Høgsongen 1 - Norsk oversettelse 1938 nynorsk

Bruri (Israels-lyden) lengtar etter sin himmelske brudgom (Messias), 2-4. Ho talar um korleis det er med henne for hennar trengslor skuld, og kor inderleg ho stundar etter å finna brudgomen sin, 5-7. Brudgomen segjer henne kvar ho kann finna han, og lovar henne fagre prydnadsting, 8-11. Ho vitnar kor dyr ein skatt han er for henne, 12-14. Han prisar henne 15, og ho prisar han, 16.17.

¹ Høgsongen av Salomo.

² Han kysse meg med kyssar av sin munn! For din kjærleik er betre enn vin.

³ Dine salvar angar so ljuvleg, ein utrend salve er ditt namn; difor held møyane av deg.

⁴ Drag meg! Me vil springa etter deg. Kongen hev ført meg inn i sine kovar; me vil fegnast og frygdast i deg, me vil prisa din kjærleik meir enn vin; med rette elskar dei deg.

⁵ Eg er svart, men like vel ven, de Jerusalems døtter, som Kedars tjeldbuer, som Salomos tjeldteppe.

⁶ Sjå ikkje på meg, av di eg er so svart, av di soli hev brent meg so! Sønene åt mor mi harmast på meg, dei sette meg til vingardsvaktar; min eigen vingard hev eg ikkje vakta.

⁷ Seg meg, du som mi sjel elskar: Kvar gjæter du no? Kvar held du middagskvild? For kvi skal eg ganga som ei kvinna med slør attmed hjordene åt felagane dine?

⁸ Veit du det ikkje, du fagraste av kvinnor, so fylg berre faret etter hjordi og gjæt dine kje burtmed hyrdingbuene!

⁹ Med gangarane for Faraos vogner liknar eg deg, min hugnad.

¹⁰ Vene er dine lekkjeprydde vangar, din hals med perleradene.

¹¹ Lekkjor av gull skal me laga åt deg med sylvprikkar på.

¹² Alt medan kongen sat med sitt bord, gav min narde sin ange.

¹³ Venen min er meg ei myrrakula, som ligg innved barmen min.

¹⁴ Venen min er meg ei cyperdruva i En-Gedis vingardar.

¹⁵ Kor fager du er, min hugnad, kor fager du er! Dine augo er duvor.

¹⁶ Å, kor du er fager, min ven, kor du er ljuvleg! Og vårt lægje er grønt.

¹⁷ Sedrar er bjelkane i vårt hus, cypressar er vår tavlute himling.