Salmane 2 - Norsk oversettelse 1938 nynorsk

Folki og kongane på jordi gjer fåfengt uppreist mot den som Herren hev salva (Messias, Kristus), 1-3. Herren lær åt dei, talar til dei i vreide og segjer at det er han sjølv som hev sett han til konge, 4-6. Den som Herren hev salva, kunngjer at Herren hev gjort han til sin son og gjeve han all makt yver jordi, 7-9. Difor skal upprørarane gjeva seg under han, 10-12.

¹ Kvi ståkar heidningane, og kvi stilar folki på fåfengt verk?

² Kongane på jordi reiser seg, og fyrstane legg råd saman imot Herren og den han hev salva:

³ Lat oss slita sund deira band og kasta deira tog av oss!

⁴ Han som tronar i himmelen, lær, Herren spottar dei.

⁵ So talar han til dei i sin vreide, og i sin harm skræmer han dei:

⁶ Og eg hev då sett inn min konge på Sion, mitt heilage fjell!

⁷ Eg vil kunngjera ei rådgjerd: Herren sa til meg: Du er min son, eg hev født deg i dag.

⁸ Krev av meg, so vil eg gjeva deg heidningane til arv og endane av jordi til eiga.

⁹ Du skal knasa dei med jarnstav; som kruskjerald skal du smuldra dei.

¹⁰ Og no, de kongar, far visleg fram! Lat dykk segja, de domarar på jordi!

¹¹ Ten Herren med age, og fagna dykk med otte!

¹² Kyss sonen, so han ikkje skal verta vreid, og de ganga til grunns på vegen! For hans vreide kunde lett kveikjast. Sæle er alle dei som flyr til han! /