Apocalipsis 22 - Wounaan Meu

¹ Mag oopitarr khur chi Ẽwandam chogau mʉrʉg dosĩg dau bʉ̃ʉ khitʉmjã oopijim, õor iiupiejem dosĩg. Mag dosĩg sĩi vidriojo sim Ẽwandam khu juupjem Cordero dʉi sim aarmuata ober sĩejim.

² Mag phobor eem kaaijã chi wajapcharam jãrr, maimua dosĩg ipierr, pabʉ naajim dohi numwe, õor ich mag iiu wenʉrrapiejem nemjõ bʉ. Mag nemjõon edaupierr ich mag che sĩerrʉm aajem, bʉ̃ʉrjã khĩir jaraajã khaugba. Wajapcharan añopierr doce veces cheejem aajem. Mag nemjõ gayam chi kher khʉimamuata jũrr durrpierram khʉʉn ich mag monakha apiejem anaabá.

³ Mag phobor ee chan Ẽwandamau khõch khaba aajem nem wau nʉm gaaimua irua mas deeju ayaam khʉʉnjã chukhum aajem. Ich Ẽwandamta Cordero dʉi mag phobor ee chi Porkha nʉisiju anaabá. Maagwai chi chognaan mag irig jeeu nʉm khʉʉnaun,

⁴ i dʉi khĩircha oonaa i thʉ̃rta amach dag gaai ich mag phã wai wenʉrraju aajem.

⁵ Maig chan edau khewaajã khaugbaju anʉm. Maagwai chi maig wenʉrrʉm khʉʉnau õtdau paagjã õtdau igba, ni mʉg ãsdawam edaujã igbaju aajem, ich maach Por Ẽwandamauchata am wʉʉ wai nʉrraju aawai. Mag ich dʉicha nʉisim khʉʉnauta mʉg atag pawiajã i dʉi ich mag gobernaa nʉisiju aajem, mag durr iiur gaai.

Jesucristo ya beeimʉʉ sim

⁶ Maimua chi Ẽwandam chogau mʉrʉg, —Mʉg iekhan chadcharam iek aawai, ag gaai ʉkhaju aai nʉmgui ajim. Ich Ẽwandamau ich i jaaumienag wajapha ich iek jaaumkhĩir khĩirjug deejemuachata ʉ̃gtharmua mʉch ich chog pʉibarmgui ajim, jũrr muata õor ich chognaan agjo mʉg jẽb gaai thʉnʉm khʉʉnag ichdeu mʉg atag jopcha nem wauju thum oopimkhĩir.

⁷ Mag nʉm dʉi ĩchab ich Jesuupai ich igwia, iin mʉgtarr khur jopcha maach awaan beeju aajem. Ar mʉg iek phã sim gaai obeberg maju jaau sim thumaa ʉkhawi ag ipierraa nʉm khʉʉnag warag onee api sim.

⁸ Mʉch chi Juanauchata cha mʉchdeu nem jaau dichdimam thumaa mua mʉch daúacha oowi mʉch jʉ̃gʉucha ũrjim. Mag mʉchdeucha oowi ũr dichtarr khur, mua chi Ẽwandam chog mag mʉchig nem thumaa oopitarr bʉkhʉrr kanieu phõkhabaimajim, irig jewaag awia.

⁹ Mamʉ magbaawai ichdeu mʉrʉg, —Ʉ̃hʉ̃, oob mʉ dʉi jãgam, mʉjã sĩi pʉjo Ẽwandam chog khabahab ajim, pʉ khodnaan Ẽwandam i jaaumien ar mʉg ẽsap gaai phã sim ʉkhawi ag ipierraa aajem khʉʉnjo. Mʉrʉg jeeuju khãyau Ẽwandamagta jeeubá ajim.

¹⁰ Maimua ĩchab mʉrʉg magjim: —Ẽwandamau nem thumaamua ichdeu chachmaju mʉg ẽsap gaai jaau simjo aimʉʉ sim aawai, oob pua sĩi õragjã jaauba pʉch thãar eepai khaphʉ wai chitamgui ajim. Mag khãyau thumaam khʉʉnag jaaupet ajim.

¹¹ Ar nem khaigba waaujem khʉʉnag jaau nʉmjã ʉkhabamʉn, ideu amach khaibag ee naapibá ajim. Mamʉ ar chi wajapha ʉkha nʉm khʉʉnagan, warag nem wajaphamta waupinaa, maimua chi Ẽwandam atheepai wenʉrrʉm khʉʉnagjã warag i gaaita ubʉ wenʉrrapi jaaubá a jaaumajim mʉrʉg, chi Ẽwandam chogau.

¹² Magbaawai, “Eera, mʉʉn jopcha pãar jʉraan majugui” ajim ich Jesuucha. “Mag mʉch mam dʉi mʉch chaainag amachdeu waumarrpierr deemaagjã mua nem phe arrjugui” ajim.

¹³ “Mʉchta nacharam ẽsapdau Ajonaa, chi ãbmiecharam Zetajo chitʉm. Mʉchta nem thum ompaaju nawe chirajim; mʉg durr thum owiajã mʉchin ich mag chirsijugui” ajim, ich Jesuu ich idamaucha.

¹⁴ Ar sĩi khajũa wajap jã simjo thãar wajapha pekau chukkhu nʉm khʉʉnta ʉuhcha thʉnʉm khʉʉnau, amauta maach iiupiejem nemjõ mag mua jaau chirʉm gayamjã jõnaa, mag phobor puertdi khapan wʉwʉr wejom eejã dubju aai naawai.

¹⁵ Mamʉ benkhʉʉn, amach ʉʉin khabam dʉi khapes aajem khʉʉn, juau chikham thõojem khʉʉn, parhooba õrau nem wautarragta Ẽwandamagamjo jeeujem khʉʉn, maimua ar seukha nem ĩgkhanaa chikham khũguurjem khʉʉn chan, ni ãbjã dubba, thum Ẽwandamau isegpʉiju.

¹⁶ Mag mʉchdeu jaau chirʉm chadcha aawaita, ich Jesuujã ich igwi, ichdeuchata ich chog pʉijimgui ajim, magʉm thumaa ar ich iek ʉkha durrum khʉʉnag jaaumkhĩir. Magnaa ichdeupai ich igwi, “Mʉchta sĩi khajap nemjĩirjo David khararr chaain ewagam khʉʉn eemua sũrkha phiidʉtarr anaa ĩchab edaupherr garm phĩdag wʉʉ obeerjemʉugui” ajim Jesuu, ich beeju igwia.

¹⁷ Magbaawai Ẽwandam Akharauta chi Cordero ʉʉi dʉimua, “¡Pidú!” anʉm. Maagwai pãar chi ũr nʉm khʉʉnaujã ĩchab, “Jesús, jopcha pidú” abat irig. Maimua Ẽwandam khaugam khõchgau obissi nʉmjo nʉm khai, maach peerdʉajem iek sĩi õor iiupiejem dojo simta sĩi ich jãg per aujã per auba ʉkhabat.

¹⁸ “Ar mʉg ẽsap gaai mua mʉch i jaaumienag jaaupitarr iek phã sim ũr nʉm khʉʉnag mua mag chirʉmgui” a sim, ich Jesuu: “Ãbmua khãijã chamʉg mua nem jaautarr ʉ̃r jũrr mʉ ichaaur jaaumʉn, Ẽwandamaujã ĩchab ich mʉg ẽsap gaai jaauwai õor chachmaju a sim thumaa i gaaita burrpiju.

¹⁹ Wa magba ãbmua khãijã mʉg mʉch i jaaumienag jaaupitarr iek phã sĩsidʉm igba sĩsidʉm awi bʉchkhun khãijã isegpʉimamʉn, Ẽwandamaujã jũrr irig õor iiupiejem gayam nemjõ jõpiba, ni mʉg ẽsap gaai jaauwai chi ʉ̃gthar ober nʉm khʉʉnag nem deeju a jaau simjã deebaju.

²⁰ Mʉch chi nem magju thum jaau chirʉmuata chadcha mʉʉn jopcha maju a chirʉm, pãar awaan.” Maadeujã chadcha ich magta jeeuju aai nʉm: “Señor Jesús, deeu jopcha pidú.”

²¹ Maach Por Jesuu pãar thumaa ʉu oopaar phe wai sĩepim khõsi chirʉm. Mag ajim keena, ich Jesucristooucha mʉ khãaipi auwi mʉrʉg oopitarr. Juanau