Amos 8 - Norsk ovesettelse 1978/85 nynorsk

Enden er komen for Israel

¹ Dette synet lét Herren Gud meg sjå: ei korg med mogen frukt.

² Han sa: «Kva ser du, Amos?» Eg svara: «Ei korg med mogen frukt.» Då sa Herren til meg: «Enden er komen for Israel, mitt folk, eg vil ikkje lenger ha tol med det.

³ Kvinnene som syng i slottet, skal jamra den dagen, lyder ordet frå Herren Gud. Alle stader ligg det lik i mengd. Dei er slengde til sides. Hysj!»

Herrens dom over uærleg handel

⁴ Høyr, de som trakkar fattigfolk ned og gjer ende på dei hjelpelause i landet!

⁵ De seier: «Når er nymånedagen slutt, så vi kan selja korn, og sabbaten til ende, så vi kan opna vår kornbu?» Då gjev de ringt mål og tek for stor betaling og fuskar med falske vekter.

⁶ De kjøper småkårsfolk for pengar, ein fattig stakkar for eit par skor og seier: «No sel vi avfallskorn!»

⁷ Herren har svore ved Jakobs ære: Aldri skal eg gløyma alt det dei har gjort!

⁸ Må ikkje jorda skjelva for slikt, så alle som bur der, syrgjer? Ja, må ho ikkje stiga som Nilen, stiga og siga som elva i Egypt?

Ulukkedagen

⁹ Den dagen skal det henda, lyder ordet frå Herren Gud: Eg lèt sola glada middagstider, gjer jorda mørk ved høgljos dag.

¹⁰ Eg gjer dykkar festar til syrgjehøgtid og alle dykkar viser til klagesong. Eg legg syrgjeklede om alle lender og lèt kvart hovud rakast snautt. Eg valdar slik sorg som når ein syrgjer over einaste sonen, og enden vert som ein ulukkedag.

Hunger etter Herrens ord

¹¹ Sjå, dagar skal koma, lyder ordet frå Herren Gud, då eg sender hunger i landet, ikkje hunger etter brød eller torste etter vatn, men etter å høyra Herrens ord.

¹² Dei skal flakka om frå hav til hav, sviva ikring frå nord til aust og leita etter Herrens ord, men dei skal ikkje finna det.

¹³ Fagre jenter og sterke gutar skal siga om av torste den dagen.

¹⁴ Dei som sver ved Samarias synd og seier: «Så sant din gud lever, Dan!» og: «Så sant din gud lever, Be'er-Sjeba!», dei skal falla og aldri reisa seg meir.