Amos 3 - Bibelen – Bibelselskapets omsetjing 2011

Utveljing og ansvar

¹ Høyr dette ordet som Herren talar mot dykk, de israelittar, mot heile den slekta eg førte opp frå Egypt:

² Berre dykk ville eg kjennast ved mellom alle slektene på jorda. Difor vil eg straffa dykk for alle syndene dykkar.

Profetkallet tvingar

³ Går vel to i lag utan å ha ein avtale?

⁴ Brøler vel løva i skogen utan å ha eit bytte? Knurrar ungløva i hòla utan å ha fanga noko?

⁵ Fell vel fuglen til jorda utan at ei felle er sett opp? Sprett snara frå marka utan at ho har fanga noko?

⁶ Gjallar hornet i byen utan at folket skjelv? Skjer det ei ulukke i byen utan at Herren har gjort det?

⁷ Nei, Herren Gud gjer ikkje noko utan å openberra sitt løynde råd for tenarane sine, profetane.

⁸ Løva brøler – kven blir ikkje redd? Herren Gud talar – kven blir ikkje profet?

Dom over Samaria

⁹ Lat det høyrast over borgene i Asjdod og over borgene i Egypt, og sei: Kom saman på fjella kring Samaria! Sjå den store forvirringa hos henne og undertrykkinga i byen!

¹⁰ Dei veit ikkje å gjera det rette, seier Herren. Dei dyngjer opp vald og ran i borgene sine.

¹¹ Difor seier Herren Gud: Fienden skal omringa landet, riva ned festninga di, borgene skal plyndrast.

¹² Så seier Herren: Som gjetaren bergar to leggbein eller ein øyreflipp frå løvegapet, slik skal israelittane bergast, dei som sit i sofahjørne i Samaria og på divanar i Damaskus.

¹³ Høyr og ver vitne mot Jakobs hus! seier Herren Gud, allhærs Gud.

¹⁴ Ja, den dagen eg straffar Israel for syndene deira, lèt eg straffa råka altara i Betel. Altarhorna blir hogne av og fell til jorda.

¹⁵ Då knuser eg både vinterhus og sommarhus. Elfenbeinshus skal gå til grunne og store bygningar siga i røys, seier Herren.