जकरिया 8 - नेपाली नयाँ संशोधित संस्करण

परमप्रभुको यरूशलेमलाई आशिष्‌ दिने प्रतिज्ञा

¹ फेरि सर्वशक्तिमान्‌ परमप्रभुको यो वचन मकहाँ आयो।

² सर्वशक्तिमान्‌ परमप्रभु यसो भन्‍नुहुन्‍छ, “सियोनको निम्‍ति म साह्रै डाही भएको छु। म त्‍यसको निम्‍ति डाहले जलिरहेको छु।”

³ परमप्रभु यसो भन्‍नुहुन्‍छ, “म फर्केर सियोनमा आउनेछु, र यरूशलेममा वास गर्नेछु। तब यरूशलेम ‘सत्‍यको सहर’ भनिनेछ, र सर्वशक्तिमान्‌ परमप्रभुको पर्वतचाहिँ ‘पवित्र पर्वत’ भनिनेछ।”

⁴ परमप्रभु यसो भन्‍नुहुन्‍छ, “यरूशलेमका गल्‍लीहरूमा फेरि पूरा उमेर पुगेका पुरुष र स्‍त्रीहरू आफ्‍नो उमेरको कारण हातमा लहुरो टेकेर बस्‍नेछन्‌।

⁵ सहरका गल्‍लीहरूचाहिँ खेल्‍ने केटाकेटीहरूले भरिएका हुनेछन्‌।”

⁶ सर्वशक्तिमान्‌ परमप्रभु यसो भन्‍नुहुन्‍छ, “त्‍यस बेला यी मानिसहरूमध्‍येबाट बचेकाहरूलाई त्‍यो कुरा अचम्‍मको लाग्‍ला, तर के त्‍यो मेरो नजरमा पनि अचम्‍मको होला त?” सर्वशक्तिमान्‌ परमप्रभु भन्‍नुहुन्‍छ।

⁷ सर्वशक्तिमान्‌ परमप्रभु यसो भन्‍नुहुन्‍छ, “हेर, म मेरो प्रजालाई पूर्वको देश र पश्‍चिमको देशदेखि बचाउनेछु।

⁸ म तिनीहरूलाई यरूशलेममा बस्‍नलाई ल्‍याउनेछु। तिनीहरू मेरा प्रजा हुनेछन्, र म तिनीहरूका परमेश्‍वर भएर तिनीहरूप्रति विश्‍वासी र धार्मिक हुनेछु।”

⁹ सर्वशक्तिमान्‌ परमप्रभु यसो भन्‍नुहुन्‍छ, “तिमीहरू, जसले अहिले ती अगमवक्ताहरूद्वारा भनेका वचनहरू सुन्‍दछौ, जो सर्वशक्तिमान्‌ परमप्रभुका भवनको जग बसाल्‍दा त्‍यहाँ थिए, तिमीहरूका हातहरू बलिया होऊन्‌ कि मन्‍दिरको निर्माण हुन सकोस्‌।

¹⁰ त्‍यस समयभन्‍दा अघि मानिस र पशुको निम्‍ति ज्‍याला थिएन। शत्रुको कारण कुनै मानिस सुरक्षासहित आफ्‍नो काममा जान सक्‍दैनथे, किनकि मैले सबै मानिसहरूलाई आफ्‍नो छिमेकीको विरुद्धमा खड़ा गरेको थिएँ।

¹¹ तर अब म यस प्रजाका बाँकी रहेकाहरूमाथि अघिका दिनमा जस्‍तै गर्नेछैनँ,” सर्वशक्तिमान्‌ परमप्रभु भन्‍नुहुन्‍छ।

¹² “बीउ राम्ररी उब्‍जनेछ, दाखको बोटले फल दिनेछ, जमिनले त्‍यसको अन्‍न उब्‍जाउनेछ, र आकाशले शीत झार्नेछ। म यस प्रजाको बाँकी रहेका मानिसहरू यी सबै कुरा उत्तराधिकारको रूपमा दिनेछु।

¹³ हे यहूदा र इस्राएल हो, जसरी तिमीहरू जाति-जातिहरूका बीचमा अभिशाप भएका थियौ, यसरी म तिमीहरूलाई बचाउनेछु र तिमीहरू आशिष्‌को कारण हुनेछौ। नडराओ, तर तिमीहरूका हात बलिया होऊन्‌।”

¹⁴ सर्वशक्तिमान्‌ परमप्रभु यसो भन्‍नुहुन्‍छ, “जसरी तिमीहरूका पिता-पुर्खाले मलाई रीस उठाउँदा तिनीहरूलाई विपत्ति ल्‍याउने अठोट गरेथें र मैले पछितो गरिनँ,” सर्वशक्तिमान्‌ परमप्रभु भन्‍नुहुन्‍छ।

¹⁵ “त्‍यसरी नै अब यरूशलेमलाई र यहूदालाई फेरि भलाइ गर्न मैले निश्‍चय गरेको छु। तिमीहरू नडराओ।

¹⁶ तिमीहरूले गर्नुपर्ने काम यिनै हुन्‌: एक-अर्कासँग साँचो बोल्‍ने गर, र आफ्‍ना न्‍यायालयमा सत्‍य र असल न्‍याय गर।

¹⁷ आफ्‍नो छिमेकीको विरुद्धमा खराब षड्‌यन्‍त्र नगर, र झूटा शपथ खान नरुचाओ। यी सबै कुरा म घृणा गर्दछु,” परमप्रभु भन्‍नुहुन्‍छ।

¹⁸ फेरि सर्वशक्तिमान्‌ परमप्रभुको यो वचन मकहाँ आयो।

¹⁹ सर्वशक्तिमान्‌ परमप्रभु यसो भन्‍नुहुन्‍छ, “चौथो, पाँचौँ, सातौँ र दशौँ महिनामा हुने उपवासहरू यहूदाको निम्‍ति रमाहट, खुशीका समय र आनन्‍दका चाड़हरू हुनेछन्‌। यसैकारण तिमीहरू सत्‍य र शान्‍ति रुचाओ।”

²⁰ सर्वशक्तिमान्‌ परमप्रभु यसो भन्‍नुहुन्‍छ, “धेरै सहरका बासिन्‍दाहरू र धेरै मानिसहरू अझै आउनेछन्,

²¹ र एउटा सहरका बासिन्‍दाहरू अर्को सहरमा यसो भन्‍दै जानेछन्, ‘परमप्रभुलाई बिन्‍ती चढ़ाउन तुरुन्‍त जाऔं र सर्वशक्तिमान्‌ परमप्रभुलाई खोजौं। म आफै पनि जानेछु’।

²² धेरै सामर्थी जातिहरू र मानिसहरू यरूशलेममा सर्वशक्तिमान्‌ परमप्रभुको खोजी गर्न र उहाँको निगाह प्राप्‍त गर्न आउनेछन्‌।”

²³ सर्वशक्तिमान्‌ परमप्रभु यसो भन्‍नुहुन्‍छ, “ती दिनमा सबै जाति-जातिबाट र सबै भाषा बोल्‍नेहरूमध्‍येबाट दश जना मानिसले एउटा यहूदीलाई लुगाको छेउ समातेर यसो भन्‍नेछन्, ‘हामी तपाईंसितै जानेछौं, किनभने हामीले सुनेका छौं कि परमेश्‍वर तपाईंसित हुनुहुन्‍छ’।”