Amos 6 - Norsk oversettelse 1938 nynorsk

Profeten ropar ve yver dei sutlause hovdingane i det rike og blømande Israel, dei som bur i Jerusalem og Samaria; dei vil ikkje tru at domen er nær, men er harde mot dei veike og lever i ovlivnad, utan tanke på at folket snart skal verta tynt, 1-6. Han forkynner Israel at Herren til straff for gudløysa deira vil lata eit framandt folk koma yver dei, plaga dei hardt, øydeleggja riket deira og føra dei i utlægd; med all si makt vil dei ikkje kunna standa seg mot det, 7-14.

¹ Usæle dei som sit trygge på Sion, utan sut på Samarias fjell, dei fremste i det gjævaste av folki, dei som Israels hus plar venda seg til!

² Far yver til Kalne og sjå, gakk derifrå til det store Hamat, og stig ned til Gat i Filistarland! Er dei betre enn desse riki? Er deira land større enn dykkar?

³ De som jagar den vonde dagen langt burt og let uretten sessa seg innmed dykk,

⁴ de som ligg på filsbein-benker og latar dykk på sengene dykkar, som et lamb som er valde or saueflokken og gjødkalvar henta frå fjøset,

⁵ som syng allslags tull til harpelåt og hev tenkt dykk ut strengespel, liksom David,

⁶ som drikk vin or bollar og salvar dykk med dyraste oljen, men ikkje syrgjer yver Josefs skade.

⁷ Difor skal dei no førast burt fremst i den landlyste flokken, og slutt skal det vera med letings-skrålet.

⁸ Herren, Israels Gud, hev svore ved seg sjølv, segjer Herren, allhers Gud: Eg styggjest ved Jakobs byrgskap og hatar hans slott, og eg gjev upp byen og alt som der finst.

⁹ Og um det finst ti menner att i eitt og same hus, so skal dei døy.

¹⁰ Og frenden åt ein mann, han som skal brenna han, skal taka han og bera beini or huset; og han skal segja til den som er inst inni huset: Er det nokon att hjå deg? Han skal svara: Nei, ingen! Då skal han segja: Hysj! Herrens namn må ikkje nemnast!

¹¹ For sjå, Herren byd, og dei slær det store huset i knas, og det vesle til dess det brest.

¹² Spring vel hestane uppetter fjellet, eller pløgjer ein der med uksar? - sidan de hev vendt retten til forgift og rettferds frukter til malurt.

¹³ De som gled dykk i det som ingen ting er, og som segjer: Det er med vår eigi makt me hev vunne oss velde!

¹⁴ For sjå, eg reiser eit folk imot dykk, Israels hus, segjer Herren, allhers Gud, og dei skal trengja og trælka dykk frå Hamatvegen til Moabekken.