sĩsierrjã ĩchab am bigaau oo dʉnarr aawai pod jãan seukhaawaita mag nʉm ajujã khaba aajeejim anaabá.

¹⁵ Mag oobaawai amach Asamblea eemua chi Pedro Juan dʉi jopcha dawag jʉrkhʉʉipʉiwia amach appai iyʉʉ nʉmua,

¹⁶ —Keena, ¿mʉkhʉʉn wounaan dʉi maadeu jãga ajuuta jãg nʉma? aajeejim anʉm. Mʉg õor monaau nʉm ooba aajem chadcha. Amau jãgtarr Jerusalén phobor ee thumaam khʉʉnau khakhapdo thʉnʉm, pod maadeu “Jãan seukhaawaita jãg thʉnʉm” aju khaba nʉmgui ajim anʉm.

¹⁷ Mamʉ cha amachdeu jãg Jesús igwia jaau nʉm tag jaaupimaaugau, maadeu am ajap dakhãunaa tag magʉm iek jaaupiba jaaujugui ajierram aajem, mag jaau wenʉrrʉmua warag õor ee mag iek aaidʉpimaaugau.

¹⁸ Maimua mag khĩirju auwia, deeu amach aig thʉ̃rkha aunaa, chadcha amag tag bʉ̃ʉrjã Jesús igwia nem jaaupiba jaaujierram aajem.

¹⁹ Mamʉ amachig magbaawai Pedroou Juan dʉimua jũrr amag, —Pãrau khĩirjuawai, ¿jãga ajapcha sĩ ajierram anʉm, Ẽwandam dau na? ¿Ẽwandamau nem jaau sim ipierraa aju khãyau pãrau nem jaau nʉmta marau ʉ̃rcha ipierraa aju aai nʉwi? ajierram anʉm.

²⁰ Marau maach daúa oonaa maach jʉ̃gʉucha ũrtarr chan pod sĩi ich jãg jaauba sĩuju aai khaba nʉmgui ajierram aajem Pedroou Juan dʉimua.

²¹ Magbaawai chi thethem khʉʉnau sĩi am ajap dakhãunaa chig aba pʉapʉijierram aajem, õor pom thʉnʉmuajã warag am kõit iekhamjo Ẽwandamta tho iekha nʉrrjee thʉnarr aawai. Mag bʉ ãkhãraa khitarr monaautarr paar, thumaam khʉʉnau Ẽwandamag, “Ẽwandam, pʉjom chan mʉg jẽb gaai chukhumgui” anaajim aajem irig.

²² Mag chi bʉ ãkhãraa khitarr Ẽwandam jua theegau monaauwai cuarenta años atcha sĩejim aajem.

Chi ʉkha durrarr khʉʉnau Ẽwandamag juapá jeeutarr

²³ Mag amach chig aba obeerbapäaiwai amach khapeen nʉm aar wetwia jaauwimajierram aajem, thum phadnaan chi porkha nʉm khʉʉnau judionaan Asamblea ee agjo chi porkha nʉm khʉʉn dʉimua amach dakhãu iekhatarr.

²⁴ Chi di garm khʉʉnau mag ũrphobaadeewai ihãba Ẽwandamag jeeu nʉmua magjierram aajem: —Ẽwandam, pʉʉta maar Porougui ajierram anʉm. Pʉchdeuta mʉg jẽb wauwi, mʉg phũasjã waunaa ag ee nem sĩsidʉmjã ompaajim, edjãpa.

²⁵ Warrgar maach dau nawe pʉch Akharau pʉch chog David khararrag iekhapibaawai, irua pʉ dʉi khĩircha iekha simjo pʉrʉg, “¿Khan jãgwi jãg durrpierr õor meeukhaphoo thʉnʉ́, maimua par jãg maadeu nem igmaphamta wauju khĩirju sĩsidʉ́?” ajim anʉm.

²⁶ “Mʉg durr gaai chi porkha nʉm khʉʉn thum ãba iek deewi jũrr pʉ dʉi werbʉagjota khĩir khaugphobaadephʉmgui” ajim anʉm, “sĩi warag maar Por chi Mesías pʉchdeucha jʉr autarr ichaau am khõchgau.” (Sal. 2:1-2)

²⁷ ’Ẽwandam, magtarr aawai chadcha David khararrau jaautarrjo ich mʉg phobor eeta ãba biirdʉjim: Erodes, Poncio Pilato, ich mʉg Israelpien dʉi deeum durram khʉʉnpa; mag ãba biirdʉnaa maach Por Jesús bʉ̃ʉrjã pekau chukhu khitʉm pʉchdeu jʉr autarr khaibag wawaag.

²⁸ Magta chadcha warrgarwe pʉchdeu jaauwai mag i dau aphʉʉ aju a jaautarrjo, thum ag ee oberjimgui ajierram anʉm Ẽwandamag jeeumamua.

²⁹ Mag irig jeeumamua, Pua khaphʉ chirʉmgui ajierram anʉm, maar mʉg pʉch i jaaumkhĩir pʉchdeucha chogtarr khʉʉn dakhãu wai nʉm. Maar pʉ chognaanau. Pua warag maar khuphĩi apibá, ogkhaba pʉch iek jaau wenʉrraag a jeeumajierram aajem.

³⁰ Mor masim khʉʉnjã monaaunaa pʉch Chaai pekau chukhu khitʉm Jesús ag jua theegau nem maadeu ooba aajempa marag waupibá, magʉm gaaimua õrag pʉch jua theeg oomkhĩir a jeeumajierram aajem.

³¹ Maimua ya amau mag Ẽwandamag jeeu obaadem ee, ich Ẽwandamaupai am narr di sĩi sõsõi athajim anʉm. Mag di sõsõi atham dʉi Ẽwandam Akhaar am gaai phẽs aicheewai magtarr aigmua atagta warag bʉ̃ʉrjã ogkhaba, ich mag Ẽwandam iek jaau nʉisijim aajem.

Nem thʉnʉm chan ãbpaim den khabajim

³² Mag khapan Ẽwandam iek ʉkha thʉnarr khʉʉnan khĩirjug ãbanaa ĩchab o ãbata naajeejim aajem. Ãbmuajã ich nem wai sim, “Mʉch atheepaiujã” aba, ante magju khãyau, “Nem thum thʉnʉmʉn maach thumaam khʉʉn deneugui” aajeejim anaabá.

³³ Mag nʉm ee, am iek warag amach chi Jesuucha ich iek jaaumkhĩir doce jʉr autarr khʉʉnaujã maach Por Jesús iiu phiidʉtarr iekta warag iek khẽgkha jaauphobaadejim aajem. Maimua ich mag jaau wenʉrrʉm jaarjã Ẽwandamau thumaam khʉʉnag am dʉi ajapha apiejeejim anaabá.

³⁴ Am iek mag thum jẽb wai narr khʉʉnaujã amach jẽb perpʉinaa, di numí wa numí atcha khãijã paraa arr khʉʉnaujã warag amach di perpʉinaa, chi phatkhon Jesuu jʉr autarr khʉʉn aig jigamkhĩir aibeejerr aawai, am ee atcha dau aphʉʉ ichdeu nem ig simjã chukhum woun chan chukhu ajim aajem.

³⁵ Mag aipierrwai chadcha amau agdaujoo chi chukhu durrum khʉʉnag jigpäaijeejim aajem.

³⁶ Cha jaau nʉmjo, woun ãb sĩejim aajem, Levinaan eem José a thʉ̃r sĩerr, Chipre phʉram gaai thaabatarr. Mag woun ibʉʉr wauwia Bernabé a thʉ̃r wai naajim aajem ich Jesuucha doce jʉr autarr khʉʉnau. Bernabé aawai maach meúan “Okhĩirjug meeupiejem” a simʉu.

³⁷ Mag wounaujã ich jẽb wai sĩerr perpʉiwia, chi phatkhon aibeewi, Ẽwandam i jaaumkhĩir doce jʉr autarr khʉʉnag deechejim aajem, agjo jigpʉimkhĩir.