Salmane 4 - Norsk oversettelse 1938 nynorsk

David bed Herren høyra bøni hans og hjelpa han mot fiendane hans, 2. Han manar fiendane til å halda upp med åtaki sine; for han er den som Herren hev kåra, 3.4; dei skal vera stille, tena Herren med ærleg hug og lita på han, 5.6. Sjølv lit han på Herren, hev ei gleda i han som er større enn deira timelege gleda, og er trygg i hans varetekt, 7-9.

¹ Til songmeisteren, med strengleik; ein salme av David.

² Når eg ropar, so svara meg, du Gud som er rettferd! I trengsla hev du gjeve meg; ver meg nådig og høyr mi bøn.

³ De velduge menn! Kor lenge skal mi æra vera til spott? Kor lenge vil de elska fåfengd, fara etter lygn? Sela.

⁴ Vit då at Herren hev kåra seg ein som er gudleg! Herren høyrer når eg ropar til han.

⁵ Harmast, men synda ikkje! Tenk etter i dykkar hjarta på lægjet dykkar og ver stille! Sela.

⁶ Ber fram rettferds offer, og set dykkar lit til Herren!

⁷ Mange segjer: Kven vil syna oss noko godt? Lyft du yver oss ljoset frå di åsyn, Herre!

⁸ Du hev gjeve meg større gleda i mitt hjarta enn dei hev når deira korn og vin fell rikleg.

⁹ I fred vil eg både leggja meg ned og sovna; for du, Herre, let meg einsaman bu i trygd.