Salmane 3 - Bibelen – Bibelselskapets omsetjing 2011

¹ Ein salme av David då han rømde for Absalom, son sin.

² Herre, kor talrike mine fiendar er! Mange reiser seg mot meg.

³ Dei seier om meg: «Hos Gud er det inga frelse for han.» Sela

⁴ Men du, Herre, er eit skjold for meg, du er mi ære, du lyfter mitt hovud.

⁵ Eg ropa høgt til Herren, og han svara meg frå sitt heilage fjell. Sela

⁶ Eg la meg ned og sovna, eg vakna, for Herren held meg oppe.

⁷ Eg er ikkje redd ti tusen som samlar seg mot meg på alle kantar.

⁸ Reis deg, Herre! Frels meg, min Gud! Du slår alle mine fiendar på kjeven og knuser tennene til dei lovlause.

⁹ Frelsa er hos Herren. Lat di signing kvila over ditt folk! Sela