Hechos 16 - Wounaan Meu

Pablo Silas dʉi wetum dʉi Timoteo khapeerkha matarr

¹ Mag wenʉrrʉmua Pablo Silas dʉi phobordam Derbe anʉm barimawia maigmua jũrr deeum phobor Listra anʉmʉg wetjierram aajem. Mag phobor Listra anʉm ee ẽwan Timoteo a thʉ̃r sim sĩejim aajem, ĩchab Jesús iek ʉkhaajem. I ãd judeapie ʉʉi ajim aajem, ĩchab Ẽwandam iek ʉkhaajem; mamʉ i aai griego ajim aajem.

² Listrapien chi ʉkha durrum khʉʉnau Iconiopien dʉimua chi Timoteo eugar ajapha ig iyʉʉ aajeejim aajem, thumaam khʉʉnau.

³ Mag gaaimua Pabloou ich dʉi arrm khõchkhabaadewi ich dʉi eeurrjim aajem. Mag ich dʉi maju abaawai i meheu phʉʉrbichpʉipijim aajem, thumaam khʉʉnau i aai griegokha sim khaphʉ narr aawai mag phʉʉrbichba akhiin mag gaaimua ag perás judionaan narr khʉʉnau amach eugar khaigba iekham ugua.

⁴ Mag ereubaadewia amach wenʉrrʉmpierr phobordam nʉnʉidʉm ee mag Jerusalén phobor ee amach chi pornaan dʉi ãba biirdʉwia ẽsap phãnaa Antioquiaag deepʉitarr iek dee pʉamaajeejim aajem, amaujã ĩchab khaphʉ ag iek gaai jaau sim ʉʉrkhamkhĩir.

⁵ Amau mag jaau wenʉrrʉm gaaimua iglesiapierr õrau Ẽwandam iekta warag khõsi ʉkha nʉisijim aajem. Mag nʉm dʉi ĩchab warag chi Ẽwandam iek ʉkha nʉm khʉʉnjã ed eepierr khapanaacha paaukhamajim aajem ĩchab.

Khãaipi auwi Pabloog woun Macedoniapierr oopitarr

⁶ Mamʉ Ẽwandam Akharau amag Asiapienag chan ich iek jaaupiba arr aawai sĩi warppai phʉʉrdʉ wetumua Frigiapien ee dichwi, Galacia eejã dichwi, Misia durr barimajierram aajem.

⁷ Mam panaa deeum durr Bitinia anʉmʉg wetam igjim anʉm, mamʉ ich Ẽwandam Akharau ĩchab mamagjã wetpiba jaaujim anaabá.

⁸ Mag amachig wetpiba jaaubaawai sĩi mag phobor Misia anʉm dakha dichwia warag deeum phobor Troas anʉmʉgta beejierram. Maigta warrpem mʉ Pablo dʉi ãba oojim.

⁹ Mag Troas phobor ee maar ãba nʉmta, edaar Ẽwandamau Pablo khãaipi auwia irig woun ãb Macedonia durrmua beem oopijim aajem. Mag beewia mag wounau dawamjo i ʉ̃r dʉnʉʉuchewi irig, “Kake, mau Macedonia durr beewia maar khaigperbahur” ajim anʉm.

¹⁰ Mag ichig dawamjo iekhachetarr jũrr maachig ich Pablooucha jaaubaawai chadcha ich ag bʉrre marau maach nemdam khĩir khaugphobaadejim Macedoniaag ãba wetaag. Ya maig marau khaphʉ aphobaadejim, chadcha ich Ẽwandamauta maach pʉi sim, ich iek õrag jaaumkhĩir.

Pablo Silas dʉi phobor Filipos anʉm ee

¹¹ Troas phobormua maar jap ee paaukhawi khajapha ereubaadeeu warre dojãrr phʉram Samotracia anʉm maar barjim; maigmua audʉtkhaau ag noram jũrr Neápolis barjim.

¹² Mag Neápolimua jũrr bʉʉu paaukhawi Macedonia durram phobor chi ʉ̃rʉʉcharam Filipos anʉm maar barjim. Ma, Romapien phobor ajim. Maig paawai maar khãaidam khapanaa naaimajim.

¹³ Agtha maig nʉm ee biek ãb jua ʉ̃i nʉm edcha maar wetjim phobor igaau, jer do igaau, Ẽwandamag jewaag õor biirdʉajem aar. Maig ʉʉin ãba biirdʉ thʉnarr aawai ohoodo nʉmua marau amag jaauphobaadejim Ẽwandam iek.

¹⁴ Makhʉʉn ʉʉin ee ʉʉi ãb Lidia a thʉ̃r sim sĩejim, phobor Tiatira anʉm eem. Ichdeu put khichphe khĩir thethemnaanaupai jũajem ooimʉ khanaa peerjeejim aajem. Mag ʉʉirau ĩchab ag nawe Ẽwandamag jeeujeejim aajem. Mag Lidia anʉmua Pablo iekhamam ũr sĩerr aawai maach Por Jesuu warag i thãar sõsõii apijim, Pabloou ich iek jaaumam ajapha thãraucha ʉkhamkhĩir.

¹⁵ Magbaawai chadcha ʉkhawia, thum ich di aiguim khʉʉnaupa amach por choopiwi, mag ʉʉirau ich garmua marag, —Pãachdeu oowai chadcha mua maach Por Jesús iek ʉkha ʉmjoo oo nʉm khai, magan mʉ di aar wetwia mʉ aig khãibajet ajim. Mag ʉdʉʉr maach pʉiba khãibajeje nʉʉ paawai chadcha maar thʉbagkhajim.

¹⁶ Mag khurjã ich agjo deeu maar jer do igaau Ẽwandamag jeeujem aar maach paat jewaan wetumta, ʉʉi ãb daupeer maar khĩirphee oberchejim. Mag ʉʉi dosãt dʉita khapeerkha sĩerr aawai dau bʉ̃ʉm khʉʉn denjo nem magjujã khaphʉ ag nawe ichdeuta jajaau aajeejim. Mag nem jaau simua sĩi chikham chogkha phidkha sĩerr aawai ich papnaan athee phatkhon pom gaanjeejim aajem.

¹⁷ Mag oberchewia, maar Pablo dʉi wetum ẽudee dʉi ẽkha nʉrranaa, nem theeg ähäakhamua bigaaum khʉʉnag, —Mʉ iek ũrbathʉ̃, mʉkhʉʉn wounaanan cha Ʉ̃gthaa Phuu Nʉm ag chogkha nʉm khʉʉnauwai aajeejim. Nau amau pãrag jaauju, jãga Ẽwandamau õor amach pekau eemua peerdʉ aaujẽ a jajaau aajeejim.

¹⁸ Mag maar ẽudee ähäa phʉrereukhamjã pʉaba, khãai khapan aadeewai, Pabloou khõchkhaba ewag phʉʉrba chi daupeer khĩirphee dʉnʉʉunaa, chi meperag thet khĩesir iekhajim. Mag iekhamamua, —Jesucristo jua theeg thowia mua pʉrʉg iekha chirʉm. Jopkhaa jãg ʉʉi kha ogdʉ pʉawia pʉchta sĩiubaad ajim ich Pabloou. Magbaa chadcha ag bʉrre sĩiubaadejim, chi dosãt.

¹⁹ Mamʉ chi papnaanau oowai tag am chogau am athee pod phatkhon ganba aadeewai meeukhawia, Pablo Silas dʉi pʉrkhanaa, chi thethemnaan ãba biirdʉajerr di aar arrjierram.

²⁰ Mag arrwia chi thethemnaanag, —Mʉkhʉʉn judionaanaun sĩi õor meeukhapijuuta jʉr wenʉrrʉmgui aimajierram anʉm, amachdeu nem jaau nʉm gaaimua.

²¹ Maach Romapien aawai pod maadeu amau nem jaau nʉm ʉkhaju khaba, ni amau nem waupi jaau nʉmjã wauju khaba nʉmgui ajierram anʉm.

²² Mag chi Pablo Silas dʉi pʉrkha aipierrum oophobaadeewai õor pom am aig pos aphobaadejim aajem. Magbaawai chi thethem khʉʉnau ajués soldaaunag am khajũa ẽerkhapi jaaunaa ich jãg khajũa kharraa wʉpi jaaujim anʉm.

²³ Mag wʉ wai nʉʉ awia, cárcel deg dubkhapʉinaa, chi cárcel di thʉajemʉg ajapha thʉapaar jaau pʉajierram aajem, oberpim ugua.

²⁴ Chi thethemnaanau ichig mag jaau pʉabaajeewai chará, am iekhan ierrgajãrcha thuur sim aar am arrnaa bʉdagpierraa pa wʉʉ wau sĩsidʉm ee am bʉ khõokha sĩujim aajem, ich Pabloou Silas dʉimua jaauwai.

²⁵ Mamʉ edacha pamjã amau agtha Ẽwandamag oraanaa meukhaarpa au naajim aajem. Mag amau Ẽwandamag jeeunaa meukhaarpa au nʉm ag ee presonaan narr khʉʉnaujã ũr naajim aajem.

²⁶ Am mag onee meukhaardampa ähäakhamta, am iekhan degolp duk abarmʉn, ʉʉur theeg duuibaademua waa puertdi weeudʉtkhabaadem dʉi presonaan jʉ̃kha thʉnarr cadenpata sĩi ẽedʉ khʉibaadejim anaabá.

²⁷ Magbaadem ee ĩchab chi cárcel di thʉa khãi sĩewia phiirkhãubaadewi oowai, puertdi thum weeudʉtkha thʉnaajim aajem. Mag oobaawai presonaan thum dʉrmid phobaadempii awi, ich espaar jẽunaa, ichdeupai wir aig ya ich thõopäaig ẽkha sĩejim anaabá.

²⁸ Mag wir aig ich thõogpam oobaawai Pabloou ijẽb aadewi irig, —Kake, oob wir aig pʉch chig a chiram ajim anʉm. Maar ãbjã oberba, maach thumaa agtha mʉig naabahaba ajim anʉm.

²⁹ Magbaawai chi guardiaau jopkharraa soldaaunag õtdau paa aibeepiwi, ag dʉi dubnaa, jãphierr ajaugau kha duui thʉnʉmua Pablo Silas dʉi nʉm bʉkhʉrr phõbkha thʉnaaimajim aajem.

³⁰ Maimua warag am dawag phe arrwi amag, —Keena, ¿mua jãga aju aai chirʉ́, Ẽwandamag mʉch peerdʉ aumkhĩir? a jeeujim anʉm.

³¹ Magbaawai Pabloou Silas dʉimua irig, —Ãba maach Por Jesucristo iek appaita ʉkhabá. Pua chadcha mag ʉkhamʉn, pʉchjã peerdʉwia pʉ degam khʉʉnjã peerdʉjugui ajim aajem amau irig.

³² Magwia warag irig maach Por Jesucristoou õor peerdʉ aaujem iek ajapha jaaumam dʉi ĩchab i dʉi ãbam deg naajem khʉʉnagpa jaaujierram aajem.

³³ Magbaawai ich ag bʉrre agtha ãspaju wají nʉwe mag wʉ wai nʉmua eu pom pedphematarrjã ichdeucha ʉwia benheeu phuurbaadejim anʉm. Mag chãddau ʉtarr khur ich por choopibaawai ĩchab tagam khʉʉn i dʉi ãbam deg naajem khʉʉnaujã amach por choopijierram aajem.

³⁴ Maimua am iek ich di aar am phe arrwi amag thach khomkhĩir audeebaawai amau khojierram aajem. Mag, ichdeu Ẽwandam iek ʉkhatarr gaaimua, ich degam khʉʉnpa thumaa onee aphobaadejim aajem.

³⁵ Maimua am iek ya ãspabaadeewai chi thethemnaan am phãarpi jaautarr khʉʉnau guardianaan jʉr auwia pʉijierram aajem, chi cárcel di thʉa sim aar wetwia Pablo Silas dʉi weeupi jaaumkhĩir.

³⁶ Magbaawai makhʉʉnau wetwi chadcha mag jaaubaimaawai chi cárcel di thʉau jũrr amag, —Chi thethemnaan pãar phãarpitarr khʉʉnau mʉrʉg jaaupäaiwai pãar weeupʉipi nʉm. Maagwai ya pãar oberju aai nʉmgui aimajim aajem.

³⁷ Mamʉ chi cárcel di thʉau amachig mag jaaubaawai, chi guardianaanjã agtha aig narr aawai, ich Pablo iek jũrr irua amag, —Maarjã Romapienta thumaam khʉʉn dakhĩir amau maar sĩi wʉ thʉnʉʉupiwi, ajapha khap aag jeeu oojã jeeu ooba, sĩi ag bʉrre cárcel deg maar phãarpi jaaujierramgui a chirajim aajem chi guardianaanag. Magtarrta, ¿khan jãgwia amau jam warppaimua sĩi pãar dʉita iek jaaupʉi nʉ, jũrr meraata maar obeerpʉimkhĩir? ¡Jãg chan ʉu khaba simgui! a chirajim aajem irua. Mag khãai maraun amachchata beewia, ich jãg õor dakhĩir maar phãarpitarrjo, amachigchata maach obeerpʉipim khõsi nʉmgui ajim aajem ich Pabloou.

³⁸ Magbaa wetwia chi guardianaanau ich mag chi thethem khʉʉnag jaauwimajierram aajem. Mag amachdeu Romapien a ũrbaawai ãsie jãphierr phobaadejim anaabá.

³⁹ Mag jãphierr nʉm ãba, warag beewia amag i chaigpiyaa aichejierram aajem jũrr. Magnaa dawag am obeerpinaa am iekhan ithũu amag, —Pãachta mʉg phobor eemua warag chawag ereubaadet ajim aajem chi pornaanau.

⁴⁰ Amachig magbaawai chadcha oberwia deeu Lidia di aar wetjim. Maimua maach thum tagam khʉʉndam Ẽwandam iek ʉkha durrum khʉʉnpa dʉi ãba biirdʉnaa, maar khĩir onee wawí wai nʉʉ awia, warag maar aigmua ereubaadejim.