Domarane 12 - Norsk oversettelse 1938 nynorsk

Efra'imitane tek på Jefta, for di han ikkje hev teke dei med i striden mot ammonitane; Jefta vinn yver dei; han døyr, 1-7. Ibsan, Elon og Abdon styrer Israel, 8-15.

¹ Efra'imitane baud ut mannskapet sitt og for nordetter, og dei sa til Jefta: Kvi sende du ikkje bod etter oss då du for av stad og vilde strida mot ammonitane? No vil me setja eld på huset du bur i.

² Då sa Jefta til dei: Eg og folket mitt låg i ein hard strid med ammonitane; då ropa eg på dykk, men de hjelpte meg ikkje imot dei;

³ og då eg såg at de ikkje vilde hjelpa, våga eg livet og for imot ammonitane, og Herren gav dei i hendene mine. Kvi kjem de so no farande og vil slåst med meg?

⁴ So samla han alle Gileads-mennene og stridde mot Efra'im. Og Gileads-mennene hogg efra'imitane ned; for di dei hadde sagt: De er rømingar frå Efra'im! Gilead ligg midt i Efra'im, midt i Manasse.

⁵ Dei stengde vadi yver Jordan for efra'imitane, og kvar gong det kom ein efra'imit som hadde rømt ifrå slaget og vilde sleppa yver, spurde dei: Er du efra'imit? Han svara: Nei.

⁶ Då sa dei til han: Seg sjibbolet! Men han sa sibbolet; for han kunde ikkje segja det rett. So greip dei han og drap han innmed Jordanvadi. Den gongen fall det tvo og fyrti tusund mann av Efra'ims-ætti.

⁷ Jefta styrde Israel i seks år. So døydde Jefta frå Gilead og vart gravlagd i ein av Gileadsbyane.

⁸ Etter han var Ibsan frå Betlehem domar i Israel.

⁹ Han hadde tretti søner; tretti døtter gifte han burt, og tretti sonekonor henta han heim; han styrde Israel i sju år.

¹⁰ So døydde Ibsan og vart gravlagd i Betlehem.

¹¹ Etter han var Elon av Sebulons-ætti domar i Israel. Han styrde Israel i ti år.

¹² So døydde Elon av Sebulons-ætti og vart gravlagd i Ajalon i Sebulonslandet.

¹³ Etter han var Abdon Hillelsson frå Piraton domar i Israel.

¹⁴ Han hadde fyrti søner og tretti sonesøner. Dei reid på sytti asenfolar. Han styrde Israel i åtte år.

¹⁵ So døydde Abdon Hillelsson frå Piraton og vart gravlagd i Piraton i Efra'imsland, på Amaleksfjell.