Apocalipsis 19 - Wounaan Meu

Ʉ̃gthar Aai i jeeu nʉm ootarr

¹ Mag Babilonia eegar pabaadem ootarr khur, õor pooma sereu wejom mua ũrjim, ʉ̃gthar. Makhʉʉnau serereukhamua, “¡Ẽwandam maach Porogta thumaam khʉʉnau jeeubathʉ̃! Ichta õor peerdʉajemʉu” anaajim. “Ijom chan chukhum; ichpaita thumaam khʉʉn khãai chi jua thierriu.

² Ichta õor dʉi agpierraa sĩerrʉm, chadcha amachdeu nem waumaajerrpierr am gaai aag. Chi durpathierrmiejã ichdeu nem parhooba ampierr nem wau sĩerrarr gaaimua durrpierram khʉʉn pekau waupiejerr jũrr, ya ich gaaijã mas deebarmgui” anaajim maach Ẽwandamau. “I chaain anaa i chogkha nʉm khʉʉn khechmam chan sĩi ich jãg par khĩir okhoobam arr aawai, ya chadcha i dʉi ich garmua õor dʉi aajerrjo abarm” a serereu khajierram.

³ Mag sereu thʉnarr khur, ũmaai deeu magjierram chi ʉ̃gtharmpeenaupai: “Ẽwandam, ʉuta pua jãg Babilonia orpʉijim; chi naar jãg nathoo jĩu sĩsimʉn jãan ich jãg sĩerrʉm iekhaugui” anaajim.

⁴ Magbaawai mag jooin veinticuatro narr khʉʉnau agjo jayap sĩi khanjo sĩsidʉmta ich paar sĩsid arr khʉʉn dʉimua Ẽwandam ich khu juupjem gaai oo sim khĩirphee kanieu thʉkhookhanaa, khĩeb jẽb gaai dagau dʉrkhanaa irig jeeumamua, “¡Jãan ich magau! ¡Chadcha iita maach thumaam khʉʉnau tho iekhaju aai nʉmgui!” ajierram.

⁵ Makhʉʉnau magbaawai ĩchab mag Ẽwandam khu juupjem pom sim aarmuajã õor iekjo, “Maach Ẽwandamta thobathʉ̃” a sĩejim, “pãach thum ar i okhonaa i chogkha nʉm khʉʉnau. Jooinaujã i thonaa chaainaupa iita thobat” a sĩejim.

Cordero jua pʉrju jaautarr

⁶ Maimua mua ũr nʉʉ aawai, sĩi õor pom wejom iekjo thʉnʉmta mamʉ ĩchab salt pom jurur wejom dʉi pagthʉmpa turururkham iekjo thʉnaajim mua ũurwai. Mag sĩi sereu wejom khʉʉnau mag naajim: “¡Maach Por Ẽwandaman chadcha emkhooirau! Maach Por Ẽwandam thumaam khʉʉn khãai chi thierriuta ya nem thum gobernaa sĩsim.

⁷ Keena, ya Corderoon jua pʉraagpam, onee ajuga. Mag oneenaa i appaita tho iekhaju. Chi ʉʉi, ya ar chihoowia sĩi khĩir khaug sim.

⁸ Irig jũapijim khajũa wajapham, lino den. Maan sĩi memerkhogjã chukhu, ich bäpgau sĩi bʉ̃ʉmjo sim. Mag ich bäpgau bʉ̃ʉmjo simua Ẽwandam chaainkhanaa i dau na wajapha wenʉrraajerrta jaau sim. Magua mag khĩirta irig jũapijim” anaajim.

⁹ Maimua chi Ẽwandam chogau mʉrʉg, —Nau mua iekhabarm phã sĩubá ajim. Mʉg iekhan ich Ẽwandamaucha ich imeerba jaaupitarrta mua pʉrʉg jawaagpamgui ajim mʉrʉg. Magnaa ichdeupai, Corderoou ich jua pʉr nʉm phiesta ee thʉ̃rkhʉʉiwi chi wet nʉm khʉʉnan chadcha oneeta ajugui ajim.

¹⁰ Mʉchig magbaawai, mua i bʉkhʉrr phõbkhaimajim irigta Ẽwandamagamjo jewaag. Mamʉ mag mua ich bʉkhʉrr phõbkhabaimaawai mʉrʉg, —Ʉ̃hʉ̃, oob jãgam mʉ dʉi. Ẽwandamagta jeeubá ajim. Mʉjã sĩi pʉ dʉi ãba Ẽwandam chog khabahab ajim, pʉ khodnaan ar Jesús iek amachdeu ʉkhatarrta ogdʉba amachdeu ootarrjo jaau durrum khʉʉnjo. Ẽwandamagta jeeubá ajim mʉrʉg.

Cabaai bäpphä sim gaai nʉrrarr

¹¹ Mʉchig magbaawai, mua phiidʉnaa oo nʉʉ aawai, edaujãata sĩi weeudʉ wejoojim. Mag edjã weeudʉ wejom eemua woun ãb cabaai bäpphä sim gaai oberchejim. Mag thʉ̃r “Mʉchdeu Nem Wauju Abarmʉn Chadcha Wau Chitʉm” ajim i thʉ̃r, ichdeuta thum wajapha gobernaanaa juurhi eejã werbʉajeewai.

¹² Mag sim dau oowain, sĩi õtdau khĩirjota nem dapag phuphup sĩsid ajim. Ich por gaai porsir khapan paarnaa ĩchab ich gaai ich thʉ̃rjã phã wai sĩejim. Mamʉ mag thʉ̃r chan bigaaum khʉʉnaujã khaugba, ãba ich chi warrum khʉʉupaita khaphʉ sĩejim ich thʉ̃r.

¹³ Mag simua khajũa jũa sim gayan, sĩi dawaa bag phur sĩsid ajim. Ich mag wounpai ĩchab, “Ẽwandam Iek” a thʉ̃r sĩejim.

¹⁴ Ich mag ẽudee Ẽwandam chognaan khapaana pʉʉrthʉ wenʉrrajim. Mamʉ makhʉʉnjã mag sĩsidʉmʉn, sĩi thum khajũa chi wajapham lino den bäphä memerkhogjã chukhu sĩsidʉmta jũanaa, cabaai bäpphä sĩsidʉm gaaita wenʉrrajim.

¹⁵ Mag cabaai bäpphä sim gaai oberchetarrau durrpierr õor nʉnʉidʉm jua khʉaba pãaukhapʉimaag ich i ee thuthui dee khitʉm wai sĩejim. Ichdeuta mʉg durr thum jʉ̃a wai sim aawai jũrr ich jua jʉmpiba dajẽkta wai sĩsiju. Magbaademua õran sĩi uva cho piirjʉu awaag bʉʉu eeg pibthai nʉmjota aju am gaai. Magnaata amachigpai Ẽwandam thumaam khʉʉn khãaijã ʉ̃rpai sĩerrʉm ag khĩir machag khajapham dojo jarr ee choo wejomta dopipʉimaju.

¹⁶ Mag wounau ich khajũa gaai maimua ich khupá gaaijã agjo ẽsapdau phãkha wai nʉrrajim. Chi ẽsapdau mag phã sĩerr, “Reinaan Rey anaa chi pornaan Por” a phã sĩejim. Ajapcharan jãan ich maach Por Jesucristo ajim.

¹⁷ Maimua jũrr dewamta pari agjo Ẽwandam chogkha simta cha edau phuu nʉm gaai dʉnʉʉunaa, nem ichpan wir aig amach khapeenpai pʉr khoojem khʉʉn thʉ̃ʉrwai, ähäakhamua mag sĩejim: —Nemchaain wir aig pãach khapeen pʉr khoojem khʉʉn, daaig pidut a sĩejim. Ẽwandamau pãar athee phathau pooma wai sim, ¡khobahut!

¹⁸ Pãar atheen thʉnʉm: reinaan mod, soldaaun porkhanaa emkhooinkha thʉnarr khʉʉn mod, cabaai mod, mag cabaai gaai nʉrrjee arr khʉʉn mod, maimua thumaam khʉʉn mod. Õor sĩi chikham chogkha nʉrrjee arr khʉʉn mod, maimua chikham chogkhaba sĩi amach khõchagpierr nʉrrjee arr khʉʉn modjã agjo thʉnʉmgui ajim. Magnaa, ¡Khobat, jã pãar atheemʉugui! a jaaujim, nemchaainag.

¹⁹ Maig oowai ĩchab chi mepeer khumjo jojothor sim phũas eemua oberchetarr dʉi mʉg jẽb gayam reinaanpa amach soldaaun dʉi ãba biirdʉ thʉnaajim, mag cabaai bäpphä sim gaai nʉrrʉm dʉi i khapeen i ẽudee wenʉrrʉm khʉʉnpa ãba amach garmua werbʉag.

²⁰ Mamʉ magbaadem ee chi mepeer mag phũas eemua oberchetarr preso sĩsijim. Mag preso sĩsim dʉi ãbakhai chi seukha nem jaau nʉrraajerrjã agjo pʉr auwi, dʉi ĩchab preso sĩsijim. Ich mag seukha nem jaaumieuta mag khumjo sim phũas eemua oberchetarr dakhĩir õrau nem ooba aajempa wau nʉrrʉm gaaimua õor khũgur aumaawai, ʉdʉraa amach gaai mag phũas eemua oberchetarr ag dauchachjã amach gaai phãpiwi i khĩirkha wau simʉgjã Ẽwandamagamjo jeeujierram. Mag amach numwe pʉrkha auwi, ich jãg thõojã thõoba iiu sĩsidʉmta thʉrrdo ee azufre õtdau dʉi waaureu uu wejom ee barkhʉʉipʉijim.

²¹ Magbaawai tagam khʉʉn am khapeen, mag cabaai gaai nʉrrarrau ich i ee espaar durag sĩerrau, ajapcharan ich Jesucristoouma, sĩi su khechpʉijim. Mag khechbapäaiwai, chadcha nemchaain pom beewi sĩi khodubbapʉimjo abaawai, õor pom thʉnarrta chukkhu aadeju.