Salmane 2 - Norsk ovesettelse 1978/85 nynorsk

Herren og den han har salva

¹ Kvifor ståkar folkeslaga, kvifor legg folka gagnlause planar?

² Kongane på jorda reiser seg, fyrstane legg råd i lag mot Herren og den han har salva:

³ «Lat oss slita sund deira lekkjer og kasta deira reip av oss!»

⁴ Han som tronar i himmelen, ler, Herren spottar dei.

⁵ Så talar han til dei i sin vreide, med brennande harme skræmer han dei:

⁶ «Det er eg som har sett inn min konge på Sion, mitt heilage fjell.»

⁷ Eg vil kunngjera det Herren har fastsett. Han sa til meg: «Du er son min, eg har født deg i dag.

⁸ Bed meg, så gjev eg deg folka til arv og heile jorda til eige.

⁹ Du skal knusa dei med jernstav og slå dei sund som leirkar.»

¹⁰ Og no, de kongar, far visleg fram, ta imot åtvaring, de styrarar på jord!

¹¹ Ten Herren med age og glede,

¹² kyss skjelvande jorda for hans føter, så han ikkje skal verta vreid og de gå til grunne på vegen. For lett kan hans vreide kveikjast. Sæle er alle som flyr til han.