Salmane 6 - Norsk ovesettelse 1978/85 nynorsk

Naudrop til Gud

¹ Til korleiaren. Med strengespel. Etter «Den åttande». Ein Davids- salme.

² Herre, refs meg ikkje i din vreide, og tukt meg ikkje i din harme!

³ Ver meg nådig, Herre, for eg er kraftlaus. Læk meg, Herre, eg er djupt forfærd.

⁴ Mi sjel er gripen av redsle. Kor lenge, Herre?

⁵ Herre, vend deg hit og fri meg ut, frels meg i di miskunn!

⁶ For ingen av dei døde kjem deg i hug. Kven prisar vel deg i dødsriket?

⁷ Eg er trøytt av å sukka, med tårer væter eg mi lege, eg græt kvar natt, så senga er våt.

⁸ Mitt auga er sløvt av bitter sorg og dimt av all den motstand eg møter.

⁹ Vik frå meg, alle ugjerningsmenn, for Herren har høyrt min gråt.

¹⁰ Herren høyrde då eg trygla og bad, han har teke imot mi bøn.

¹¹ Alle mine fiendar skal verta til skammar. Dei skal gripast av redsle og brått snu om med skam.