जकरिया 5 - नेपाली नयाँ संशोधित संस्करण

उडिरहेको चर्मपत्रका मुट्ठोको दर्शन

¹ मैले फेरि हेरें, र मेरो अगि उड़िरहेको एउटा चर्मपत्रको मुट्ठो थियो।

² तिनले मलाई सोधे, “तिमी के देख्‍छौ?” मैले जवाफ दिएँ, “नौ मिटर लामो र साढ़े चार मिटर चौड़ा एउटा उड़िरहेको चर्मपत्रको मुट्ठो म देख्‍तछु।”

³ अनि तिनले मलाई भने, “सारा देशमाथि पर्न लागेको यो सराप हो, किनकि यसको एकापट्टि भनेअनुसार हरेक चोर निर्वासित हुनेछ, र अर्कापट्टि भनेअनुसार हरेक झूटो शपथ खाने निर्वासित हुनेछ।

⁴ सर्वशक्तिमान्‌ परमप्रभु घोषणा गर्नुहुन्‍छ, ‘म सराप पठाउनेछु, र चोरको घरमा र मेरो नाउँमा झूटो शपथ खानेको घरमा त्‍यो पस्‍नेछ, र त्‍यो घरभित्र रहनेछ र त्‍यसको काठपात र ढुङ्गा दुवै सर्वनाश गर्नेछ’।”

टोकरीमा एउटी स्‍त्री

⁵ तब मसित कुरा गर्ने स्‍वर्गदूतले अगि आएर मलाई भने, “त्‍यो के निस्‍केर आइरहेछ, सो हेर।”

⁶ तब मैले सोधें, “त्‍यो के हो?” तब तिनले जवाफ दिए, “त्‍यो एउटा नाप्‍ने टोकरी हो।” तिनले भने, “देशभरि भएका मानिसहरूको दुष्‍टता यही हो।”

⁷ तब सीसाको ढकना मास्‍तिर उठाइयो, र एउटी स्‍त्री त्‍यस टोकरीभित्र बसिरहेकी देखें।

⁸ अनि तिनले भने, “दुष्‍टता यही हो।” तब तिनले त्‍यस स्‍त्रीलाई टोकरीभित्र धकेलिदिए, र सीसाको ढकनाले त्‍यसको मुख छोपिदिए।

⁹ तब मैले आफ्‍ना आँखा उचालेर हेरें, र दुई जना स्‍त्रीहरू आइरहेका देखें, र तिनीहरूका पखेटामा बतास रहेछ। तिनीहरूका पखेटा सारसका पखेटाजस्‍तै रहेछन्, र तिनीहरूले त्‍यो टोकरीलाई पृथ्‍वी र आकाशको बीचमा उचालेर लगे।

¹⁰ तब मैले मसित कुरा गर्ने ती स्‍वर्गदूतलाई सोधें, “यिनीहरूले यो टोकरी कहाँ लगिरहेछन्‌?”

¹¹ तिनले मलाई जवाफ दिए, “बेबिलोनिया देशमा त्‍यसको निम्‍ति एउटा घर बनाउनलाई लगिरहेछन्‌। जब त्‍यो तयार हुन्‍छ, तब त्‍यो टोकरी त्‍यहाँ त्‍यसकै स्‍थानमा राखिनेछ।”