Amos 6 - Bibelen – Bibelselskapets omsetjing 2011

Ve dei sorglause på Sion

¹ Ve dei sorglause på Sion og dei trygge på Samarias fjell, dei gjævaste av det fremste folkeslaget, dei som Israels hus vender seg til.

² Far til Kalne og sjå, gå derifrå til Hamat-Rabba og far ned til Gat i Filistarland! Er de betre enn desse rika? Har dei eit større område enn de?

³ De vil jaga ulukkedagen bort, men set vald i høgsetet.

⁴ Dei ligg på elfenbeinsbenker og strekkjer seg på divanar, dei et lam frå saueflokken og gjøkalvar frå buskapen.

⁵ Dei skrålar til harpespel som var dei David, og reknar instrumenta hans som sine.

⁶ Dei drikk vin av offerskåler og salvar seg med den finaste olje, men lid ikkje under Josefs samanbrot.

⁷ Difor skal dei no drivast i eksil, fremst mellom dei bortførte. Då blir det slutt på festsamlingane der dei ligg og dreg seg.

Gud straffar Samaria

⁸ Herren Gud har svore ved seg sjølv, seier Herren, allhærs Gud: Eg avskyr Jakobs byrgskap og hatar borgene der. Eg utleverer byen og alt som er i han.

⁹ Er det ti overlevande i eit hus, skal dei døy.

¹⁰ Når ein ven eller slektning ber knoklane ut or huset, spør han den som er inst i huset: «Er det fleire att hos deg?» Og han svarar: «Nei, ingen.» Då seier han: «Hysj!» for Herrens namn må ikkje nemnast.

¹¹ Sjå, Herren byd, og han slår det store huset i knas og det vesle huset i bitar.

¹² Spring vel hestar opp bratte fjellet, pløyer ein det med oksar? Men de gjer retten om til gift og rettferds frukt til malurt.

¹³ De gleder dykk over Lo-Dabar og seier: «Sanneleg. Det var med eiga kraft vi tok Karnajim.»

¹⁴ Sjå, no reiser eg eit folk mot deg, Israels hus, seier Herren, allhærs Gud. Dei skal undertrykkja dykk frå Lebo-Hamat til Araba-bekken.