Salmane 3 - Norsk ovesettelse 1978/85 nynorsk

Herren held meg oppe

¹ Ein salme av David, då han rømde for Absalom, son sin.

² Herre, kor talrike mine fiendar er! Mange er dei som reiser seg mot meg.

³ Mange er dei som seier om meg: «Det er ikkje frelse for han hjå Gud.» Sela

⁴ Men du er eit skjold for meg, Herre, du er mi ære, du lyfter mitt hovud.

⁵ Då eg ropa høgt til Herren, svara han meg frå sitt heilage fjell. Sela

⁶ Eg la meg ned og sovna – og vakna, for Herren held meg oppe.

⁷ Eg er ikkje redd om ti tusen mann fylkar seg mot meg på alle kantar.

⁸ Reis deg, Herre! Frels meg, min Gud! For du slår alle mine fiendar på kinnet og knuser tennene på dei vonde.

⁹ Hjå Herren er det frelse. Lat di signing kvila over ditt folk! Sela