भजनसंग्रह 142 - नेपाली नयाँ संशोधित संस्करणसङ्कष्टमा सहायताको लागि प्रार्थना गुफामा हुँदा दाऊदको मस्किल 1 उच्च सोरले म परमप्रभुलाई पुकार्छु, दयाको निम्ति परमप्रभुमा म आफ्नो आवाज उचाल्छु। 2 उहाँको समक्ष म आफ्नो उजूर टक्र्याउँछु, उहाँमा नै म आफ्नो दु:ख पोखाउँछु। 3 जब मेरो आत्मा मभित्र शिथिल हुन्छ, तपाईं नै हुनुहुन्छ जसले मेरो बाटो जान्नुहुन्छ। म हिँड्ने बाटोमा मानिसहरूले मेरो निम्ति पासो थापेका छन्। 4 मेरो दाहिनेतिर दृष्टिपात गर्नुहोस्, मेरो फिक्री गर्ने कोही पनि छैन। मेरो शरणस्थान कहीँ छैन। कसैले मेरो वास्ता गर्दैन। 5 हे परमप्रभु, म तपाईंमा पुकारा गर्छु। म भन्छु, “तपाईं मेरो शरणस्थान, र जीवितहरूको देशमा मेरो भाग हुनुहुन्छ।” 6 मेरो पुकारा सुनिदिनुहोस्, किनकि म ठूलो अभावमा परेको छु। मलाई खेद्नेहरूबाट बचाउनुहोस्, किनकि तिनीहरू मेरो निम्ति साह्रै बलिया छन्। 7 मेरो कैदबाट मलाई छुटकारा दिनुहोस्, र म तपाईंको प्रशंसा गर्न सकूँ। तब मप्रति गर्नुभएको भलाइले गर्दा धर्मीजनहरू मेरो चारैतिर एकत्र हुनेछन्। |
Nepali New Revised Version © Nepal Bible Society 1997, 2006, 2009, 2012
Nepal Bible Society