Salmane 6 - Bibelen – Bibelselskapets omsetjing 2011

¹ Til korleiaren. Med strengespel. Etter «Den åttande». Ein salme av David.

² Herre, refs meg ikkje i din vreide, straff meg ikkje i din harme!

³ Ver meg nådig, Herre, for eg er kraftlaus. Læk meg, Herre, kroppen skjelv av redsle,

⁴ mi sjel er gripen av frykt. Herre, kor lenge?

⁵ Vend deg hit, Herre, og fri meg ut, frels meg i di miskunn!

⁶ Kven av dei døde kallar på deg? Ingen i dødsriket prisar deg.

⁷ Eg er trøytt av å klaga. Eg dynkar mitt leie med tårer kvar natt, senga dryp av gråt.

⁸ Mitt auge er sløvt av bitter sorg, aldra fordi mange står imot meg.

⁹ Bort frå meg, alle de som gjer urett! For Herren høyrer min gråt.

¹⁰ Herren lyttar til mitt rop om nåde, Herren tek imot mi bøn.

¹¹ Alle mine fiendar skal bli til skamme og rista av redsle. Brått skal dei snu seg bort i skam.